Tukvak padang ngak danak dak jalan Vanh ndai 4 Ban raya Ho Chi Minh tapa tinh Tay Ninh. Tal ini, bruk bayar jien, daong, caga labik daok hu peih ngak gam gam, 2.774 urang njauk kan kandah hu bayar jien aval drah hu labaih 5.900 ty dong. Bruk brei mboh yaom bayar jien hu salah blaoh ngan haong 5 labik ramik daok dalam nan hu: Hòa Khánh, Bến Lức, Mỹ Lộc, Tân Tập saong Rạch Kiến. Dom xa karei daok patui veik hu mbat taok, mbaoh tangin tui yaok mbang.

Tinh Lam Dong daok samar brei mek mau sinh pham di kubo liet si dalam tinh piah thau ka talang di liet si. Dalam tinh Lam Dong urak ini hu 12 Kubo ghor Liet si, mbiah tal ini, bruk mek mau hu ngak salah blaoh di 9 kubo. Urak ini dom gah bol lin daok pataom tame mek mau di Kubo Liet si Da Lat, labik padeih padei di labaih 2.200 liet si, dalam nan hu 651 kanum kubo njauk brei mek sinh pham dut iek ADN. Tinh Lam Dong kham merat ngak salah bruk mek mau dahlau harei 15/11/2026.

Tal bilan 6/2026, labaih 75% sang iek ruak dalam negar hu peih harak gal ruak hakik online. Di Ban raya Ho Chi Minh, 100% sang iek ruak hu peih ngak harak gal ruak hakik online di dom tanut karei gauk. Meng harei 1/7/2026, harak gal prein yava online di rahra hu peih ngak di nen tang Rahra taka so Ban raya Ho Chi Minh. Ban raya ba tabiak jalan ngak yaok rahra jeng hu harak gal ruak hakik online, hu pabak bhian meng danak dak pasang iek prein yava yaok tukvak oh mek jien saong dom mbang pasang iek taong ruak, tapa nan daong duah mboh aval ka bruk mbuan njauk ruak hakik.

Sang iek ruak Da khoa Hoàng Tuấn Cần Thơ birau ba tabiak ung dung He thong sieu am tasau tu dong. Ini lac bruk ngak hu makna dalam bruk pasang iek dahlau, thau samar ruak ung thu tasau di urang kumei dalam bhum. Bruk khang hatai buh jien tame ngak kong nghe sieu am tasau 3D brei mboh  bruk sami samar di dom jabat y te paglong bruk iek ruak tasau dalam bhap bini; tui nan, peih tabiak bruk dut iek ruak hu siam salamat, njauk lagaih jang ka yaok trieu bhap bini dalam bhum taneran kraong Cuu Long.

Meng harei 11 tal 20/7, majam palih ruah anek saih aaok pakat di Ban raya Ho Chi Minh bayar bruk kuhria hu meng bruk rabha tuyến online saong taduan harak gal tame bac tapak di dom sang bac. Di dom phuong hu rilo labik ngak kong saong urang ngak bruk panduan mai daok, rahra cơ học tagok glaong, jeng brei khik kajap ginup labik bac megru ka anek saih. Naih gheih yau ye Phuong Bình Trị Đông hu 6 sang bac tieu hoc saong 3 sang bac THCS. Piah brei kein lagaih ka anek saih, dom bruk hu baoh sang di Bình Trị Đông min amaik ame khin brei ka anek bac megru di phuong taphia ye brei hu maong iek tapa.

An Do caong khin dom po gilai saong doanh nghiep brei padeih bhap bini negar ini nao nga bruk di kapal gilai tapa eo tathik Hormuz, dalam tuk rilo bruk kan kandah rah tabiak di tathik Vịnh. An Do lac taneh ia hu rilo urang peih gilai ralo dang dhi ka 3 dunya, hu labaih 300.000 urang ngak di dom kapol gilai dunya. Rajaei negar ini daok kham merat pakhang bruk tui iek dom urang peih gilai piah sumu daong iek ruak, ba mai veik palei saong khik brei hu kein laba.

Kapul Y te Dunya (WHO) hu ba tabiak panuac kakei caga samar chip ka mbang tamuh jit ruak Ebola di CHDC Congo, ndom khang ka tukvak pambak samar di virus mbang ini daok truh tapa taong abih dom mbang jit ruak dahlau diah. Kuhria tal tukvak urak ini, jabat y te hu taduan labaih 2.000 urang njom ruak saong jit ruak kanjah jhak ini ngak metai takik abih 796 urang.

Takik abih 11 urang metai saong 19 urang njauk rambuac dalam mbang apui khuah rah tabiak di labik khik iek uranaih metui medhar di Algeri di page harei 16/7. Bruk ba tal apui khuah daok hu ngak brei cambaic laic. Angan je dom urang gaok bala oh ka khan brei thau. Langik pandiak catang ba tal apui khuah mbang ralo di Algeri birau ini. Kuhria dalam adit tapa, taneh ia ini hu tal jaik 1.000 mbang apui khuah./.