Hoi dong Jien bilan negar hu buh harak phieu, njauk hatai ba tabiak panuac Rajaei brei tagok jien bilan takik abih bhum di tanut 7,8% meng harei 1/1/2027. Tui jalan patagok jien bilan takik abih hu “mbaoh tangin”, tanut tagok kuhria rah tapa 7,8% lac tagok meng 340.000 dong tal 390.000 dong patui bhum. Tui ong Ngọ Duy Hiểu, Phaok akaok Tong Lien ndoan Ngak bruk Viet Nam, tanut pasiam ini hu caong takre brei daong urang ngak bruk sahnang hatai pagam haong bruk ngak, daong patagok jalan paatagok kinh te.

Kapol nyaom duah pataom atau talang liet si K72, di Bộ Chỉ huy Quân sự ban raya Dong Nai birau duah mboh sa kubo kapol liet si di xa Minh Đức (dahlau ini di huyện Hớn Quản, tỉnh Bình Phước). Urak ini labik kubo dom liet si dar pataom gauk, gah bol lin hu duah mboh nan lac: sa mbaik phao AK, 6 mbaik mbut kalam ( dalam nan 1 mbaik mbut mực, 4 mbaik mbut mbi, 1 mbaik mbut chì), 2 klaok ia, 4 thong dép, 1 dang talei ka-ing gam haong dom kaya karei. Dalam dom kaya nan mbaik mbut mực hu sarak gu cim katrau haong huroh “Tiến Quy”. Daok labik karei pak Bein negar Bù Gia Mập hu duah mboh  1 binah mbia patau ghor hu sarak angan: "LÊ V HỶ - 4.8.67".

UB Bhap bini ban raya Can Tho hu brei mbaoh tangin jalan buh jien tame dua danak dak sang daok rahra di phuong Ninh Kiều saong phuong Cái Răng, ngan haong taong abih phun jien buh tame kuhria labaih 5.955 ty dong. Dua danak dak brei pabak labaih 3.250 baoh sang daok rahra, daong ngak tanut patagok sang daok rahra Thu tuong rajaei jao brei ka ban raya. Urang dang akaok ban medin Can Tho pandar dom po buh jien tame samar chip salah blaoh harak gal hukum, padang tukvak tantu cambaih laih piah khik kajap ginup kein lagaih peih ngak dalam bingun Harei Negar 2/9 anak tal.

Meng harei 2/9, TPHCM kuhria ba tame pandar phan mem khik iek bruk pandar tapen jalan, brei ka bhap bini saong doanh nghiep tut angan online, tui iek harak ho so, bayar jien saong taduan bruk pasang iek online, rik tame khik iek tui ilamo taka so. So Padang ngak  TPHCM khan brei thau, jien mek tame meng bruk pandar tapen jalan, meda dak harei dak ralo. Ta-eng 6 bilan akaok thun ini, jien mek tame hu labaih 9,6 ti dong, sumu sa thun 2024.

Meng akaok thun tal ini, bala patui veik rah tabiak srau kadau, ngak khat lahik jaik 32 ty dong ka dom bhum palei di tinh Vinh Long. Njauk duh hatai lac, bruk mbang tagok ar tasik jeng daok rah tabiak trak di rilo labik tapen kraong, tapen tasik. Anak bruk rah tabiak srau kadau di bala, tinh vinh Long daok peih tabiak dom jalan ngak pacang cakak tui kadha “4 di labik”. Gam haong nan pataom tame ngak dom danak dak pacang cakak jaleih tameh.

Mentri Pato megru Trung Quốc pabak 27 bruk bac megru birau dalam gah pato megru pakat cao ndang saong ndai hoc, piah pabak urang ngak bruk di dom gah kinh te birau tamuh tagok saong bruk patagok taneh ia. Bruk ramik pasiam mbang ini ngak tui tacei pato dalam bruk Quy hoach 5 thun mbang ka 15 di Trung Quoc saong quy hoach patagok gah pato megru tui tukvak, pataom tame duh ka bruk ngak kong nghiep birau saong jhul patagok dom bruk ngak jitvu siam lagaih.

Rajaei Philippines brei patui veik daong jien mbaok piah daong 7,5 trieu baoh sang rahra hu jien mek tame biar njauk kan kandah kayua yaom menyek tagok glaong kayua mesuh metak rah tabiak veik di Trung Dong. Jalan ngak di danak dak lac daong khik kajap dom baoh sang Philippines meda patui veik dom caong khin yaok harei. Langiu Rajaei jeng ngak bruk daong xang menyek ka dom radaih jeepney saong radaih UV Express hu ginup kein lagaih, hu tanut 1.500 peso yaok adit dalam 3 bilan.

Jabat khik iek truyen thong Anh (Ofcom) hu peih bruk pasang iek ngan haong nen tang mang xa hoi TikTok piah duah thau ung dung ini ngak njauk tui dom asar kadha hukum karja dalam bruk khik iek uranaih, palik njiak dom adar kadha oh siam tuk Hukum Siam mekre Online atau oh. TikTok di Trung Quoc, brei mboh bruk ngak nan njauk tui Hukum Siam mekre Online, hu pandar meng thun 2025 piah pakhang bruk khik iek uranaih angaok mạng./.