Dalam dom bruk ngak pahadar 79 thun Harei Thuong binh – Liet si, ban Dong Nai peih ngak rilo bruk ramik pasiam sang daok ka dom anek bik di urang bol lin dahlau diah njom jru mek klik kruac. Brei panuac di var padang ngak sang, urang ngak praong  di dom bhum palei kakei brei daong oh daok sang taik tahak, sang tayak ka urang ngak bruk kat mang saong gauk gar di urang  nan lac sarak daong  biak gheih di Dang, Karja; tui nan dom don vi pambuak kajap haong baoh sang, samar hu ngak salah alin brei ka mikva tame daok. 

Dom bhum palei dalam tinh Dong Thap peih ngak sumu gauk, pasiam ramik sang daok ka 41 urang lac anek di bol lin dahlau diah hu njom jru mek kalik kruac. Bruk daong ngak sang daok, pasiam veik sang daok daong ka dom baoh sang hu labik daok tani tanat bo daok brei mboh bruk sangka, kuhria di Dang, Karja saong taong abih manuac sia dalam xa hoi daong ka urang ngak bruk daong ka taneh ia. Yaok baoh sang  hu padang ngak lac bruk njauk ngak, rik tame ngak brei ladam trun dom pandik harao lahik kurang kayua mesruh metak caik veik, pabak prein ka dom baoh sang urang kham merat ngak mbang yam tagok.

Harei ini, gah bol lin chuc nang brei peih praong labik kuac duah di labik A- Bein bingu Lê Thị Riêng, TPHCM. Dalam harei kabroi, bol lin  daok tui duah veik dua gah akaok lubang dar dom urang liet si, pok tagok hu 19 atau talang liet si saong 1 kapol dom atau liet si gam 13 ndap nda drap ar. Mbiah tal tukvak ini, duah pataom hu 93 atau talang liet si; 2 labik dar dom liet si rilo haong gauk. 

Piah duh ka bruk khin nyim tapuk bac ka thun bac birau 2026 -2027, anak meta brei 3 khoi bac nan lac: tal 1, tal 6 saong 10, So Pato megru TP.HCM iew dom sang bac  tieu hoc, THCS, THPT yaok kuhria dom amaik ame khin  nyim tapuk bac  ka anek saih meng tal bac 1 tal bac 12. Tapa nan piah TPHCM brei pambak praong  bruk nyim tapuk bac tui yaok thun bac saong  pamong tal ngak salah dom tal bac di thun 2029. Thun bac 2026 -2027 TPHCM hu labaih 185.000 anek saih tal bac 1, labaih 186.000 anek saih tal bac 6 saong labaih 170.000 anek saih tal bac 10 hu taduan mbang tui sarak ini.

Dalam 6 bilan akaok thun, dom pakat Doan tinh Ca Mau peih ngak sumu dom danak dak , bruk ngak di dam dara kuhria hu jaik 25 ti dong. Njauk ndem tal dom pakat Doan hu jak ba peih ngak 8 danak dak jalan palei pala saong 8 baoh sang Anit ranam saong sang Jum pataom; ngak salah saong ba tame ngak bruk danak dak “Truac hadah jalan palei - Jalan hala dok Negar - Jalan bingu dam dara”, kuhria taong abih tui jien labaih 2,78 ti dong. Langiu di nan, Tinh doan Cà Mau jak ba alin ralo danak dak, bruk ngak di dam dara lagaih haong raidiuk.

Thai Lan saong Campuchia  birau peih sa mbang ginum biai duah jalan ba siam sron mbon salamat saong caga dom bruk kan kandah rah tabiak di tapen negar dua taneh ia. Campuchia ndem tapak hatai caong khin Thái Lan brei padeih  dom bruk ngak ta-eng yau ye: Wua lam peih taneh ngak jalan, paga pacang meng kẽm daruai…Tui nan, Campuchia kakei ka bruk ngak samar dut kuhria veik saong parabha labik padang jamang di Uy ban hon hop padang got jamang paga taneh di dua negar.

Gah Salamat Hijao di Italia trun jalan, padang 3 kadha sarak meng ia khan patau anak Labik pakacah La Mã di Rome piah brei thau bruk bien doi khi hau ngak jhak tal prein yawa urang ngak bruk. 3 ia patau ia khan, sarak thaok binguk dom urang ngak mbuan gaok kandah  kayua langik pandiak, halai tame tui ia harei pandiak tuk page, dalam tuk Italia daok yam tapa sa mbang langik pandiak catang. Tui yaok kuhria, harei ini langik catang di ban ine Rome di Italia tagok tal 38 do C.

Takik abih hu 50 urang lahik saong rilo urang metai, dalam mbang tableih gilai pajeg urang di cư chau Phi suan hukum birau rah tabiak harei kabroi di tathik Libia. Libia hu jeng sa dalam dom labik nao tabiak di urang nao duah labik birau pak chau Phi piah tapa Địa Trung Hải tame châu Âu. Yau nan min, ini jeng lac bruk mbuan gaok bala, bhian hu rilo mbang gaok bala metai lahik rilo urang./.