Ndom meyai di Nyaom biai pahadar urang daong bruk katmang meng kal dalam negar di harei kabroi, Thu tuong Lê Minh Hưng suhsah ka 175.000 liet si oh ka duah mboh, 230.000 bol lin daok oh ka hu thau cambaih angan saong hu ndom lac: Bruk halan tian klak rup drei di rairah dahlau hu miat miat sarak tame dalam sajarah ameh di bangsa. Thu tuong pandar peih ngak “Danak dak 500 harei malam” roh duah, pataom saong ngak tantu angan atau talang liet si; salah blaoh samar drah bruk padang sang ka anek pajeng di urang hu mbaok mesuh pacang khamang njauk njom janih ia hoa hoc. Jhul khang dom danak dak “Bayar phol dhar”, raong sangka Amaik VNAH; gam haong nan patagok pandar ilamo kong nghe, salih taka so dalam pato megru bruk anit ranam taneh ia ka rairah sit umo.

Di danak dak pambuak papar  binguk “ Duah veik angan” kayua Jabat Harak mbao saong Papar binguk TPHCM peih ngak di melam kabroi, sa dalam dom bruk biak druat druai  tuk baoh sang liet si Huỳnh Văn Quên taduan thaik binguk hu cih veik hadei jaik 60 thun mong akaok. Thieu tuong Vũ Văn Điền, Tư lệnh Bộ Tư lệnh TP.HCM saong Thiếu tướng Tạ Văn Đẹp, Phó Yam ndoc Kong an TP.HCM hu alin thaik binguk cih veik liet si Huỳnh Văn Quên brei ka amuk Nguyễn Thị Lệ - urang kumei birau brei angan kumei di liet si. Luac  dom pluh thun tapa, kayua oh hu thaik binguk liet si Quên, baoh sang caik blah Sarak Karja Negar meyaom.

Tinh Dong Thap daok salah blaoh dom harak gal piah peih ngak Danak dak Buh jien tame padang saong pablei salih ket cau ha tang Labik ngak kong Tân Phước 1. Ini lac labik ngak kong ka 2 di bhum Dong Thap Muoi kayua Kongti Co phan IDICO Tien Giang ngak gah buh jien tame. Jalan ngak danak dak lac buh jien tame saong pablei salih co so ha tang ilamo ky thuat labik ngak kong. Labik ngak kong Tân Phước 1 nao tame ngak bruk brei gam haong labik ngak kong Long Giang daong patagok kinh te – xa hoi di bhum Dong Thap Muoi.

Tỉnh Cà Mau brei daong taong abih jien hu mbaok tame nyaom darak pasar, parang iek thiak binguk tal 20 trieu dong sa mbang dalam negar saong 100 trieu dong sa mbang di negar langiu ka dom kapol nyaom, HTX. Yau ye, tinh daong bayar abih jien padang labik parang iek, peih ngak danak dak pato pakai, pabak ilamo; oh mek jien taong abih harak tai lieu bac megru; tui nan daong jien nao mai, mbang huak sumu 1,5 mbang jien bilan biar abih ka urang di HTX, urang ngak tuk hu mbaok tame  dom tal bac dalam negar.

Piah paglaong ilamo saong srap gap ilamo pacang caga mblung ia ka uranaih thun umo tieu hoc, Kong an tinh An Giang pambuak Sang bac pakat Dunya GIS peih danak dak pato luai ia saong srap gap ilamo pacang caga ka jaik 60 anek saih tieu hoc di sang bac. Di danak dak, urang jakar bol lin hu tapak tacei ba anek saih dom ilamo mbuan mbiah piah ta-eng pacang khik asal rup drei tuk ngak bruk dalam labik ia; dom ilamo luai ia mbuan mbiah, bruk palao ndong angaok ia piah khik suan thuak yava tuk gaok kan kandah, abih di nyu nan lac mblung ia dalam bilan hajan ribuk di bingun pandiak he.

“Cap mek abih cih kol pachot pagat online nan oh lac bruk ta-eng di taneh ia halei, bo njauk brei sanya gam pambuak bruk ngak sumu yau gauk di dalam bhum saong dunya”. Ini jeng lac kadha  khang kajap birau ba tabiak dalam mbang taom gaok Thu tuong Campuchia Hun Manet saong Yam ndoc  Cục Điều tra Liên bang Mỹ (FBI) Kash Patel di ban ine Phnom Penh. Mbang ngak bruk  nan sa mbang tra brei mboh bruk kham merat di Mỹ dalam bruk daong Campuchia taong tayak dom kol duis  kong nghe glong tapa dom negar.

Dom jabat harak mbao chi praong abih Australia bahrau ieu dom kongti tri tue nhan tao bayar jien ka jabat mbao chi kayua hu pandar asal kadha mbao chi dalam luac jalan pato pakai dom ndpa nda kaya ka urang pandar. Dom kongti tri tue nhan tao brei tut angan pambuak bruk haong dom jabat mbao chi Australia piah hu brei adat pandar dom kadha di dom jabat ini. Urak ini yaok adit hu labaih 10% urang tame chatbot piah puac khau tin, dalam nan hu 16% ka urang ala 35 thun.

Gah Y te Dunya ( WHO) khan lac, jit ruak Ebola tamuh tabiak di bilan 5 meng blaoh, ngak metai lahik labaih 1.000 urang di Congo saong Uganda. Dom urang njom ruak hu duah mboh di Uganda ralo meng lac bhap bini Congo tapa negar, negar  ini khan brei thau klau adit  oh hu urang ruak birau. WHO birau khan brei thau dom bruk ngak hu siam dalam jru taong ruak, hu rilo bruk ngak iek tui dua jalan jru ruak./.