So Bangsa saong Agama tinh An Giang birau peih bruk pathau khan, pambak praong ka adat hukum, agama thun 2026 ka jiak 150 urang halau janeng, urang ngak bruk saong urang tu hanh dalam tinh. Di mbang nyaom ini, dom urang lambaok vakil hu langyah makna Sarak 25-NQ/TW di BCH Trung uong Dang mbang IX ka bruk ngak di agama; Hukum Adat cambat, agama thun 2026 gam dom sarak tacei ba ngak tui. Tui nan, ngak tui Sarak di Rajaei ka bruk pasang iek di karja bhum palei dua pakat gah gah bruk ngak ka bangsa, adat cambat, agama.

Quan khu 9 harei kabroi hu peih Nyaom biai jhul pakhang bruk ngak tui “ Bruk ngak 500 harei melam kuac duah, pataom saong duah thau angan di talang liet si”. Trung tuong Hồ Văn Thái, Bí thư Đảng ủy, Chính ủy Quân khu dang tabiak peih nyaom biai. Mbiah tal ini, dom kapol K di Quan khu 9 duah, pataom hu 433 atau talang liet si di Campuchia saong dalam negar, tui nan duah hu 2 angan liet si dalam negar. Bingun ini, Quan khu 9 alin Harak meyaom 3 kapol nyaom ngak bruk naih joi abih dalam tuk peih ngak “Bruk ngak 500 harei melam jhul pakhang bruk kuac duah, pataom saong duah thau angan talang liet si”.

UBND tinh Ca Mau birau ba tabiak bruk buh jien tame ngak Danak dak Jalan 500 kV LNG Bạc Liêu - Thốt Nốt. Ini lac danak dak ha tang nang luong praong di gah merang negar, pataom hu kabaih 8.275 ti dong. Danak dak Jalan 500 kV LNG Bạc Liêu - Thốt Nốt hu peih ngak oh lac daong pabak ndien khang ka dom bhum bo daok lac daong langyah hu kadha pabak ndien, jhul pakhang bruk cakrok patagok kinh te - xa hoi dalam bhum tanran krang Cuu Long.

Lac labik diukrai di labaih 730 baoh sang urang bangsa Cam, palei Lâm Giang lac sa dalam dom bhum palei ngak mbang cakrok patagok kinh te – xa hoi bhum urang bangsa takik di xã Hàm Thuận Bắc, tỉnh Lâm Đồng. Dom thun jiak ini, meng bruk buh jien tame ngak di Karja  gam bruk daong di bhap bini, mbaok meta palei pala dak harei dak hadah hadai. Ta-eng thun 2025, palei ngak hu 1km jalan tuh betong kayua “ Karja saong Bhap bini daong gauk ngak”, dalam nan bhap bini rik tame hu labaih 340 trieu dong. Tui nan ngak hu 1,5 km jalan nao mai di mblang hamu, ba mbuan lagaih  ka bruk pala drak saong nao mai di mikva.

Dalam tukvak padeih padei di bhum palei, mboh bhap bini gaok ndien handok, Hạ sĩ Kpă Thiệp, lin Trung đoàn 28, Sư đoàn 10, Quân đoàn 34, oh huac bala blah tame daong. 2 urang hu daong diuk, min urang lin ini plang metai. Hadei di nan, UBND xã Chư Sê, tỉnh Gia Lai alin harak meyaom ka Hạ sĩ Kpă Thiệp oh huac metai lahik piah daong ka urang; Urang jakar saong bol lin  dalam Bollin 34 peih bruk jak ba urang rik daong baoh sang Hạ sĩ Kpa Thiệp. Bruk var klak rup drei di Hạ sĩ Kpă Thiệp lac kareih camin  ka hatai hatung praong ka urang karei brei mboh  thaik binguk di “Bol lin Wa Hồ” dalam bhap bini.

Mỹ sanya haong ASEAN daok brei mboh bruk ngak, dom paok jien daong, pabak dom jalan daong an ninh…Ini lac bruk brei mboh di Akaok metri Ngoai giao Mỹ Marco Rubio di Akok Mentri Ngoại giao ASEAN saong Mỹ di Manila, Philippines harei ini. Tui Ngoại truong Rubio, Mỹ sanya daong khik brei salamat dalam bhum tapa paok jien daong jaik 130 trieu dola ka dom taneh ia ASEAN dalam bruk pasang duah mbom min saong pakhang bruk an ninh nang luong dalam bhum…

Tui sarak dak angan pathau khan di harei kabroi 21/7, 500 doanh nghiep dang kaok Trung Quoc kuhria taong abih hu labaih 14 ribau ti USD dalam thun 2025, meblah hu jaik 3/4 Taong abih kaya ngak tabiak dalam negar (GDP) bruk ngak kinh te ka 2 di dunya. Tui nan, 3 doanh nghiep karja dang akaok dalam sarak, hu Kapol Ndien Pakat negar Trung Quoc ba akaok, patui di nan lac Kapol xang menyek  Pakat negar Trung Quoc saong Kapol ngak menyek Trung Quoc.

Rilo taneh ia daok jhul pakhang bruk pandar ung dung AI piah samar duah tahu dom bruk ngak bleik saleik saong takik khat lahik di bhap bini. Nhat Ban lac sa dalam dom negar nao dahlau ka bruk “ cảnh sát AI”. Dalam tuk dom mbang pachot pagat nga payo meyut meyau saong ngak ja canh sat ralo, Sở Cảnh sát tỉnh Osaka yaih khan Aiko – nan lac “ canh sat AI dang akaok” ngak bruk tapa YouTube piah daong ka bhap bini thau ka bruk pachot pagat.