Adat kakuh yang glai nan ieu lac sa di dalam dom adat prong abih dalam rai diuk di urang bangsa Giay, pambuak pagam haong hatai jia kakuh glai – labik hu mong yau ar thak diuk rai, me-om pacang saong pacang khik bhap bani manuac urang. Tui ilamo meng kan, adat bhian hu peih ngak dalam glai di puk palei, ala dom gha phun kayau prong jaik halau aia, labik hu makna biak praong glaong.

 Di blang taneh padang prai ieik binguk di Palei Ilamo – Rivang ma-in dom bangsa Viet Nam, binah ngak adat hu peih ngak biak siam gheih ngan haong bruk dang akaok di gru iew yang. Anak talam salao hu dom janih pandap yau ye pabui, menuk, baoh karaoh, har paneng, gru iew yang peih ngak dom adat cuh gilau, langkan likau daa po yang mai mong iek, caong mong sa thun bahrau angin siam hajan laghaih, ngak padai hu padai, pala tangeiy hu tangeiy, raong glaong hu cak rok patagok, rai diuk di bhap bani hu trei sil, salamat.

Klah rabha brei pang yaom di labik ngak nan, ong Chu Văn Lượng – Akaok duk Nghiep vu, Pasak Ilamo adaoh tamia tinh Lai Chau brei thau, adat kakuh yang glai hu meng lavik mai saong pambuak pagam haong rai diuk di bhap bani. Yaom lac dalam tukvak kan kandah, adat ini jeng hu peih ngak tui rilo jalan ngak karei di gauk.

Sa di dalam dom kadha biak karei di adat nan lac binah ngak yang tuk halei jeng rah tabiak dalam sa labik glai pakauk – labik biak ginreih di bhap bani. Tui hatai saneng di urang bangsa Giáy, ini lac labik daok di yang bhang yau nan ye tok hu dom urang ngak adat meng brei nao tame hu. Dalam tuk nan, binah adaoh tamia gilac peih prong, palaghaih piah ka bhap bani gam hu mbaok tame, ngak brei pambak prong yaom ilamo.

Adat kakuh yang glai bhian peih ngak dalam bilan hajan, tukvak hu makna ngan haong bruk ngak nong. Bruk caong khin ka langik tasik hu siam laghaih, padai brah siam that brei mboh talei pambuak bruk di anek manuac saong langik tasik taneh riya dalam rai diuk di bhap bani bhum ceik glaong. 

Tui ong Chu Văn Lượng, bruk ba adat cambat meng Lai Châu mai ban ine oh lac sa janih brei yaih khan janih ilamo biak karei di bangsa Giay blaoh daok ngak brei pambak prong dom yaom ilamo siam gheih biak karei. “Bhap bani bhum glaong tuk halei jeng caong khin dom kadha mbuan mbiah yau pren yava, jap karo salamat, tangeiy padai that siam piah grap tanat rai diuk. Nan lac makna di adat cambat tanarakun ini”.

Hadei di binah ngak adat, ye ar thak di labik peih ngak biak bui sambai chreih chai ngan haong rilo bruk ngak ilamo, adaoh tamia meng kan. Dom ragam tamia kadhik gheih mekre, tamia nduan biak salut mbut di urang kamei Giay gam haong dom kadha ma-in bhap bani yau taong kau blau menuk hu ba mai ar thak chreih chai bui sambai, pacheih bruk hu mbaok di rilo tuai damuai.

Bruk padang ngak gilac saong yaih khan adat kakuh yang glai dalam masa vaktu padeih ngak rija oh lac sa janih daong ka bhap bani thau cambaih jang ka hatai jia, adat cambat, tanarakun di urang bangsa Giay blaoh daok ngak brei paglaong akaok saneng khik ramik, patagok dom yaom ilamo meng kan dalam rai diuk harei ini./.