Rajaei bahrau brei adat sarak ka anek saih sang bac pho thong gam daok gam gac saong sang bac pho thong gam daok gam bac di dom xa tapen negar. Dalam nan brei adat daong yaok anek saih jien mbang kreh pandiak jala di yaok bilan lac 450.000 dong saong 8kg brah. Yaok anek saih gam daok gam bac hu daong jien mbang huak yaok bilan lac 1.170.000 dong 15 kg brah. Langiu di nan anek saih gam daok gam bac hu daong jien blei khan ao saong kaya bac megru, hu pabak phui men saong kaya pandar.

Piah ba mbuan lagaih ka dom adei anek saih bac pakacah, meng akaok bilan 5, karja xã Mỏ Cày, tỉnh Vĩnh Long brei ka bhap bini saong dom labik kuan karaoke, labik pataom gauk adaoh dalam tinh brei ladam trun, takik adaoh tuk uranaih bac piah khik brei kandang ka anek saih bac pakacah. Brei peih ladam yawa trun, atau takik adaoh, daong ka anek saih bac da-a hu siam. Sa jalan diukrai ilamo dalam bhap bini daok klak rabha dalam bhap bini, tapa bruk thau sahaneng ka urang karei. 

Dalam 3 bilan akaok thun meng blaoh, kapul Canh sat jalan mbak Ban raya Ho Chi Minh hu duah mboh saong taong bhat labaih 84.000 urang ngak suan ka bruk siam mekre, salamat di jalan mbak njauk taong bhat tapa maong gilac cameera. Dalam nan majam AI saong pasang iek jalan mbak hu taduan labaih 4.000 bruk ngak suan. Bingun ini Kong an Ban raya Ho Chi Minh jeng gam gam pasang iek dom labik pablei salih, pasiam saong dom “labik” ngak karei radaih di bhum piah pacang caga bruk mbuan lahik bruk salamat jalan mbak saong patuh apui mbang.

Danak jalan mbak tapen tathik, tapa tinh Dong Thap, pambuak tinh Tay Ninh saong Vinh Long, hu padang ngak dalam quy I thun 2027. Kuhria jien buh tame labaih 7 ribau ti dong, meng phun jien mesre di Gilang Patagok chau A(ADB) gam hang phun jien di karja. Luac jalan nan hu padang 5 baoh tatua, dalam nan, tatua Bến Chùa atah labaih 2km lac hu makna praong abih, tapa pabah ribaong Tiểu di kraong Tien pambuak bhum. Jalan ini ngak salah blaoh peih tabiak jalan praong tame tathik  di bhum Taneran kraong Cuu Long.

Di bhum raneran kraong Cuu Long rah tabiak gam gam rilo mbang jaleih taneh, rilo bhum palei lahik taneh, khut tayah ha tang saong ngak kanjah jhak tal sang danaok rahra tapen kraong. Anak bruk rah tabiak ini, dom bhum palei bhum taneran kraong Cuu Long daok peih tabiak rilo jalan langyah piah lagaih haong bruk glut jaleih. Anak meta, kapol chuc nang patagok bruk pasang duah dom labik laman lamuac mbuan glut jaleih glaong, klauk ralaoh kakei caga ka kan kandah. Tal suai atah, gah chuc nang daok ba tabiak panuac likau buh jien tame dom jalan ar pacang khang kajap di dom jalan kraong ia dalam nduac khang, rilo meng lac labik hu rilo rahra, gam haong nan paglaong bruk tui iek bruk rah tabiak di jalan ia kraong nduac saong glut jaleih piah srap gap pacang caga.

Toa an tinh Kampot di Campuchia brei thau bruk daok guk  di 6 urang Trung Quoc. Dom urang pametai manuac biak trak saong pachot pagat  padang tui kapol nyaom. Bruk pambuak tal metai di sinh vien Han Quoc di tinh Kampot di bilan 8 thun 2025. Tui harak gal, urang gaok kol nyu pagat ba tapa Campuchia  tui panuac da-a ja, hadei di nan kateik gheik ba tame pasak pagat online. Bruk nan bhian ngak manuac sia Han Quoc  haduh hatai saong ngak kan kandah dalam bruk pambuak haong Campuchia dalam bruk taong tayak kol pachot pagat tapa ralo negar.

Mỹ, Mexico saong Canada hu ba tabiak dom bruk pambuak gauk ka y tesaong pasang iek bruk nao mai ngan haong dom urang mai meng dom negar chau Phi mbuan njauk jit ruak Ebola, piah pacang khik prein yava bhap bini dalam tukvak rah tabiak Yai Caoh balaong meraik Cup Dunya– World Cup 2026. Dalam bruk ndom meyai, klau negar po sang di World Cup thun ini brei mboh bruk salamat saong prein yava di rahra lac bruk brei caik dahlau tuk Bac My raok salam urang chreih takre caoh balaong mai meng grauk labik dalam dunya.

Kraong ia khang  puac abih di Indonesia, di bhum Tây Papua, daok dak harei dak takik saong mbuan lahik abih dalam dom thun anak tal. Dom urang ilamo kakei dahlau, bruk lahik dom kraong ia khang oh lac jhak ka alam moi truong bo daok lac lahik oh gilac veik hu dalam bhap  bini pak ini. Dalam tuk Baoh taneh  panjiak  tagok meng 1,4 ndo C dut saong tukvak dahlau  kong nghiep, kraong ia khang  di dunya daok trun veik, ngak kurang ia saong kurang kaya mbang./.