Dalam dom adat urang bangsa Dao Thanh Phán di Quang Ninh, njauk ndom mayai tal adat pok sarak cấp sắc, ong gru ieu yang saong urang likei dalam but pajaih ngak adat rilo mbang anak thaik duh paling yang. Abih di nyu nan lac, thaik cih thaik binguk Bàn Vương. Thaik binguk ini ieu lac Yang Asau long khuyển, lac drei asau 5 sambo bar rup ine girai, hu tal 12 iku, hu maong yau ye lac mukkei di urang bangsa Dao.

Langiu di yaom tanarakun, thaik duh paling daok hu bruk pato pakai, dalam nan hu sa gilang ilamo bhap bini biak praong. Thaik ndung dalam nan dom panuac kadha pato adat di urang bangsa Dao meng dahlau pagam haong sajarah halau agha, jeng yau dom bruk pambuak di menuac urang saong alam langik tasik, yang mebang saong dom caong takre dalam raidiuk.

Tui di nan, hu 3 yang mebang ginreih patrai, thraong daong pacang khik raiduk menuac urang lac Ngọc Thanh (yang pasang khik angaok langik), Thượng Thanh (yang pasang khik dunya), Thái Thanh (yang pasang khik lok ala). Gam tui di nan ieu lac rilo yang mebang ngak po yau ye: Ngọc Hoàng, Thái Thượng lão quân, Thánh chủ, Khai Thiên, Khai Địa, Thiên Lôi, La Sát gam haong dunya, yang mebang, po Bhik, kamalai saong lok ala…

Dom yang mebang nan patui adat dalam rahra, yang halei praong ye hu cih praong, hu labik di pasak, daok dom yang sit ye hu cih mbuan mbiah, thaik thaot sit. Langiu di nan, thaik daok hu thaik binguk lamein, asaih, hala dok payung lọng, hu bon nao tui duh bruk. Abih di nyu hu lac thaik duh paling yang hu cih rilo dom thaik, meng mbaok taneh tagok tal langik, meng ceik kraong tal tasik, meng lok ala saong tal suraga, patui akaok sahaneng meda di dom urang nghe nhan bhap bini.

Oh lac sa janih hu yaom kaom lac kaya ginreih blaoh thaik duh paling bhap bini di bangsa Dao Quang Ninh daok ndung dalam nan rilo asal kadha ka ilamo siam gheih. Paok thaik thaok bingula bhap bini hu brei mboh ka halau agha, luac jalan panduan saong brei mboh bruk Klau aguma daok tamo samu gauk (Phật giáo, Nho giáo, Đạo giáo) tdalam raidiuk daok dang duh yang mebang aguma di urang bangsa Dao Thanh Phán.

Meng kal dahlau, nghe nhan brei ta-eng ngak bi-ar dó blaoh pandar brah ndiuk pambuak haong kalik kabao kacaoh klik blaoh dom havait phun glai ba nao trong ka jru sit apui piah ngak tabiak janih pagam blaoh uak tagok bi-ar cih thaik. Piah ngak hu sa thaik cih, nghe nhan bhap bini brei lahik rilo bilan gaok mai sa thun. Urak ini, bruk srap gap dom janih bi-ar saong sambo cih thaik takik glaih glar jang kayua hu dahlau dalam darak pasar.

Thaik duh paling bhap bini tuk blei mai ye brei ngak adat duh paling biak rilo meyah hu dom baoh sang, but pajaih urang bangsa Dao Thanh Phán maong yau kaya kan sang danaok. Tui hatai sahaneng di Thanh Phán, thaik duh paling yang brei mboh bruk ginreih, pambuak tal bruk sron mbon salamat atau kan kandah di baoh sang, but pajaih. Kayua yau nan ye, dom urang nan ngak adat duh paling saong khik piah thaik biak tani tanat, oh tuel dalam sang yaok harei blaoh cang tal dom harei raya tet, harei pacip padhi, pok sarak cấp sắc praong meng hu ba tabiak pandar.

Urak ini, dom urang nghe nhan cih thaik duh paling yang di urang bangsa Dao Thanh Phán di Quang Ninh daok biak takik. Dom thaik barnrik daok bhuac, khut tayah, gaok mai njauk co klaik. Kayua yau nan ye, rilo baoh sang buh pajaih oh daok thaik duh paling tok daok dom kapul ong gruk ieu yang lac khik hu thaik. Njauk duh hatai abih lac meng bruk thaik duh paling bhap bini rah rah kurang lahik dui tui bruk kurang lahik di my thuat bhap bini saong praong jang lac ilamo gheih karei di urang Bangsa Dao Thanh Phán./.