Pahadar 79 thun Harei Thuong binh – Liet si (27/7) Ban raya Can Tho bahrau peih rilo danak dak pahadar dom Amaik Viet Nam anh hung, baoh sang sarak saong urang hu daong katmang meng kal. Akaok UB Bhap bini Ban raya Can Tho Trương Cảnh Tuyên hu rivang tangi prein yava, raidiuk daok dang saong payua panuac thau dhar phol ka dom bruk var klak rup drei, daong biak praong di dom baoh sang urang daong bruk meraik kham marat mek hu bebas di bangsa negar, yasa taneh ia jeng yau dalam bruk padang saong patagok palei pala; gam haong nan brei mboh, bruk sangka ka dom baoh sang sarak lac adat “Menyum ia hadar tal halau”, lac bruk ginreih saong uranam praong dalam di rairah harei ini.

Kong an tinh Lam Dong pambuak haong dom don vi peih bruk taduan labaih 1.500 mau sinh pham ADN di gauk gar liet si piah padang ngak co so du lieu pakat negar duh ka bruk duah thau angan talang liet si. Bruk mek mau hu peih ngak sumu gauk di 16 labik dalam tinh Lam Dong saong 3 kapol nyaom urang ngak bruk tal sang di dom Amaik VNAH, gauk gar liet si umo taha, prein yawa oh kajap atau kan nao mai.

Tinh Dong Thap daok samar drah ngak pato tacei di Thu tuong Rajaei ka bruk ramik caga labik pato megru mam non, pho thong, pato megru bhian saong pato megru bruk ngak pakat karja tinh, pakat xa. Tui ong Nguyễn Phương Toàn, Phaok Yam ndok So Pato Megru Dong Thap, gah pato megru tinh brei ngak ramik caga tui jalan yaok xa, phuong tok daok sa sang bac di yaok pakat bac, kham merat patrun takik abih 30% urang jakar ngak bruk pasang iek. Sa sang bac meda hu sa labik pasak saong rilo phan hieu karei; yaok sang bac hu sa Gru dang akaok saong dua Gru Phaok akaok…

95 urang bac lac urang jakar Kapol urang kumei pakat bhum palei di tinh An Giang  daok pabak ilamo, bruk ngak di kapol nyaom, pabak ka bruk karja dua pakat. Urang bac roh duah dom kadha sahaneng di Dang ngan ka bruk ngak gah urang kumei; bruk ngak di Kapol urang kumei Viet Nam  hu mbaok tame padang karja bhum palei dua pakat saong patagok bruk ngak kinh te - xa hoi; bruk pataom urang kumei, patagok, khik iek urang hoi; peih bruk jak ba “ Padang baoh sang 5 oh, 3 hacih, 3 salamat”.

Rilo xa, phuong di tinh Khanh Hoa daok peih bruk pasang iek prein yava yaok tukvak, pasnag iek halang oh mek jien ka rahra. Danak dak pamaong tal jalan ngak tal abih thun 2026, 100% rahra hu pasang iek prein yava takik abih sa mbang. Bac si Lê Văn Khoa, Yam ndok So Y te Khanh Hoa brei thau, danak dak oh lac daong rahra hu tapak pandar jitvu pasang iek prein yava oh mek jien blaoh daok daong duah mboh aval ka ruak hakik, patakik jien taong ruak, dak harei dak salah blaoh harak gal prein yava ndien tu dalam rahra.

Gilang khik piah drap ar Louvre danei angan di Pháp hu peih pabah mbang di Jabat parang iek Apollo ka tuai damuai rivang iek hadei 9 bilan kareik pabah mbang kayua co klaik dom mrang tuah akaok di Prang kuhria tui jien 102 trieu dola tapa nan brei mboh bruk kurang khik iek tani tanat di gilang hu rilo urang mai rivang iek abih di dunya. Hu padang meng jaman patao Louis XIV, Bilik parang iek Apollo lac sa dalam dom bilik sajarah dakrai danei angan di gilang Louvre. Dom kaya kan lahik oh kaduah mboh.

Darak malam Ánh Sao di ban di ban Cảnh Hồng, Trung Quoc hu ieu lac darak malam praong abih Dong Nam A, dui pachreih labaih 35.000 mbang tuai damuai yaok harei. Darak urak ini hu jaik 3.000 tadai kuan saong 300 gah pablei sit, brei labaih 6.000 bruk ngak. Yaok thun, darak raok hu labaih 10 trieu mbang tuai damuai, mek hu taong abih jien meyao meyit labaih 1 ty nhan dan te. Labik ini lac labik danei angan piah cuak film, peih danak dak me-in bui sambai saong cuak thaik binguk jirah rivang…

Rajaei Thái Lan birau brei tapa jalan ngak bruk drah samar, pabak hukum piah jabat chuc nang meda pacang cakak atau atah klak dom asar kadha jhak di angaok mang chip, salih ka bruk lahik rilo harei yau dahlau diah. Ini lac jalan ngak drah samar dalam tuk blah web  saong jalan link jhak dak harei dak rilo, hu yaok ribau urang duah mboh, pacang cakak, rik tame padang bruk pandar online angka so hu siam lagaih./.