Pahadar 79 thun Harei Thuong binh – Liet si ( 27/7), page ini ( 23/7), di Ha Noi peih Nyaom roya pahadar dhar phol urang ngak bruk daong taneh ia dalam thun 2026 saong peih bruk jhul pakhang kuhria ka urang ngak bruk cach mang. Dalam 310 urang ngak kat mang saong gauk gar urang liet si mai taom mbaok hu 19 Amaik VNAH, urang taha umo ngak bruk cach mang, urang jakar dahlau mesruh metak - dom urang di dom vaktu sajarah dakarai akok meti di cach mang Viet Nam, 27 Anh hung bol pal phao karaong bhap bini; njauk ndem tal 20 urang bangsa takik, mai meng 9 bangsa Tày, Nùng, Thái, Mường, Hre, Cơ Tu, Ca Dong, Pa Cô, Khơ Mú…

Tỉnh Tây Ninh birau mek mau ADN gauk gar di urang liet si saong duah pataom hu labaih 13.600 mẫu di dom kubor. Tui kuhria mboh dahlau harei 31/7 anak tal, tỉnh brei jao 8.000 mau ka Vien Han lam Khoa hoc saong Kong nghe Viet Nam langyah ADN. Dom mau daok veik brei pasang iek, kuhria tani tanat  dahlau mbang jao brei mbang ka 2. Bruk ngak blaoh gilang mau  sinh pham hu makna biak praong piah pasang iek, jhul pasamar tukvak duah thau angan di talang liet si oh ka thau, rik tame ba dom anh hung liet si gilac veik mai palei saong baoh sang di liet si.

Urang ngak nong tinh Vĩnh Long daok tame bilan yuak kuak padai Hè thu aval. Yaom lac kaya nong saong jien buh tame ngak daok glong, langik oh lagaih, min yaom padai tagok daong ka rilo urang ngak nong hu kein laba biak ralo hadei tuk yuak kuak. Urak ini, padai di hamu hu urang blei  meng 6.000 tal 6.4000 dong sa kilo ngan padai bhian; yaom meng 6.500 đồng tal labaih 7.000 đồng sa kilo ngan haong padai asar siam.Yaom ini, glong jang yaom kuhria rah tapa 3 bilan padai jiak ini di bhum taneran kraong Cuu Long.

Tinh Khánh Hòa urak ini hu 728 labik pato bac di karja, ngan haong labaih 26.500 urang jakar khik iek, gru pato saong urang ngak bruk. Jiak tame thun bac birau, Khánh Hòa  dak ramik brei pagam tame 248 labik pato bac di karja, sumu 34% dalam taong abih sang bac yau urak ini, khik brei takik abih 30% tui bruk ba tabiak di Rajaei saong UBND tinh. Langiu sang bac praong, dom sang bac sit brei khik ngak bruk di dom bilik chuc nang yau mac jamraih, tin hoc, gilang tapuk…piah pato bac hu siam. Dom sang bac  chuyen biet yau sang bac bangsa gam bac gam daok oh ka dak ramik.

Mban Pambuak Kapol bhum palei An Giang di TPHCM pambuak haong dom y, bac si, dom urang ngak pahala saong xa Tri Tôn birau peih ngak danak dak pasang iek prein yawa, brei jru oh mek jien ka bhap bini dalam xã. Danak dak ini, hu labaih 550 bhap bini, ralo lac urang bangsa Khmer  hu pasang iek prein yawa, sieu am, dut iek dien tim, pasang iek kalang, thaok X-quang, iek ruak meta…gam tacei pato iek prein yawa, brei jru oh mek jien. Mban peih bruk  daok alin 550 paok pandap, yaok paok  yam 300.000 dong, nan lac: brah saong dom kaya kan karei. Kuhria abih tih jien peih ngak danak dak jaik 220 trieu dong… 

Dom jabat ngak pahala di Lien Hợp Quoc harei kabroi 22/7 khan brei thau, bruk ngak gah bol lin dak harei dak catang di Israel, gam bruk sraw kadau saong panduan ba bhap bini, daok ba tal bruk diukrai di dom labik daok ginih ginong katil di Dải Gaza dak harei dak jhak. Jabat  Nhan quyen Lien Hop Quoc khan lac, dom mbang taong tame Israel rilo jang di dom harei jaik ini, tapak tame dom sang daok labik ngak bruk duh ka bhap bini saong dom bhum rilo rahra bhap bini. Tui jabat ini, takik abih 57 urang, dalam nan hu urang kumei saong uranaih plang lahik dalam adit tapa.

Harei ini 23/7, Jabat roh duah ngak tabiak kapal ahaok vu tru Nhat Ban (JAXA) brei ngak iek mac jamraih di sa janih ten lua jhul janih sit di rai birau saong ngak hu jak jeng siam mekre.  Hadei ngak hu blaoh mbang ini, JAXA langyah tantu piah thau bruk salamat di tal menyek ka 2, piah kuhria caga  cuh ve tinh  dalam thun ini. JAXA kuhria ba tame ngak bruk mbang akaok meti piah ba ve tinh di Viet Nam tagok quy ndao.

Thuong vien Mỹ birau khan tapa sa hukum piah khik catang dom jalan piah cagar takik dom labik ngak oto  pambuak tal Trung Quốc, dalam bruk kham merat pacang dom doanh nghiep Trung Quốc pablei radaih pajeng tuai negar Mỹ kayua khik tani tanat palei negar. Meyah brei khan tapa, ini lac sa dalam jalan ngak catang abih di Mỹ piah takik gaok kan kandah di Trung Quốc ngan haong gah ngak kong nghiep oto negar ini./.