UBND TP.HCM caong khin daong taong abih jien bac bac si noi tru, ralo abih 100 trieu/ urang/ thun, gam sarak daong jien mbang huak. Bruk ini rik daong patrun kan kandah jien bac da-a saong cai pandar, ba mbuan lagaih piah bac si ranaih umo sahanang hatai hu tame danak dak bac megru ilamo. Gam haong bruk pachreih, pato pakai saong parilo kapol nyaom urang bac si hu ilamo naih joi, pabak bruk patagok ky thuat glong, chuyen khoa dalam di gah y te ban raya, njauk ndem tal dom gah praong saong dom gah kan pachreih hu urang ngak.

Mentri Ngak nong saong Alam moi truong brei ngak katut veik tukvak ngak harak gal ho so brei ma taka so labik pala di darak pasar dalam negar trun daok 3 harei ngak bruk, dalam tuk ngak harak ho so duh ka bruk pablei tabiak negar langiu  oh tapa 10 harei. Tui jabat ngak harak gal, ho so brei ma labik pala, ma so labik papaok hu mbuan mbiah tui jalan mbuan mbiah harak ho so, peih ngak online sang pakhang bruk khik iek du lieu taka so.  

Gah yulit Vĩnh Long kham merat tal thun 2030, taduan raok labaih 10 trieu mbang tuai damuai, kuhria jien mek tame labaih 12.000 ti dong. Vĩnh Long hu labik “ klau gah mbaok kraong, sa gah jaik tathik”, hu jalan ar tathik atah labaih 130 km saong pataom ginup dom bruk lagaih meng langik tathik bein kayau, kraong ia tal glai njom ia mbak, dom inem sajarah dakrai. Ngan haong dom kein lagaih ka bruk ngak suai lavik saong kaya ilamo ralo, tinh Vĩnh Long  daok peih ngak sumu dom jalan piah patagok yulit hu jeng bruk ngak mbang praong, rik daong  hu makna biak praong khang kajap di bhum palei.

Di bhum Dong Nam bo, yaom durian di bein daok trun veik. Baoh durian Thái janih A urak ini hu yaom 49.000 - 52.000 dong sa kilo. Ngan haong baoh durian Ri6, yaom di bein meng 18.000 – 24.000 dong sa kilo. Dut haong bilan 7, yaom durian meng 20-25%. Tui Kapol nyaom nyam patam baoh karaoh Viet Nam,  halau caong khin blei tagok rilo negar Dong Nam A tame bilan paik baoh, dalam tuk Trung Quoc blei tame oh ralo, ba tal yaom durian trun lap. Langiu di nan, hajan di ralo labik di bhum Dong Nam bo ngak trun rilo hatai durian, ba tal dom doanh nghiep pablei salih catang tanut chuan blei tame.

Di xã Hiệp Đức, tỉnh Đồng Tháp birau rah tabiak 1 labik glut jaleih atah 25 met di ar gah Pei kraong Ba Rài ngak gar tavak jalan. Urak ini, di xã Hiệp Đức  rah tabiak 10 labik glut jaleih mbuan gaok bala atah 300met; dalam nan hu 9 labik tapen kraong Ba Rài saong 1 labik tapen ribaong Kháng Chiến. Kuhria jien buh tame ngak pasiam hu 10 labik glut jaleih ini abih jaik 13 ti dong. Urak ini daok likau tinh daong jien piah ngak pasiam dom labik glut jaleih.

Yaom lac oh ka njauk mbang pakacah chung ket, bruk pakacah kapol dat blaong Anh saong Phap hang 3 World Cup 2026 daok pacheih hu rilo urang caok hatai sangka di urang takre caoh mbanh. Tui dom nen tang pablei harak ve online, harak ve biar abih piah tui iek pakacah caoh mbanh rah tabiak di harei 18/7 di mblang Hard Rock di Miami meng labaih 1.180 USD tal jaik 2.000 USD yaok harak ve. Yaom jien urak ini glong jang yaom camereip di FIFA ngan haong mbang pakacah hang 3, brei thau ka bruk caong takre di urang iek.

Cảnh sát Thái Lan birau cap mek kol  ngak ja harak ho so brei angan daong ka uranaih negar langiu hu mek angan quoc tich Thai Lan suan hukum. Meng asar kadha ini urang likei dang angan ngak ame di harak ba-ar 13 uranaih karei, jakar Thai Lan duah mboh hu labaih 160 ho so medil lac suan di sang iek ruak gah langiu karja. Mbiah tak ini, canh sat brei thau hu takik abih lac 19 uranaih negar langiu hu kapol ini ngak harak brei angan kuman saong daok brei thau 13 urang karei. Gah chuc nang chap mek hu 33 urang daok njauk duah mek.

Han Quoc mbang akaok meti kakei “ Melam pandiak” tuk langik pandiak dui atah tal melam ye daok pandiak pa-uh. Langik pandiak dui atah di Han Quoc daok tame tukvak kan kandah jang gam melam yau harei. Ban ine Seoul yam tapa melam pandiak ka dua, melam pandak labaih 25 do C. Jabat chuc nang kakei bhap bini takik tabiak gah langiu, brei menyum ginup ia tui iek prein yawa, abih di nyu lac urang taha umo, ranaih sit saong dom kapol urang mbon gaok langik pandiak./.