Jabat Canh sat hinh su (PC02) Kong an Ban raya Ho Chi Minh brei thau tukvak jaik ini hu taduan rilo bruk ndom ka bruk njauk pachot pagat kakei blei bilik ndih daok, homestay atau blei harak ahaok par tapa mang xa hoi.

Bruk hu ngak rilo abih di urak ini lac dom urang padang dom fanpage, kapul di angaok Facebook, Zalo ja di dom kongti, dai ly jirah rivang hu angan je. Piah patagok bruk hu angan je, kol nyu buh tabiak jien piah yaih khan rilo ngan haong dom asal kadha piah “taong tame” bruk sahaneng di urang blei yau ye: “Pablei abih harak ve di tukvak puac abih”, “Combo tukvak ameh patrun yaom 30% - 50% dalam nan hu harak ahaok par nao mai saong hotel 5 patuk”. Kanjhah jhak jang, rilo blah web ngak mangak daok hu “tick hijao” piah ngak tantu atau tah angan fanpage jaik yau njauk haong dom angan je jirah rivang praong ngak ka rahra biak kan si thau.

Piah mek hu hatai je taong abih, dom kol bleik pandar yaok rituh tai khoan ja lau piah ndom meyai mayaom jitvu, gaok mai nyu pandar ilamo ngak kong ngak mangak dom harak bayar jien, harak kakei blei bilik ndih daok jak jeng.

Tuk caik dak jien takai (bhian meng 50% tal 100%/yaom kaom paok jitvu), dom kol nan cakak bruk pambuak tuk nan, kareik blah web di nyu saong lahik truh gam haong paok jien pagat hu. Rilo baoh sang katuak thau ka drei njauk chot pagat tuk nao tabiak tal mblang kapal ahaok par atau yam takai tal hotel min gah hotel khan lac… oh hu angan di majam.

Oh padeih di bruk pablei tui combo, bruk chot pagat brei pah homestay, sang praong ndik daok padeih padei “ja lau” di dom labik jirah rivang hot makre yau ye Da Lat, Nha Trang, Da Nang, Vung Tau… jeng daok rah tabiak biak srau kadau. Kol bleik daok mek taong abih thaik thaot, video clip di dom baoh homestay, villa gheih ghang di angaok mang blaoh ba tagok tame dom kapul nyaom ngan haong yaom biak lap. Tuk tuai damuai daok rabha tian, kol nyu srap gap payua harak mbaoh tangin brei pablei salih, harak kakei pah bilik ndih daok hu mbaoh inem bhong meraik (biak nao lac photoshop) piah mek hatai je. Rilo tuai damuai nao meng jalan atah meng tal labik ye njauk katuak tuk labik kakei pah dahlau oh hu biak, atau nan lac sang rahra bhian.

Piah hu sa bilan pandiak he 2026 bui sambai saong salamat, PC02 Kong an Ban raya Ho Chi Minh hu panuac kakei rahra brei oh ngak tui dom bruk yau ini:

Oh pang tui dom panuac da-a salam jirah rivang hu yaom lap oh yau bhian dut saong darak pasar.

Dahlau tuk bayar jien, brei srap gap pasang iek adat hukum di kongti. Nan taong phone tapak tal taka online di gah ahaok par, hotel atau resort piah ngak tantu gilac iek gah pablei hu kakei pah dahlau labik ka drei paje.

Njauk meyao meyit tapa dom blah website, ung dung hu tut angan haong Mentri Kong thuong atau dom gah pablei hu bilik harak ve, labik pablei tantu cambaih laih. Patakik abih bruk bayar jien takai tame dom tai khoan ta-eng menuac urang.

Patruh juai oh pabak thaik thaot CCCD, kat gilang pariak, ma OTP ka thei tapa mang xa hoi.

Meyah medil daok kanda gareik atau njauk gaok chot pagat, rahra brei thaot gilac taong abih tin nhan, bien lai chuyen khoan saong nao tal jabat kong an jaik abih piah khan, daong langyah tui adat hukum./.