Ban raya HCM brei panuac daong 100% tanut bayar ka BHYT ka urang meng umo 60 tal ala 65 thun. Meyah hu brei tapa, jaik 196.000 urang dalam bhum brei hu mbang tui kein laba. Bruk ini hu ba tabiak hadei labaih 5 bilan peih ngak Sarak ka 56 thun 2025 di HĐ Bhap bini Ban raya Ho Chi Minh ka bruk daong tanut bao hiem y te ka urang praong thun umo saong anek saih. Di bruk taong yaom siam lagaih, UB Bhap bini Ban raya Ho Chi Minh hu salah blaoh harak gal ba tagok brei pasiam salih sarak tui jalan parilo urang hu mbang tui kein laba.

Pahadar 79 thun Harei Thuong binh - Liet si, Giáo hội Phật giáo Việt Nam iew dom baha, labik tự viện dalam negar  brei taong 3 sap chuong, hagar  di mon 5 tuk harei 27/7 piah pahadar dom AHLS. Langiu di nan, caong khin Ban Tri sự Giáo hội Phật giáo Việt Nam dom tinh, ban raya peih bruk ngak yang likau brei dom AHLS hu sron mbon tapak dhua; kham merat ngak bruk 500 harei duah pataom saong duah thau angan je atau talang liet si.

Ban raya Can Tho bahrau peih bruk padang, pasiam sang daok ka anek pajeng di urang ba rup drei tame mesuh metak pacang khamang njauk njom janih kanjah hoa hoc di xa An Lạc Thôn. Dalam ban raya Can Tho urak ini hu 142 baoh sang daok dalam sarak hu daong dapok diuk rai dalam dom baoh sang oh daok kajap, ganik atau yaong daok. Rilo meng lac dom baoh sang jeng lac biak kan kandah atau daok dalam sarak hu mbang sarak daong rahra. Dalam bingun ini, Kapul Urang njom janih kanjah jhak sambo kruac/dioxin ban raya Can Tho jeng hu daong 2 baoh sang padang sang daok bahrau…

Mban Khik iek danak dak padang ngak jalan mbak dalam tinh Dong Thap birau padang ngak Danak dak Jalan tinh 877 B, kuhria jien buh tame labaih 252 ti dong, tapa xã Tân Phú  Đông. Danak dak pambuak Danak dak Jalan tapen tathik tapa tinh Dong Thap jiak hu peih ngak, jhuk pakhang bruk cakrok patagok kinh te - xa hoi bhum palei khik brei tani tanat- quoc phong dalam labik tapen tathik.

Tinh Vinh Long ba tabiak jalan ngak patui veik paglaong asar siam Danak dak yaok xa sa kaya (OCOP), patagok veik 250 kaya bahrau dalam tukvak 2026 - 2030, daong patagok kinh te palei pala tui jalan karo kajap, parilo jien mek tame ka rahra. Urak ini tinh Vinh Long hu 973 kaya OCOP daok pandar hu. Tal thun 2030, Vinh Long kham merat takik abih 70% po OCOP padang hu bhum pandap tamo pagam haong pambuak pablei tani tanat.

Jabat Duah saong Daong di Indonesia daok duah veik 24 urang lahik hadei kapal galai di bhum tathik Nam Sulawesi. Tukvak langik pandiak ngak kan kandah tal bruk daong. Ha vien Indonesia iew Mentri Jalan mbak Pajeng ba brei duah thau saong taong yaom  abih gah piah thau bala rah tabiak, brei taong yaom taong abih dom bruk ngak di gilai kapal di tathik.

Mentri Y te Campuchia ba tabiak sa inem sajarah dalam gah y te negar ini tuk khik tani tanat bruk jak jeng 8 thun danak oh hu urang metai kayua ruak pandiak sot ret, gam haong nan tayah taong abih 100% urang njom ruak dalam 6 bilan tapa. Urak ini, Campuchia daok yam tame tukvak hu makna piah paacang cakak ruak pandiak sot ret tamuh veik, pamaong tal jalan ngak hu Kapul Y te Dunya (WHO) brei harak mbaoh tangin abih patruh ruak ini dalam thun 2030.

Di Banda, gah Barak An Do, bhap bini brei salih bruk diukrai ngak mbang saong pacang caga pandiak meda tagok tal jaik 50 do C. Meng mon 4 tuk page, dom urang ngak bruk galam di darak njam ngak sami samar pih sumu pablei dahlau tuk ia harei tagok. Pandiak oh lac ngak abih prein yawa urang  bo daok ngak kan kandah tal gah y te. Gah jalan nao mai anak bilik sang iek ruak tuk halei jeng kacin ginik urang ruak lahik ia dalam rup, abih prein yawa kayua langik pandiak catang. Karja bhum palei peih dom labik ngak la-ar, pabak ia menyum saong brei jru pabak ia, min ini lac dom jalan anak meta min./.