Urang bangsa Cam Hroi ieu lac hagar yau kayua tuk me-in tuk halei jeng hu yau, hagar tano saong hagar binai. Me-in hagar yau dreih yau bruk ndom meyai haong gauk. Me-in hagar yau bhian pambuak haong kong ba – ciang lima saong sap adaoh tamia bhap bini, ngak jeng kadha adaoh tamia ilamo biak karei di urang bangsa Cam Hroi.

Tui nghe nhan Nguyễn Chí Linh, palei Canh Lãnh, xa Vân Canh, hagar yau hu ngak meng rup kayau raoh dalam kayau, hu glaong labaih 54cm saong praong labaih 27cm.

Piah sap hagar brei ka nyu yava atah, urang Cam Hroi oh mek kalik kubao blaoh pandar meng kalik limo, atau kalik pabe pabang mbaok hagar. Kayua kalik limo jeng ye kulik pabaiy ini lapih, tuk paoh tagok sap hagar yava dui atah.

Dua urang me-in bak hagar di anak tung, dang anak gauk atau paying mbaok haong gauk, blaoh pandar dua palak tangin pah tame dom labik karei gauk di mbaok hagar ngak jeng dom sap ragam yava bangi pang. Dom ragam tamia hagar bhian hu paoh tui thaik thaot nao mai, bruk plaong nduac di athur, hlai haong sap gang ba ciang lima.

Ragam hagar nyu pambuak saong thaik thaok rup pabhap urang ma-in, ngak jeng ragam ragu biak chreih chrai. Sap yava di dua hagar pablak haong gauk, tuk baoh hagar ini padeih, hagar diah taong yawa, tuk hagar ini taong yava medeic medeic, hagar dia brei ragam drah samar, ngak ka urang pang yau ye urang daok ndom meyai dak baoh kadha di dua urang.

Nghe nhan Uu tu Nguyễn Thị Ngọc Hương lac sa urang kamei me-in main joi hagar yau, brei thau: Tui hagar yau, urang oh lac paoh hagar, me-in hagar. Tuk dua urang me-in hagar yau, drei meda thau hu hatai di dua urang nan: bui sambai, drut druai, su-uh su-uan, atau mbuah kan harao harit…Tuk sap hagar dan dan, hlai halui, anit ranam, brei mboh ka hatai anit ranam, samu haong gauk. Min tuk oh chreih gauk ye sap hagar catang yau ye urang masao. Kayua yau nan ye me-in hagar yau tuk halei jeng lac dua urang thau hatai sahaneng di gauk ka meng khik bruk bui sambai hu tani tanat”.

Hagar yau daok pagam haong dom malam raya di dom yut cuai yau likei kamei urang bangsa Cam Hroi. Urang likei paoh hagar piah brie khan panuac, urang kamei pandar hagar di drei piah javap chalei gilac. Tuk dua urang duah hu sap ndom dalam ragam, dua urang tamia haong gauk, menyum sa caih tapai dalam tanrak hadah mbuk apui, bruk bui sambai dui atah luac malam tal gram guh.

Jeng yau rilo drap ar ilamo bhap bini karei, tamia hagar yau di urang bangsa Cam Hroi daok dang anak bruk kurang lahik. Ong Nguyễn Chí Linh ndom lac: Hu tukvak, hagar yau tok hu me-in dalam dom harei raya praong di palei. Rilo ma-in hagar praong thun dak harei dak taha jua nao, rai rah urang dam dara urang uranaih sit umo ye takik tui bac, kayua seni ini oh lac brei hu prein yava blaoh daok brei hu bruk thau ka ragam, pandar tangin saong bruk thau ka gauk di dua urang me-in hagar.

Bruk bui sambai lac dom thun jaik ini, gam haong dom bruk pamedeih dom raya adat bhap bini, xa Vân Canh jeng sangka iek praong khik ramik seni hagar yau. Dom kapul adaoh tamia bhap bini patui veik hu khik tani tanat; nghe nhan hu brei kein lagaih pato ka dam dara, ba urang dam dara hu mbaok tame me-in dalam dom harei raya harei ilamo. Ong Nguyễn Xuân Việt, Akaok UB Bhap bini xa Vân Canh, brei thau: Khol dahlak tuk halei jeng pachreih dom urang nghe nhan urang thau ma-in hagar pato ka rai rah ka dam dara urang daok sit, gam tui nan brei kein lagaih piah dom kapul adaoh tamia di dom palei hu mbaok tame dom harei raya./.