Di bingun pahadar 79 thun Harei thuong binh - Liet si (27/7) di bein bangu Liet si Dốc Bà Đắc, tinh An Giang rah tabiak Adat pok bangu, cuh galau nyang pahadar dom Bol lin krah bijak. Hu mbaok di adat hu lambaok di Mentri Kong an saong labaih 500 lambaok vakil lac bol lin meng kal, dam dara halan tian, urang gauk gar liet si, urang jakar, kapul lin pan phao karaong saong urang ndoan, dam dara dalam tinh An Giang saong Quan khu 9. Dalam bruk praong prang di bilan 7 ginreih, dom lambaok brei minit pahadar, pok bangu, cuh tapang den pahadar di labik pahadar saong di yaok kubo piah brei mboh hatai thau dhar phol tal dom Bol lin krah bijak.

Hadei tuk ba khaw tin saong thaik binguk dom drap ar duah mboh dalam tuk mek mau ADN di Kubo liet si Trảng Bom, Ban Chỉ huy quân sự phường Trảng Bom, Ban Đồng Nai taduan hu rilo panuac khan veik di dom baoh sang urang. Dom kaya kan hu duah pataom nan: 2 talei ka-ing; sa kalaoh ia hu sarak angka akhar saong angka so; sa baoh album thaik binguk kapol urang kumei gam sa urang likei dam ngui cuh khan ao lin, me-om tamo lin. Hadei tuk ba khaw tin saong thaik  binguk tagok mbao saong mang xa hoi, rilo bhap bini duah mai jabat chuc nang, camereip duah mboh thaik bingu urang dalam album lac gauk gar liet si di sang drei. 

Biar harei kaboi 23/7, xa Long Sơn (Ba Ria – Vung Tau klak), Ban raya Ho Chi Minh pambuak haong dom gah ngak pahla peih bruk jao jien pakajap sang danaok ka 2 urang duh paling bol lin dalam bhum. Kapul hu jao 130 trieu dong ka urang gauk gar bol lin Châu Văn Tòng (palei 1) lac urang daok duh paling Amaik Viet Nam anh hung Kiều Thị Kép saong Liet si Châu Văn Lâm, daok di palei 2 lac baoh sang ong Lê Vĩnh Trung – lac kamuan daok duh paling Liet si Lê Văn Mài. Di harei nan, xa Long Sơn jeng peih 10 kapul mai rivang, alin kaya dom baoh sang duh paling Liet si, Amaik Viet Nam anh hung, thuong benh binh…dalam bhum.

Page ini harei 24/7, kapol urang jakar kayua Thiếu tướng Trần Văn Xuân, Phó Chính ủy Cảnh sát tathik Việt Nam peih bruk Salam ala hala dok di boong gilai Cảnh sát tathik 8001. Ia harei tuk page pasang  hadah, kreh tathik hangin, taong abih urang jakar, urang lin saong dom urang lambaok mai ngak bruk ngui cuh khan ao, meta mong tapak hala dok Negar di tabung glong angaok gilai Cảnh sát tathik 8001. Salam hala dok di kreh tathik gam hala daok bhong meriak patuk kanyik par di hangin ngak hadar kanal miat dalam hatai urang jakar mai ngak bruk.

Tinh Dak Lak bahrau peih nyaom biai pambuak pacang caga bruk oh lagaih, bala, kan kandah saong duah urang gaok bala thun 2026. Tui jalan ngak, dom jabat, labik dalam bhum srap gap jak ba labaih 24.000 urang jakar, bol lin gam haong labaih 35.000 radaih, ndap nda kaya piah ngak bruk panduan rahra, daong rahra saong pasiam bruk kanjah di bala tuk hu bruk rah tabiak. Dom kapul patui veik ngak bruk “4 di labik”, pambuak khang haong pakat uy, karja palei piah khik kajap langyah samar, siam lagaih, oh jhul bruk ka gauk atau klak tapa labik bhum.

Di Nyaom biai Tri tue nhan tao dunya birau peih bruk di Thượng Hải, Trung Quốc ngak tabiak sa robot hu thaik thaok biak karei pagam baoh radaih saong “takai athaik” akaok meti di dunya. Robot ini kayua kong ty Run Robotics hu labik ngak bruk di Thượng Hải. Ini lac robot daong tri tue nhan tao AI, meteh rup angaok megei yau tangin manuac, meteh rup gah ala hu 4 baoh radaih trun tagok nao mai di jalan tapak, tagok takai nyal, jalan ceik glong biar saong mbaok ia khan.

Mentri An ninh Negar My brei thau, kuhria rah tapa yaok harei hu labaih 1.300 urang hu ba tame dom labik kareik, tagok 32% dut saong bilan 4, bilan akaok meti Mentri An ninh Negar My Markwayne Mullin dang bruk ngak bahrau. Ini lac tanut glaong abih kuhria meng thun 2021 saong brei mboh bruk ngak hukum panduan tame dalam negar My daok patui veik hu peih praong. Mentri An ninh Negar My brei thau jabat ini daok ngak njauk panuac sanya di Tong thong Donald Trump dalam bruk brei caik dahlau bruk mek kareik saong patiaok tabiak dom urang panduan mai daok ngak suan hukum.

Harei kabroi 24/7, Canada kuhria caga bruk ngak salah tatua dunya Gordie Howe tapa kraong Detroit, pambuak haong Mỹ. Danak dak caong khin brei jhul pakhang bruk ngak mbang pablei salih  di dua gah saong peih praong jalan nao mai di bhap bini dua negar. Tatua Gordie Howe atah 2,4 km hu 6 jalan radaih, kuhria tui jien  buh tame ngak labaih 6,4 ti USD brei peih radaih meng harei 27/7 anak tal. Yau nan min, harei ngak adat ba jalan tame ngak bruk dalam tuk dua taneh ia  kandah gauk catang…