TPHCM ngak salah blaoh bruk lang talaih atau tacei pato langyah 838 danak dak. Tapa nan peih brei labaih 206.000 ti dong saong jaik 17.000 hecta taneh di dom danak dak  piah samar ba tame ngak bruk. Ngan haong dom danak dak  kan kandah, tavak tame bruk langyah di dom mentri, jabat Trung uong, UBND TPHCM jeng kham merat pambuk haong dom don vi langyah tui tham quyen.

Ban raya Dong Nai hu 12 labik kubo liet si hu labaih 23.000 kubo urang. Tapa pasang iek, hu jaik 7.800 kubo liet si oh ka thau angan je njauk brei mek mau pasang iek duah thau ADN tui  jalan ba tabiak di Dang, Karja saong Mentri Quoc phong. Piah kuhria caga  bruk ngak ini, Mban tacei ba 515 Ban raya Dong Nai pambuak haong dom so, dom gah  brei pasang iek taong abih dom kubo, tavak du lieu, pagam taka định dang gam khaw tin  tagok mac jamraih.

Hadei tuk dak ramik pagam, tinh Ca Mau kuhria daok 817 palei, puk paga trun labaih 41% dut saong urak ini piah ramik hanjol njiac  bruk karja saong paglong bruk khik iek hu sia lagaih. Gam haong bruk dak ramik puk palei, dom bhum palei pasang iek hu jiak 3.800 urang ngak bruk oh chuyen di bhum palei. Urak ini hu jaik 1.800 urang caong khin  ngak bruk veik, hu labaih 2.000 urang caong khin padeih bruk piah mbang tui sarak daong di karja.

Kong an tỉnh An Giang pambuak UBND xã Hòn Đất pathau khan, pambak praong hukum ka bruk khik salamat jalan mbak saong tacei pato urang peih radaih salamat ka labaih 300 adei anek saih di dom sang bac dalam xã. Tapa pathau khan tapak, ngak pachreih urang gam ndem biai nao mai, ba tabiak panuac khan meyai, tapa nan daong ka dom adei  paglong jalan sahaneng, ngak tui hukum jalan mbak, rik tame padang ngak ilamo jalan mbak dalam anek saih.  

UBND tinh Tay Ninh birau ba tabiak bruk peih ngak Danak dak pakat negar ka bruk khik dom janih  athur  glai jaik lahik abih, daok biak takik brei khik caga. Dalam nan, tinh pataom tame peih ngak dom danak dak khik janih athur; pakhang bruk ngak di dom po glai; peih bruk pasang iek di dom pabik hu makna praong mbuan rah tabiak bruk ngak suan. Tui nan pakhang bruk pacang, caga  dom bruk man patrauk, chap mek, pablei, pajeng ba suan hu kum athur glai.  

Urak ini, dom sang bac dai hoc di Australia daok dang anak bruk ngak tapa prein tuk anek saih yaok tal bac dak harei dak rilo ngak kan kandah tal bruk pato saong bac. Bruk nan, ba tal anek saih oh taduan hu dom bruk daong meng gru pato luac tukvak bac megru. Ini lac bruk ngak tui sarak cakak trun jien padai di rilo gah pato megru piah pajum jien tame ka gah pato tui STEM, duh ka bruk ngak ka harei hadei.

Di ban Yên Đài, tỉnh Sơn Đông - lac sa dalam dom labik pala madar ralo abih di Trung Quốc, dom urang roh duah daok pandar ka sa robot papaok baoh jadar meda. Robot ini ngak hu abih bruk papaok baoh madar salih ka bruk ngak meng tangin yau dahlau diah. Yaom lac, kong nghe urak ini daok dalam tuk ngak iek min daok peih tabiak jalan ngak brei ka urang pala abih takik prein yawa.

Gah Khi tuong Dunya khan lac bruk El Nino rah tabiak meng bilan 6 tal bilan 8 thun ini. Tapa nan, ngak tagok dom bruk kan kandah kayau langik saong hajan oh njauk  bilan di dunya. Tuk rah tabiak EL Nino, langik panjiak rah tabiak di Tay Phi, di Sahel, Nam Phi, Australia saong Đông Nam Á. Daok di dom labik karei yau Đông Nam di Mỹ saong abih di nyu lac bhum taneh jaik Thai Binh Duong hu hajan. Yau nan ye, dom labik karei meda gaok kan kandah karei di gauk./.