Labik cek glaong Đưng K’Nớ bilan ini ia kakuan kapal ma-om jaik yau yaok harei malam. Dalam baoh sang kayau di pasak palei K’Nớ 1 di xa Đam Rông 4, sa-ai Bon Niêng K’Goh jeng ani tanat haong dom talei mrai piah mayim brei ka salah blaoh blah khan bai jih dalah blaoh hu urang kakei blei dahlau. Menek tabiak dalam sa baoh sang hu bruk ngak meng kal mai, menyim jih dalah jeng ndam gam lawik haong sa-ai meng daok sit. Hadei 20 thun karo kajap ngak bruk, tal ini sa-ai jeng sahaneng lac piah ilamo bhap bini ka khan bai jih dalah di bangsa drei oh kurang. Langiu di menyim, sa-ai jeng bac di amaik bruk nyaom khan bai meng tangin.

Dalam mbon palei Đưng K’Nớ, tapa yaok thun bilan, dom urang kamei thau menyim jih dalah oh kurang blaoh dak harei dak daok hu ralo jang. Dom amuk mei, dom amaik tuk praong thun pato jao bruk ngak ka rai rah anek taco, ha sit ha sit pabam hatai anit ranam jih dalah ka dom adei kamei dalam mbon palei.

Srap gap tukvak tadai kuan jua tuai, sa-ai kamei Bon Niêng K’Lang (51 thun, palei Đưng K’Nớ 1) jeng srap gap ba daneing tabiak menyim ka blaoh khan bai jih dalah piah payua nao ka tuai. Sa-ai kamei Bon Niêng K’Lang ndom mayai lac: "Kuhria rah tapa labaih 2 harei drei menyim blaoh sa blah khan bai sit, hadei nan brei pagam jeng sa blah praong. Sa blah praong pablei ka tuai yaom jien labaih 700.000 dong piah jhik khan ao cuk adaoh tamia. Mikva drei langiu bruk ngak kophi, ngak hamu ye bruk menyim jih dalah jeng daong brei jien mek tame. Drei menyim caik dahlau meyah hu thei blei ye drei pablei, hu oh ye caik di sang. Pablei hu khan bai ye hu jien bayar jien ndien, jien ia, pandar dalam raidiuk baoh sang.”

Dalam tuk raidiuk manuac urang daok tagok, mikva urang bangsa Cil jeng hu dom salih bahrau piah gam khik ramik, gam ba mai yaom kaom ka bruk menyim di bangsa. Di dalam mbon palei, langiu dom baoh sang menyim jih dalah, daok hu sang jhik khan bai jih dalah. Kaya lac dom blah khan ao, kadung teik… njauk haong raidiuk bahrau. Meng dom blah khan bai klak nao, mikva dalam mbon palei jeng bac megru bruk pandar dom khan bai nan, cakak jhik ngak jeng dom kaya yau ye talei kak mbuk, talei cuk tangin, nơ cuak di ao.

Sa-ai Bảo Dung (urang dalam kapul ngak pahla di Da Lat) daok duah pataom harak gal sajarah ilamu ka bruk menyim jih dalah di Đưng K’Nớ saong tacei ba mikva pasiam dom kaya kan meng khan bai klak nao. Tuk duah thau ka khan bai jih dalah di urang bangsa Cil, sa-ai kamei biak chreih takre haong dom bruk karei yau khan bai mbau pahe, bingula, sambo nyaom meng tangin saong jalan menyim biak tani tanat. Dalam harei hadei, sa-ai caong khin dak harei dak hu rilo adei sit hu pabam hatai anit ranam ilamo, jih dalah saong patui pasiam, hadah krah pandar jih dalah tame raidiuk. Bruk ini gam daong mikva hu jien mek tame, gam yaih khan hu kaya ndap nda nao tal rilo rahra, tuai damuai jirah.

Mbon palei Đưng K’Nớ daok di tinh lo ĐT722 bahrau salah blaoh jalan puac abih piah peih radaih nduac jalan Đà Lạt-Đưng K’Nớ-Đam Rông 4-Đắk Lắk. Ong Nguyễn Văn Quang, Phaok Akaok UB Bhap bini xa Đam Rông 4 brei thau bhum palei hu jalan pandar taong abih kein lagaih tuk jalan bahrau salah blaoh, rilo meng lac patagok kinh te, pandar drap ar ka jirah rivang ilamo yau bruk menyim jih dalah bhap bini bangsa, ilamo kong caing di mikva dom bangsa dalam bhum, dalam nan hu Đưng K’Nớ./.