An Giang lac bhum palei hu rilo mikva urang bangsa Cam daok rai meng lavik di Tay Nam Bo tal ini hu labaih 21.000 urang tui ugama Islam daok daok win di 12 baoh sang megik dan saong 16 baoh surau. Dom thun tapa, bruk khik ramik saong patagok ilamo bangsa Cam tuk halei jeng hu tinh sangka iek praong. Langiu di bruk khik tani tanat dom tal pato sap ndom, akhar huruh, bhum palei daok brei kein lagaih piah bhap bini khik ramik dom adat cambat, raya adat di agama, khan ao bhap bini bangsa saong dom ilamo siam gheih karei.

 Ong Nguyễn Văn Hợp, Phaok Akaok UB Bhap bini xa Châu Phong brei thau, xa urak ini hu labaih 1.000 baoh sang urang bangsa Cam, daok rai di dua tapuk Phũm Xoài saong Azhak Châu Giang. Kuhria rah tapa yaok thun hu meng 250-300 anek saih urang bangsa Cam hu mbaok tame dom tal bac sap Cam oh mek jien. Bruk khik ramik sap ndom dan saong akhar huruh ieu lac bruk lagaih abih piah khik ramik ilamo bangsa Cam. Kayua yau nan, yaok rituh, bhum palei gam haong Mbang pasang khik iek Sang Megik jak ba rik daong jien dalam rahra, khik tani tanat bhian dom tal bac oh mek jien, dui pachreih rilo anek saih bangsa Cam tui bac.

Dalam xa Châu Phong urak ini hu labaih 20 tal bac huruh kadha ugama Islam. Anek saih bangsa Cam meng umo 6 thun ba tagok jeng tame bac, dom tal bac hu peih padang oh mek jien.

Piah brei kein lagaih ka dom adei tui bac megru asal kadha di aguma, dom tal bac bhian hu peih di var malam saong hu neh rabha tui rilo tal bac. Yaok adit dom adei anek saih hu padeih padei dalam malam harei som saong malam harei jip salih ka bruk padeih padei puac adit harei sanecar, harei adit yau tal bac pho thong.

Min tapi, bruk khik ramik ilamo bangsa Cam dalam bhum jeng daok rilo kan kandah. Dom urang thau dalam ka sap bahsa saong ilamo bangsa Cam dak harei dak daok takik; kapul urang gru pato daok lapih; harak gal pato megru biak oh ka hu ginup saong yasa; ndap nda kaya duh ka bruk pato bac daok rilo kan kandah jeng ye kurang…

Ong Mukh Tar, Hakim Sang Magik Jamiul Azhar brei thau, bruk bhap bini Islam tinh An Giang caong khin abih di urak ini ieu lac padang hu paok tapuk pato akhar huroh Cam tani tanat abih saong pato pakai kapul gru pato hu ilamo ka bruk piah paglaong bruk pato bac.

Anak dom kan kandah nan, tinh An Giang hu ngak saong daok peih rilo jalan langyah piah khik ramik saong patagok dom ilamo siam gheih di mikva bangsa takik, dalam nan hu bangsa Cam. So Bangsa saong Aguma tinh An Giang, daok salah blaoh dự thảo ka Sarak brei adat sarak karei daong urang pato sap ndom saong akhar huruh bangsa takik di dom labik aguma saong dom labik pato sap ndom saong akhar vak kayua bhap bini peih ngak piah ba tagok HĐ Bhap bini tinh.

Njauk ndom mayai lac dalam nan, dalam jalan kuhria patagok ilamo tukvak masa thun 2026 – 2030, An Giang brei caik dahlau bruk pacang khik dom janih drap ar mbuan kurang lahik; jhul khang bruk ngak taka angka so du lieu ilamo; daong urang jang ramagei saong dom urang tapak hu mbaok khik ramik drap ar; gam haong nan paatagok jirah rivang ilamo bhap bini pagam haong ilamo karei di yaok bangsa.

Khik ramik ilamo oh lac sa janih khik dom bruk siam gheih meng kal dalau mai di mukei, blaoh daok lac brei kein lagaih piah ka drap ar patui veik hu mbaok dalam raidiuk jaman harei ini. Gam saong urang bangsa Cam, yaok var bac megru sap bangsa, yaok talei akhar hu vak cih njauk, yaok kadha agal bac hu puac njauk jeng lac bruk khik ramik “binguk talang” di bangsa. Nan jeng lac bruk brei mboh siam gheih ka bruk kham merat di bhum palei dalam bruk khik ramik saong patagok ilamo bangsa Cam – sa banah oh kurang hu di dalam thaik thaot ilamo kaya mada di Viet Nam./.