Khang hatai brei mek veik harak adat meyah mboh bruk ngak suan

Anak bruk rilo labik pablei xăng menyek tuan akhar lac “Abih xăng” kayua kurang labik pabak xăng menyek, Akok mentri Công Thương Nguyễn Hồng Diên iew padang kapol thanh tra piah pasang iek taong abih, pasang iek dom D.N praong blei xăng menyek meng negra langiu tame, dom D.N parabha, dom labik pablei lẻ xăng menyek dalam negar. Akok Mentri Công thương ndom lac, khang hatai brei mek veik harak adat meyah mboh bruk ngak suan. Meyah gah khik iek darak pasar tỉnh, dom sở công thương oh caik hatai, atau ngak oh abih bruk jeng brei langyah, meda brei padeih bruk ngak.

Pasang iek bruk peih ngak dom danak dak pacang dauk ia di angaok jalan roya di labik gah merong meng bloh, ong Nguyễn Xuân Cường, Phó akaok Tổng cục jalan mbak Việt Nam brei thau, abih tih jalan roya di bhum taneran krong Cửu Long njauk duak brei langyah lac jiak 33km song meda ngak salah bloh dalam bilan 5 anak tal. Urak ni, dom po padang ngak danak dak hu peih bruk langyah tong abih 41 labik dauh ia di angaok jalan roya. Dom danak dak langyah pacang dauk angaok jalan roya di bhum taneran krong Cửu Long lac danak dak hu makna chính trị, xã hội prong, rik dong khik ramik jalan mbak dalam tuk vak hu ia ndik tagok glaong, palagaih ka bhap bini.

Tui Sở Lao động – Thương binh saong Xã hội TP.HCM, urang ngak gilac veik mai ban raya ngak bruk hadei di tuk padeih Tet nguyen dan lac 96% ngan saong labaih 1,9 trieu urang, glong jang dom thun dahlau. Urak ini, dom gah yau: pablei salih, công nghệ thông tin, jhik menyim, kalik taghaoh, ikan hadang… khin hu urang ngak. Daok tui Mban khik iek dom Khu chế xuất – Khu công nghiệp TP.HCM, dalam thun ini, dom D.N dalam Khu chế xuất – Khu công nghiệp caong hu 51.000 urang ngak. Dalam nan, urang ngak phổ thông lac glong abih ngan saong labaih 35.000 urang, urang ngak hu ilamu lac labaih 12.000 urang saong urang ngak bac đại học lac 3.400 urang.

Piah pachreih bruk pakacah gauk ngak bruk meng di akaok thun, UBND tỉnh Tiền Giang bahrau peih bruk padang ngak 2 danak dak prong lac: tatua Vàm Cái Thia song tatua nao tapa krong Mỹ Đức Tây (huyện Cái Bè). 2 tatua ni hu ngak meng bê tông cốt thép, lagaih ka bruk nao mai, pajeng ba pandap panda di bhap bini. Dalam thun bloh, yaom lac kan kandah di jit Covid-19 min Tiền Giang hu padang ngak rilo tatua, jalan mbak song labik ngak bruk di karja, song yaom jien buh tame ngak abih tih dom rituh tỉ đồng song ngak siam bruk peih brei phun jien đầu tư công.

Tui Tổng cục Thủy lợi, Mentri Ngak nong saong patagok palei pala, tui kuhria ia mbak njom tame di Bhum taneran kraong Cuu Long meda tagok rilo dalam dom harei tal. Di labik dom pabah kraong Cửu Long, meng ini tal bilan 3 ia mbak meda njom tame dalam meng 50 tal 65 km. Hu dom tukvak meda ngask kan kandah tal bruk mek ia di dom kraong ribaong. Di bhum Đông Nam Bộ, urak ini, daok tame bilan pandiak bhang, tui kuhria mboh dahlau ia di dom binek tal puac bilan 2 daok labaih 75% ia dalam binek. Tui nan jeng daok ginup ia ka bruk pala drah ngak nong bilan Đông Xuân 2021 – 2022, ta-eng binek Suối Vọng, tỉnh Đồng Nai mbuan kurang ia.

Tổng thống Mỹ hu panuac sinya pacang caga tanut pandar cai tagok glong di Mỹ, lac bruk ngak ka gah kinh tế dang akaok dunya dang anak bruk lạm phát glong di abih dalam 40 thun tapa. Pathau khan di mintri Lao động Mỹ brei thau dalam harei 10/2 mboh lac, tanut pandar cai tagok 7,5%, tagok khang dut song bilan 1/2021. Jien pah sang, điện song pandap mbang jeng tagok, hu mong lac makna ngak ka tanut pandar cai di Mỹ tagok glong. Bruk ni, kateik greik oh sit ngan song tanut jia tame di bhap bini brei ka Tổng thống Mỹ Joe Biden.

Kapol caoh mbanh taneh ia Indonesia brei klak pakacah giải vô địch U 23 Đông Nam Á 2022 meda peih tabiak di Campuchia di adit hadei. Liên đoàn bóng đá Indonesia brei thau, bruk klak oh pakacah di kapol caoh mbanh lac kayua kapol caoh mbanh negar Indonesia urak ini hu 7 urang caoh saong 1 urang jakar njom Covdi-19, langiu di nan, hu 4 urang caoh mbanh daok brei pa-atah. Tổng thư ký Liên đoàn caoh mbanh Indonesia brei mboh hatai damen tuk oh hu mbaok tame pakacah giải, saong ini lac bruk langiu hatai caong khin.

Kayua kan kandah di jit prong COVID-19, uranaih dalam umo 6 song 7 oh thau puac song thau vak di Brazil tagok 66%. Ni lac bruk glong di abih meng di thun 2012, tuk vak negar ni peih bruk yaok pataom uranaih oh thau haroh. Bruk ni, jeng biak njauk huac kanda ka dom taneh ia dok gaok kan kandah trak kayua jit prong COVID-19 yau Brazil. Tui dom urang gah pato pakai, bruk dom sang bac dalam taneh ia njauk kreih pabah mbang piah pacang caga jit ruak, ngak cuang kandah khang tal dom anek saih hu rai duik kan kandah. Bruk gilac mai sang bac di dom adei ni lac biak bier./.

Urang lang: Hani Pha – Bhumi – 12/02