Meng thun ini, 100% anek saih dalam negar brei hu pasang iek prein yava atau halang ruak hakik takik abih sa mbang yaok thun. Ini lac bruk naih gheih dalam Danak dak Prein yava dalam labik bac megru tukvak meng 2026 tal thun 2035. Jalan ngak piah paglaong asar siam, siam lagaih bruk y te sang bac saong dom bruk pathau khan, pato megru, pacang khik, sangka, pasang iek prein yava dalam dom labik pato megru piah khik kajap kein lagaih piah urang bac megru patagok taong abih; daong ngak dom jalan ngak, jalan langyah ka bruk cakrok samar ka gah pato megru, paglaong bruk pacang khik, sangka saong paglaong prein yava Rahra.

Mbang pakacah THPT thun ini, Ban raya Can Tho hu jaik 35.000 anek saih tut angan pakacah, hu 80 labik pakacah saong 80 labik caga piah pakacah; hu labaih 5.000 urang jakar, urang tui iek bruk pakacah, gah kong an, y te, urang khik iek gah langiu sang urang duh bruk pakacah. Ban raya Can Tho jeng brei caga hu rilo bruk daong anek saih, piah hu rilo mbuan lagaih  abih ka dom anek saih hu sahanang hatai  pakacah. Tui dom jalan khik iek tani tanat, jalan mbak salamat, y te, pacang caga bruk apui khuah patuh di dom labik pakacah jeng hu kuhria caga blaoh blai siam mekre.

Bo Pato tacei Bol lin tinh Lam Dong hu padang jalan ngak saong caga kapul daong po buh jien tame ngak, gah thầu padang ngak samar drah salah dua danak dak sang bac pambuak pakat di dua xa tapen negar di tinh. Tui nan, kapul bol lin thuong truc, bol lin rahra thuong truc di Bo Pato tacei tinh Lam Dong brei ba drei tame daong padang dua sang bac pambuak pakat di dua xa Thuận An saong Quảng Trực. Kuhria, brei hu labaih 200 urang ba drei tame ngak meng harei 8/6 – 15/8 anak tal.

Gah Y te tinh Vĩnh Long daok pataom prein rilo gah tame piah ngak hu abih bruk ba tabiak tal puac thun ini 100%  bhap bini hu dut iek prein yawa saong ngak harak khik iek prein  yawa dien tu. Dalam bilan 6, bilan ngak bruk daong uranaih, dom labik y te pataom tame iek ruak oh mek jien ka bhap bini saong brei pabak Vitamin A ka uranaih.  Dom bruk ini rik tame  ngak brei patrun takik uranaih lavang lavaih, ba mbuan lagaih ka uranaih hu sangka prein yawa siam jeng meng tuk daok sit.

Bruk ngak jirah rivang di tinh Dong Thap patui veik hu lagaih, dak harei dak jeng gah kinh te hu makna di bhum palei. Dalam bilan 5 meng blaoh, dom labik, labik jirah rivang raok labaih 820 ribau mbang tuai damuai, taong abih jien mek tame kuhria hu 440 ty dong. Njauk caik hatai lac, dom bhum palei hu sangka iek praong bruk pandar kein lagaih bruk ngak nong, abih di nyu nan lac kinh te bein, piah patagok jirah rivang. Raya Baoh kayau tinh Dong Thap mbang ka I daok rah tabiak hu caong khin brei daong dui pachreih rilo tuai damuai mai jirah rivang, ba drei tame saong rivang me-in bhum taneh caraih Bhong.

Mbang pakacah palih ruah anek saih ndai hoc yaok thun di Trung Quoc peih ngak meng harei 7/6 hu jaik 13 trieu  anek saih tut angan tame. Piah pacang caga bruk anek saih andar camin thông minh dalam tuk pakacah, rilo bhum palei brei thau bruk pasang iek catang bruk dom anek saih cuah camin tame bilik pakacah. Mentri Pato megru Trung Quốc kakei dahlau bruk ba ndien thoai di dong, dong ho thong minh, cong cuh tangin thong minh, camin thong minh...tame bilik pakacah lac suan hukum.

Dalam bilan 5 meng blaoh Tay Ban Nha hu labaih 100 urang metai pambuak tal bruk pandiak bhang. Ini lac bruk glaong abih kuhria meng thun 2015. Mentri Y te Tay Ban Nha ndom khang lac dom kanjah di pandiak bhang ngak kan kandah tal prein yava di meng dahlau tuk bilan pandiak di ban cau Bac hu tame bilan. Majam pasang iek bruk metai yaok harei di Tay Ban Nha kuhria, meng 2015 hu labaih 27.000 urang metai kayua pandiak bhang.

Kong ty kong nghe Home Harvest di Anh kuhria brei tabiak rai dom janih pala  njam patam dalam sang, brei ka urang pabam njam meda, njam salad saong dom janih phun kayau di angaok kik kapal ging. Rilo phun pala meda paik hadei 8 harei. Urang palih ruah janih phun pala tapa ung dung di phon tangin. Nhiet do saong pasang hadah jeng brei salih lagaih tui yaok janih phun pala, daong phun khik hu dinh duong glong./.