Ban uy Ban raya Ho Chi Minh bahrau pandar padang kapul dam dara halan tian “Bilan he taka so”. Tui nan, bruk “Bilan pandiak he taka so” brei jak ba 4.200 dam dara halan tian, ngak bruk tabung glaong meng 31-5 tal 15-8, di 168 phuong, xa, kaoh pulao di bhum; khik kajap yaok xa, phuong hu takik abih 20 urang ndoan, dam dara halan tian bilan pandiak he yaok mbang khik iek. Dom dam dara halan tian daong pasiam bruk karja, paglaong siam lagaih bruk duh rahra di dom phuong, xa, kaoh pulao.

Tỉnh Dong Thap hu labaih 1.900 urang ngak bruk oh chuyen pakat xã. Urak ini, tinh samar peih ngak, parabha bruk ka urang jakar oh chuyen pakat phuong, xã salah dahlau harei 31/5 ini. Mbiah tal ini, taduan hu 183 urang jakar oh chuyen pakat xa tame ngak bruk pakat xa. Yau nan min, dalam tinh hu labaih 1.700 urang jakar 0h chuyen mbuan lahik bruk ngak.  

Di tinh Ca Mau hu 5 danak dak ndien angin praong hu mbaoh tangin ka jalan buh jien tame ngak min jeng daok dalam bruk “oh ka ngak”. Dalam nan hu dom danak dak: Sanh mac ndien angin Japon – Bac Lieu, ca Mau 1C, Ca Mau 1D, Đông Hải 3 saong Đông Hải 13, hu taong abih jien buh tame ngak tagok lagaih 18.000 ty dong. Dahlau bruk ini UB Bhap bini tinh, pandar dom danak dak hu khik kajap ginup dom kein lagaih ka hukum brei samar chip peih ngak suai abih lac dalam bilan 7 ini.

Hadei tukvak trun lap ralo, yaom durien di bhum taneran karaong Cuu Long daok tagok gilac, kuhria rah tapa tagok meng 10.000 tal 15.000 dong sa kilo dut saong adit dahlau. Ong Võ Tấn Lợi, Akok Kapol urang durian tinh Dong Thap brei thau, yaom tagok oh ka ralo min brei mboh brui uan tabuan hadei tukvak suai lavik baoh durian  trun lap. Yau nan min, bhap bini brei caik hatai ngak tabiak baoh tui tanut chuan, khik ka baoh hu baoh siam saong ma taka so bhum pala hu tani tanat.  

Urak ini bruk raong kiuk mek ralaow dalam hanyol danao atau danao lang tamra hu rilo mikva urang ngak nong di ban raya Can Tho ngak tui. Tui rilo urang ngak nong, kiuk raong tui bruk ini hu labaih 2,5-3 bilan, hu trak meng 3-5 drei di sa kilo. Tui yaom pablei meng 35.000-50.000 di sa kilo, hadei tuk kaoh abih jien buh tabiak ngak, urang raong hu laba meng 15.000 dong/kilo ba tagok. Bruk ini hu ngak tabiak jalan nao bahrau ka urang ngak nong, daong patruh eik patrun kathaot, parilo jien tame.

Jalan pasei Trung Quoc - Lào birau hu labaih 100 ribau mbang peih pajeng ba. Ini lac bruk ngak hu makna praong di danak dak Pahadah  jalan Vành đai saong Jalan, gam brei mboh bruk pamong tal pambuak biak siam dak harei dak praong di Trung Quoc saong ASEAN. Dalam jaik 5 thun tapa, bruk ba tame pandar jalan pasei  tagok rilo samar. Tuai damuai ndik radaih yaok bilan hu labaih 600.000 mbang dalam tuk birau peih ngak tagok labaih 2,25 trieu mbang, glong jaik 4 mbang. 

Dua drei ikan ong ka-ing gu bahrau ngak ka gah roh duah katuak tuk ngak bruk panduan labik diuk rai atah labaih 14.000km di Brazil saong Australia, truh tapa rilo tasik saong mek hu ky luc bahrau ka jalan panduan hu taduan mboh di janih ini. Dom urang roh duah ndom lac bruk brei thau ka bruk langik salih karei, salih jalan ia nsuac saong bruk salih halau kaya mbang meda lac makna ngak ka dom ikan salih jalan panduan di nyu.

Langik panjiak mai aval saong catang  di ralo labik di dunya, meng Paris, Madrid mai Ấn Độ saong Việt Nam. Di Pakistan saong An Do hu yaok ribau  urang metai kayua langik panjiak. Dom urang ilamo kakei dahlau brei pagam pambuak “labik panjiak”, El Nino saong langik salih karei oh lagaih meda ngak ka balan hè thun 2026 jeng sa dalam dom bilan hè panjiak catang abih meng lavik mai./.