Page harei ini, ong Nguyễn Phước Lộc, Akok Ủy ban MTTQ Viet Nam Ban raya HCM gam kapol urang lambaok vakil cuh gihluw pahadar saong rivang dom bol lin daok kuac duah pataom atau talang liet si di Bein bingu Lê Thị Riêng. Hadei cuh gihluw blaoh, dom urang jakar mai labik kuac duah talang liet si rivang, jak ba dom bol lin kham ngak bruk. Ong Nguyễn Phước Lộc caong khin dom gah bol lin brei tui khik, ngak bruk tani tanat saong khik brei salamat dalam tuk kuac duah.  

Kong an tinh An Giang pambuak Cục Cảnh sát khik iek salamat xã hội - Mentri Kong an saong Kong ty GeneViet peih bruk taduan mek mau ADN ka 204 gauk gar di urang bol lin oh ka thau angan je. Yaok baoh sang liet si brei pabak 2 mau ADN di urang sa hatian ralo darah haong gauk piah dut iek du lieu talang liet si. Tui bruk ba tabiak, mbang ngak bruk tabung glong ini Kong an tinh An Ginang peih bruk mek mau ADN di 3.800 gauk gar liet si oh ka thau angan je dalam tinh.

Ban raya Dong Nai hu 19 danak dak sang daok ka urang jien mek tame takik  daok peih ngak, kuhria labaoh 12 ribau baoh sang. Ralo lac danak dak jaik dom labik ngak kong nghiep, pataom ralo urang ngak…rik tame khik tani tanat sang dak di urang jien mek tame takik. Ban Dong Nai brei ngak tui jalan “ daong dahlau” piah langyah harak gal buh jien tame jhul pakhang tuvak ngak dom danak dak. Kham merat yau nan, Dong Nai ngak hu 112% brei ngak rilo baoh sang ka urang ngak kong, sang daok xa hoi thun 2025 kayua Thu tuong Rajaei jao brei.

Tinh Ca Mau kham merat ngak salah bruk dak padang saong jao brei labaih 1.000 baoh sang gaok kan kandah dahlau harei Negar harei 2/9. Dalam nan tinh daong padang ngak birau saong pasiam veik 1.069 baoh sang, khik brei kajap klau gah “ ala sang khang, danieng khang saong tabung khang, kuhria tui jien labaih 80 ti dong. Urak ini, tinh hu padang ngak  labaih 170 baoh sang, kham ngak blaoh di puac bilan 7, akaok bilan 8 thun ini.

Ngan haong 233 drap ar ilamo hu taduan saong dak angan, tinh Vĩnh Long daok jhul khang bruk pandar taka so gah ilamo piah khik ramik, yaih khan saong ba drap ar mai jaik jang bhap bini, tuai damuai tapa dom nen tang so. Gah ilamo kham merat meng ini  tal puac thun salih tapa angka so hu takik di nyu kac 60% khaw tin kaya drap ar, gilang khik piah, tu lieu saong drap ar ilamo. Tui nan, patui padang ngak du lieu thei jeng pandar hu ka drap ar ilamo kaya mboh saong oh mboh di meta; patagok  dom nen tang yaih khan kaya di moi truong so saong mang XH.

Hu takik abih lac 27 urang metai, 63 urang njauk rambuac dalam mbang apui khuah di sa wuan alak di Bangkok tuk page ini. Thu tuong Thai Lan Anutin Charnvirakul hu mbaok di labik nan tuk subuh page ini. Tui panuac khan di dom urang daok diuk, wuan alak samar athak apui me-om abih, rilo urang nduac tame labik jaik jaman, min oh hu jalan tabiak.

Gah Hàng hải Dunya (IMO) birau iew da-a dom taneh ia atah klak dom jalan pacang caga Iran piah khik gilai kapal nao mai tapa eo tathik Hormuz. Urak ini, bruk mesruh cagar gauk di Iran saong Mỹ catang, huac kan kandah di labik eo tathik. Tui yaok kuhria, gilai nao mai pajeng menyek tapa eo tathik Hormuz trun ralo dalam 24 mon tapa, hadei dom mbang taong tame di dua gah.

Rajaei Anh brei buh jien tame labaih 250 trieu bảng Anh, labaih 335 trieu USD dalam 3 thun anak tal piah khik caga bhap bini Do Thái, hadei rilo mbang taong Do Thái rah tabiak tukvak jaik ini. Dalam nan brei pabak veik labaih 500 cảnh sát khik brei salamat di dom labik bhap bini hu rilo urang Do Thái daok diukrai jeng yau di sang bac, labik sampayang Do Thái saong dom pasak ngak bruk di bhap bini./.