Ngak adat kayua kapul urang nghe nhan mbon palei Tơng Jú, phuong Ea Kao peih ngak. Oh lac parang iek sa ilamo bhap bini, adat daok peih tabiak pabah bambang piah ka tuai damuai jirah thau tanat jang ka but pajaih gah amaik biak gheih karei di bhap bini bangsa Randaiy.

Tui adat bhap bini, hadei di bilan ngak apuh cakak blaoh, tuk padai bak gilang, alak hu rak blaoh, baoh sang srap gap ginup ka kaya ndap nda, dom urang kamei Randaiy nao duah urang likei drei anit ranam. Tuk duah hu urang likei, urang kamei khan saong amaik ame piah sang kumei tapa sang anek likei ngak adat kuhria puac.

Meyah dua gah njauk hatai, anek kamei brei nao daok di sang lakei pasang meng 1 tal 3 thun tui adat paguan sanya. Dalam tukvak ini maong yau ye tukvak piah urang diuk brei mboh bruk tari taring, thau ka amaik ame saong thau ka bruk di drei ngan haong baoh sang gah likei dahlau tuk raok pasang drei mai sang drei.

Tuk sang gah kamei salah blaoh ginup kaya ndap nda hu sanya saong abih tukvak daok di sang pasang drei, adat raok matau hu peih ngak. Di jalan raok matau mai, ayut cuai saong gauk gan gah kamei brei hu rilo mbang cakak jalan, lue kapuk raok matau. Khin patui veik jalan, urang likei brei alin hidiah sa baoh kaong ngak meng ban.

Mikva bangsa Randaiy sahaneng lac, dak rah tapa rilo kan kandah di jalan mai sang diuk drei ye rai diuk di diuk pasang hadei ini dak karo kajap, ginup prein piah truh tapa dom kan kandah dalam raidiuk. Baoh kaong meng kang oh tok lac kaya alin hidiah, blaoh daok lac panuac sanya ka bruk sa tung hatai di dua diuk pasang.

Tuk kapul raok matau mai tal sang kamei, taha palei ngak dom adat meng halei mai dalam bhap bini. Bruk ginreih abih lac adat likau phol. Taha palei pandar bangu gaor njuk tame jaluk kang padang ia blaoh sah tagok takai dua diuk pasang 3 mbang. Ini lac adat da-a yang mebang mai maong iek saong brei phol dhar thuk siam ka diuk pasang.

Hadei nan, taha palei jao alin brei caih tapai ka dua urang, cuk kaong tame tangin urang ngak diuk saong pasang anak bruk saksi maong iek di gauk gan saong rahra palei pala.

Baoh kaong ngak meng ban jeng sa bruk brei mboh ka bruk pambuak pagam kajap, kakei dua urang tuk halei jeng sa tung hatai, gam haong gauk ngak mbang, raong ba anek bik saong padang sa baoh sang hamiem phol.

Tui adat, meyah sa dalam dua urang bleik hatai atau ngak tayah tayac bha riya ye brei bayar gilac dom kaya adat di lakhah caga. Kayua nan, baoh kaong oh lac kaya janji sanya hu makna cambaih laih ka bruk di drei saong angan je.

Patui di nan, dua diuk pasang menyum ia caih tapai haong gauk, salih caih tapai ka gauk blaoh mbang huak haong gauk. Dom bruk mbuan mbiah nan payua panuac janji sanya brei gam haong gauk klah rabha dom bui sambai atau drut druai, gam haong gauk uak drei tagok, yaom lac ginup bak atau kan kandah jeng oh klak gauk.

Bruk ba adat raok matau tagok mblang papan ma-in iek oh lac daong khik ramik sa drap ar ilamo siam gheih di urang bangsa Randaiy, blaoh daok ngak jeng kaya jirah rivang ilamo meda prein dui pachreih./.