Harei ini,  Uy ban Thuong vu Quoc hoi nyaom biai ka 2, pasang iek, khan tapa Hukum ramik pasiam, pabak dom paka di Hukum Pagam tame harak van ban phap luat. Di nyaom biai, Akaok Quoc hoi Trần Thanh Mẫn khan brei thau bruk praong, piah sumu ramik pasiam dom hukum ka lagaih haong bruk rah tabiak, ba tame ngak tui Harak  tamat di Trung uong ka bruk ramik hukum, pabak tui hatai caong khin patagok di taneh ia dalam samar birau. Akaok Quoc hoi jeng ndem catang ka bruk praong lac oh caik kandaong harak gal hukum,  juai ngak padeih bruk hukum karja.

Dalam tukvak suai lavik, ikan pra di tinh Dong Thap khik tani tanat di tabung glong. Urak ini, urang blei yaom meng 33.000 - 34.000 dong sa kilo. Ngan haong yaom ini, yaok kilo ikan pra ba mai kein laba jaik 10.000 đồng, ini lac yaom glong abih dalam 3 thun tapa. Dong Thap raong ikan pra pablei tabiak negar langiu ralo abih di Bhum taneran kraong Cuu Long, hu labaih 2.500 ha raong, rik tame labaih 35% ikan pra dalam negar.

An Giang hu taneh pala padai praong abih di Bhum taneran kraong Cuu Long, padai ngak tabiak jaik 9 trieu tấn. Tui bruk ba tabiak, tal thun 2030, An Giang kham merat ngak hu labaih 351.000 hecta padai hu tame Danak dak 1 trieu hecta padai asar siam, takik tathuak nerak. Bruk peih ngak Danak dak patagok khang kajap 1 trieu  hecta padai asar siam, takik tathuak nerak ini lac jalan ngak hu makna praong piah ngak veik gah padai brah di tỉnh An Giang.

Tỉnh Cà Mau birau ba tabiak bruk caong khin po glai, bhum palei saong dom don vi pambuak tal pakhang dom jalan khik brei salamat ka bruk pacang apui khuah, padam apui mbang glai bilan thu. Dalam nan caong khin dom don vi jhul pakhang bruk pathau khan jak ba bhap bini paglong jalan sahaneng pandar apui di yaok urang, baoh sang daok dalam saong tapen glai mbuan apuuh khuah; pakauk cuh njuk ram dang, cuh danko, man patauk athur suan hukum. Urak kuhria abih tih taneh glai mbuan apui khuah mbang labaih 50.000 hecta. 

Meng akok thun mbiah tal ini, yaom rilo manuk saong baoh manuk ada di dom tỉnh Dong Nam bo trun ralo. Yaom manuk gà tre di TPHCM yaom meng 60.000-65.000 đồng/con, daok di tỉnh Đồng Nai, Tây Ninh, manuk bilau bingu yaom meng 42.000-45.000 đồng/kg. Baoh manuk jeng trun meng 1.100 -1.200 dong sa baoh sit, dalam tuk nan jien buh tame ngak meng 1.600 -1.650 dong sa baoh. Tui dom doanh nghiep raong glang, bruk laik yaom kayua rilo doanh nghiep jak gauk ngak mbang pablei salih meng raong manuk mek rilo tapa  mebaoh, dalam tuk nan takik urang blei.

Gah urang jakar Indonesia chap mek 321 urang negar langiu pambuak tal bruk ma-in mbia online  suan hukum di Jakarta. Ini lac sa dalam dom bruk chap mek  praong abih di taneh ia ini piah chap mek dom urang ca cuoc tap online suan hukum. Kapol ini  duah mboh baoh sang pablei salih jaik Chinatown di Jakarta, labik dom urang pasang iek khan veik lac pasak nan  hu labaih 70 blah web ma-in mbia online, piah pamong tal urang ma-in langiu negar Indonesia.

Ấn Độ daok pasang iek hu 4 urang dalam sa baoh sang di bang Maharashtra metai kayua hadei mbang tamekai hu jru takuh. Dahlau di nan, baoh sang ini hu 9 urang tuai mbang kaya biryani. Hadei tuai damuai nao sang, tal mon 4 tuk page, 4 urang  dalam baoh sang mbang tamekai. Mbiah 5 mon page, urang glaok ta-ok, pandik tian saong aih caraoh. Tapa pasang iek jakar phap  y mboh jru mek dalam baoh tamekai. Urak ini, jru nan tame baoh tamekai oh thau yau halei.

Hadei meteh bilan pagui mek di Đại Tây Dương, gah bol lin pacang kol duis dunya chap mek hu bruk pajeng matuy praong labaih 9,5 tấn katak cần sa meng Mỹ Latinh tapa chau Au. Jabat canh sat chau Au khan lac bruk chap mek hu dom kapl pablei matuy  pajeng ba cocaine meng dom labik di Mỹ Latinh tapa chau Au tapa dom bruk ngak “ pajeng ba sraw kadau di jalan tathik”./.