Anak bruk hu rilo khau tin pambuak tal bruk blei sang daok rahra, So Padang Ban raya Ho Chi Minh brei kanal hadar, rahra tok tui iek, khau tin meng gah hu angan je meng jabat chuc nang saong UB Bhap bini pakat xa phuong piah plaih bruk pang khau tin oh njauk meda ngak khat lahik ka jien padai. Rahra brei ngak cambaih laih drei daok dalam kapul urang halei piah ngak bruk pathau khan ka njauk. Ban raya ho Chi Minh ba tabiak jalan ngak patagok labaih 199.400 baoh sang daok rahra dalam tukvak thun 2021-2030.

Meng ini tal thun 2030, Ban Can Tho ngak hu salah 16.900 baoh sang daok xa hoi, ta-eng thun ini brei ngak salah 3.000 baoh sang. Urak ini, Can Tho daok khik iek 21  danak dak sang daok xa hoi di rilo nyaom kapol karei di gauk. Yau nan min, bruk peih ngak dom danak dak daok kan kandah yau: ngak suai; dom danak dak sang daok tavak tavaiy dalam bruk pasang iek hukum, harak gal jao brei taneh, kadun tukvak peih ngak danak dak…

Tinh Ca Mau bahrau brei tapa danak dak ramik caga taong abih, padang gilac puk palei dalam tinh. Dalam nan brei patagok 13 xa mek hu tanut chuan jeng phuong. Bruk padang dom phuong bahrau oh ngak salih taneh, rahra atau taong abih labik karja di tinh. Taphia haong bruk tagok phuong, tinh Ca Mau peih ngak jalan ngak taong abih ramik caga gilac majam puk palei tui tanut chuan ka bruk dom baoh sang rahra bahrau.

Tỉnh Lâm Đồng birau peih bruk Ngak danak dak “ Bilan he taka so” thun 2026 ngan haong kadha “ Bruk ngak bilan hè taka so gam haonh VneID, tacei pato bhap bini taka so, pagam pambuak bhap bini peih ngak Danak dak 06”. Dalam bruk ngak, dom kapol nyaom  kong nghe so bhap bini meda hu “ tame tal dom baoh sang bhap bini, tacei patao yaok urang” hu pandar kong nghe so. Tui nan daong bhap bini peih ta khoan định danh pakar 2, pandar siam lagaih dom ung dung VneID.

Nyaom darak Pablei salih Dunya Tịnh Biên – An Giang mbang ka 18 bahrau peih pakak di malam 4/6 di phuong Tịnh Biên pataom labaih 260 tadai di dom gah ngak mbang pablei salih mai meng Viet Nam, Negar Campuchia saong CHDCND Lao. Thun 2025, taong abih bruk pablei tabiak langiu negar tapa pabah bambang tapen negar di tinh An Giang hu jaik 1,3 USD. Dalam nan, Tịnh Biên oh lac pasak pajeng ndap nda kaya hu makna, blaoh daok lac mata njauk hu dalam bruk ngak mbang tapa negar.

Sa kapol roh duah sarak ta-eng di Mỹ kuhria mboh rajaei lien bang meda tavak sre tagok tal 41 ribau ti dola meng puac bilan la-ar tal kreh bilan hè thun 2027, ba tal Quoc hoi My brei kuhria iek patagok atau pacang cakak jien sre plaik njaik tavak sre oh bayar hu. Dom urang ilamo kinh te kakei dahlau bruk Mỹ oh tagok jien mesre atau pacang tavak sre njauk tukvak meda ba tal bruk laik di sre oh ka bhian gaok.

Canh sat Sri Lanka brei thau hu takik abih 12 urang metai saong 7 urang njauk rambuac dalam mbang apui mbang praong rah tabiak di sa labik raong urang taha kayua ta-eng menuac urang peih ngak di negar ini di harei 3/6 meng blaoh. Tukvak rah tabiak apui mbang, labaih 70 urang praong thun umo daok hu mbaok dalam labik ini. Po peih padang labik raong urang taha njauk mek kareik. Gah karja taong yaom ini lac sa dalam dom mbang apui mbang ngak bala trak abih di negar kaoh pulao ini dalam tukvak jaik ini.

Langik panjiak thu lagu ngak ka bilan yuak kuak khat lahik saong huac kurang kaya mbang di chau Á. Tui dom urang ilamo, mbang pandiak bhang El Nino catang dalam tukvak anak tal meda ngak langik panjiak jang. Jabat khi tuong An Do daok kakei dahlau  hajan dalam bilan hangin dui atah 4 bilan, pabak labaih 70% hajan yaok thun. Di dom taneh ia Dong Nam A, langik thu lagu  ngak padai saong menyek cọ khat lahik di dom labik./.