Tapen baoh craoh di palei Khe Cát, xa Trường Sơn, tinh Quang Tri, sap talak di urang taha akaok palei angan Hồ Ai yava tagok biak bingi pang, ralai pagam haong akayat Sa Nớt – damneiy di urang bangsa Bru Vân Kiều. Di kreh glai praong, dom sap yava bhian pang oh lac sa janih brei mboh ka rai diuk ilamo biak karei blaoh daok ndung pagam hatai jia hu khik ramik tapa rilo rai rah bangsa bhap bini.

Tui urang bangsa Bru Vân Kiều, sap talak oh sa janih lac alat ragu ragam. Urang bangsa Bru Vân Kiều daok saneng lac, tuk sap talak yava tagok, dom panuac lankan di anek manuac meng nao hu tal po yang po lingik. Kayua yau nan ye, sap talak hu mbaoh dalam rilo bruk ngak adat cambat, harei roya, gam haong di nan nyu yau ye sa binah oh kurang hu dalam dom bruk ngak di rahra bhap bani.

Meng dom phun krem, phun laa di ceik glai Trường Sơn, urang bangsa Bru Vân Kiều ngak tabiak rilo janih talak karei di gauk. Talak Khui gam haong akayat Sa Nớt bhian hu pandar dalam rai diuk yaok harei, daok talak Pi, talak Sui nyu brei pambuak pagam haong dom bruk ngak adat cambat tanarakun.

Urang taha palei Hồ Ai klah rabha khan brei thau lac, kadha blaoh ong daok saneng kuhria nan lac meyah tal ranaih oh thau, oh haluh, ye dom hagait ong ame caik mai yau ye lahik abih. Kayua yau nan ye, ong tuk halei jeng halar hatian tacei pato ka taong abih ka thei caong khin bac megru, meng bruk palih ruah krem la-a, ngak tabiak mbaik talak tal ilamu yuk talak. Ini lac paok ndap di mukkei caik veik. Anek taco njauk thau, bac megru ka bahu piah khik ramik veik.

Dom kham merat di urang gheih tangin hu ba hatai pachreih brei ka rilo bhap bani dalam palei. Sa-ai Trần Văn Dự, daok di pelei Khe Cát, xa Trường Sơn brei thau, meng daok di sit sa-ai hu prong tagok gam haong sap talak di dom urang ma-in gheih. Urak ini, tuk rilo urang prong thun blaoh, ye bruk pato tacei ka tal ranaih hu jeng bruk ngak samar drah piah ka dom janih siam gheih ilamo di bhap bani Bru Vân Kiều klah di khat lahik nao.

Gam hu mbaok bac megru saong tacei pato, urang ghaih tangin Hồ Đài brei thau, sap talak nan lac inem krung hu yaom glaong di mukkei. Bruk taha palei Hồ Ai dang tabiak pato tacei ka anek kamuan oh lac sa janih daong khik ramik sa janih alat ragam ragu meng kan blaoh lac daok khik ramik gilang ilamu bhap bani di urang bangsa Bru Vân Kiều.

Tui ong Hoàng Trọng Đức, Phaok akaok UBND xa Trường Sơn, puk palei hu rilo pren khang cak rok patagok bruk jirah rivang ma-in bhap bani pambak tui asal ilamo di bangsa Bru Vân Kiều. Karja puk palei daok roh duah peih dom tal bac pato magru yuk talak saong dom janih ilamo meng kan brei ka dom rai rah ranaih, gam haong nan roh duah dom yaom ilamo ini piah dak padang ndap nda rivang ma-in biak karei.

Tui ong Mai Xuân Thành, Phaok Akaok So Ilamo, padhih saong rivang ma-in tinh Quang Tri, bruk bhap bani bangsa Bru Vân Kiều khik ramik hu sap talak meng rai dahlau tal rai ini ieu lac jalan khik ramik biak siam, khang kajap inem krung ilamu bhap bini.

Rilo thun tapa, bhap bani Bru Vân Kiều hu khik ramik dom yaom ilamo meng kan di bangsa drei. Oh lac sa janih brei khik ramik ilamu ngak tabiak, peih ma-in, bhap bani daok pambak prong sap talak tapa dom klup kapul nyaom ilamo bhap bani meng di dom puk palei. Meng dom bruk ngak ma-in bhap bani nan, sap talak daok hu pato jao brei tapa meng rai ini tapa rai diah saong meng rai dahlau tal rai ini, daong ka janih ilamo meng kan ini patui hu mbaok dalam rai diuk. Kreh rai diuk di harei ini, sap talak di urang bangsa Bru Vân Kiều jeng daok yava kreh ceik glai Trường Sơn yau panuac kakei brei thau ka halau gha ilamu./.