Tui rilo urang nghe nhan bhap bini, gheng H’Mong hu meng biak aval, pagam haong luac jalan nao daok karei saong luac jalan ngak jeng dom palei pala di urang bangsa H’Mong labik ceik glaong gah Barak negar. Dalam dom thun bilan tapa, tuk raidiuk daok rilo kan kandah, sap khen jeng bruk piah ka menuac urang brei mboh drut druai, payua hatai di drei saong talei pambuak bhap bini.

Urang bangsa H’Mong sahaneng lac, sap khen meda salih ka panuac ndom. Yaok yava sap phling lac sa kadha la gok agha, ka uranam, hatai pahadar atau caong takre diuk dalam ceik glai. Kayua ye nan, khen saranai oh janih ieu lac janih baoh phling ragam, blaoh tui mikva urang bangsa H’Mong daok hu pagap yau ye inem krung binguk yava di sa bangsa.

Gheng H’Mong hu angan di nyu nan ieu lac ragam ragu, gam lac kaya ragam ragu piah adaoh tamia. Urang nghe nhan oh lac yuk ngak tabiak sap yava, blaoh daok brei mboh bruk pambuak pagam lagaih haong dom thaik thaot ragam tamia biak gheih. Nan lac bruk hlai gam haong thuak yava, ragam saong thaik thaot.

Dalam labik prai iek di palei, sap khen hlai gam haong ragam tamia takai ngak jeng sa seni biak gheih meta. Urang maong yaom oh lac pang meng tangi, blaoh daok iek meng meta maong saong ragam yuh di labik tada, yau daok pang sap ceik glai.

Tui bangsa urang H’Mong, gheng daok lac sa binguk yava di dom bilan harei raya, ralo abih di dalam hu dom harei bingun Tet saong ban Pataih.

Di mblang taneh praong atau di tapen tada ceik ndung bak pandiak, thaik thaot dom urang likei gam tamia, gam yuk Gheng ngak jeng sa bruk gheih ghang di bhum ceik glaong gah Barak negar.

Dalam dom mbang darak akaok thun atau dom harei ngak adat raya adat akaok thun, khen daok lac bruk pambuak dam dara biak karei. Sap khen tuk sameng tagok, nyu gheih ghang yau sa panuac khin ndom di dom urang likei payua tal urang kamei drei anit ranam.

Tapa yaok sap yava phling, urang likei payua anit ranam, brei mboh khang catang saong bruk gheih mekre di drei. Kayua yau nan, rilo urang jeng daok ieu Gheng H’Mong lac sap ndom meng dalam hatai di dalam ceik glai.

Oh lac pagam haong hatai bui sambai, sap gheng daok rah tabiak dalam dom raya adat hu angan makna di urang bangsa H’Mong. Dalam adat lakhah caga, dalam ndam padhi, sap khen hu makna ba hatai menuac urang, pambuak menuac saong mukkei saong sa alam oh mbaoh di meta tui jalan sahaneng di bhap bini bangsa.

Harei ini, yaom lac raidiuk jaman bahrau daok nao tame dalam dom palei bhum ceik glaong, sap gheng H’Mong jeng khik hu labik hu makna dalam raidiuk ilamo bhap bini.

Rilo bhum palei hu ba ilamo seni tamia khen tame dalam dom danak dak jirah rivang, raya adat ilamo saong adaoh tamia piah yaih khan ilamo bangsa tal tuai damuai dalam saong langiu negar.

Dom bruk tamia gheng di angaok bhum mbuan ceik glaong cao nguyen patau atau di dom harei rija raya jeng hu ngak jeng prein dui pachreih ka jirah tuai damuai.

Min, bruk hu makna praong abih di nyu oh lac ndih di mblang adaoh tamia atau dom danak dak adaoh tamia, blaoh daok di bruk pato ka dom rai rah dam dara. Tuk dom urang dam dara daok bac yuk khen, daok thau ka makna di yaok sap yava phling, ye sap gheng nan jeng daok diuk dalam raidiuk bhap bini./.