Muk Nguyễn Thị Ngọc Điệp, Pho Akok UBND ban Cần Thơ khan brei thau, ban raya hu rilo urang bangsa takik diuk rai, dalam nan, bhap bini Khmer hu labaih 543.000 urang, meblah 14% bhap bini. Dom thun tapa, pakat uy, karja ban raya brei ngak sumu, siam lagaih dom sarak karja di Đảng, hukum di Karja ka bruk peih ngak bruk bangsa tui sarak  bangsa, abih di nyu lac dom Danak pakat negar, bruk praong di Danak dak patagok kinh te - xa hoi bhum urang bangsa takik saong bhum ceik;  sarak dac thu daong bruk cakrok patagok kinh te - xa hoi bhum urang bangsa takik; sarak daong ka urang hu angan je dalam bhap bini bangsa takik… hu yau nan raidiuk bhap bini hu paglong, baoh sang kathaot dalam bhap bini  trun mboh di meta.

UBND tinh Khanh Hoa birau ba tabiak bruk palih ruah urang jakar thun 2026 piah pabak bruk kurang jakar, kong chuc hu jalan diukrai siam, ilamo jak gheih ngak hu bruk di karja. Tui bruk ba tabiak nan, dalam tinh Khanh Hoa palih ruah 417 urang jakar tame ngak chuyen vien saong dom bruk karei. Dalam nan, bruk sở, mban, bruk ngak pakat tỉnh palih ruah 79 urang; UBND dom xã, phuong palih 338 urang ngak chuyen mon, bruk di karja. 

Tui Mentri Ngak nong saong Moi truong, njom ia mbak di bhum Taneran kraong Cuu Long daok trun. Ia mbak 4 gam sa lit praong abih di pabah kraong meng 60km tal 63km di kraong Vàm Cỏ, dom pabah kraong Cuu Long meng 30 km tal 37km. Tui kuhria dalam adit anak tal ia mbak daok trun veik. Dom danak dak ribaong kraong atah tathik meng 20km tal 30km gaok kan kandah kayua njom ia mbak di dom harei ia ndik.

Harei ini 25/5, di Pasak Y te dalam bhum saong dom Sang bac Mam nom dalam tinh Dong Thap peih bruk pasang iek prein yawa, dut iek ruak ka bhap bini. Mbang ini, tinh Dong Thap brei dut iek prein yawa  ka dom baoh sang kathaot, baoh sang jaik kathaot, urang umo taha umo meng 60 thun tagok, urang daok di dom xa kaoh pulao, dom xa kinh te - xa hoi raidiuk kan kandah, biak kan kandah…Bhap bini mbang akaok meti hu iek ruak, pasang iek ruak oh abih jien nan ye biak bui sambai.

Page ini 25/5, gah chuc nang Kong an TPHCM pambuak haong Kong an phuong Bình Thạnh pambuak bruk pasang iek apui khuah mbang sang glong 11 tal di jalan Đinh Bộ Lĩnh, atah jalan canah 4 Hàng Xanh labaih 500 m. Apui khuah oh hu thei metai, min khut ralai rilo drap ar, dalam nan hu drap ar ngak mekre sang danaok. Kayua rah tabiak tuk page, bol lin pacang padam khuah brei pacang meneing jalan Đinh Bộ Lĩnh piah duh ka bruk  padam apui saong pasang iek labik apui khuah, ba tal bruk nao mai gaok kan kandah…

Tui dom urang jakar Saudi Arabia, labaih 1,5 trieu urang Isalam negar langiu mai taneh ia ini ngak rukum Haji,  tame harei camereip harei 25/5 ngak Haji. Bruk mesruh metak Trung Đông rah tabiak hadei dom mbang Mỹ saong Israel taong tame Iran ngak klaik klaoh  pacang cakak jalan ahaok par di ralo labik saong  ngak khat lahik rilo jien padai nao mai. Dom hãng ahaok praong di bhum tathik urak ini daok kham ngak pasiam veik samar piah gilac ngak bruk, hadei rilo adit kareik pabah mbang saong padeih par.   

Dom urang ilamo di Dai hoc Oxford di Anh daok ngak tabiak sa janih vaccine birau piah pacang caga jit ruak Ebola tamuh tabiak di Cong hoa dan chu Congo. Tui gah y te Dunya (WHO), jit ruak Ebola di chau Phi urak ini kayua chung Bundibugyo. Bruk pacang jit daok gaok kan kandah kayua vaccine atau jalan taong ruak  oh ka mbaoh harak ngan haong virut ini. Kuhria tal ini,  WHO hu labaih 177 urang metai saong jaik 750 urang njom ruak kayua virut Ebola.

Tui urang jakar pak ini saong gah pathau khan An Do, takik di nyu 37 urang metai di bang gah meraong An Do lac Andhra Pradesh saong Telangana kayua pandiak catang. Karja dua bang ini  kakei bhap bini,  njauk ndem tal urang umo taha, urang kumei metian, uranaih saong dom urang ruak me-ik saradang, darak tagok glong atau ruak baoh hatai brei menyum ginup ia saong takik tabiak panjiak. An Do  lac labik pandiak  abih di dunya tuk langik pandiak tagok tal 47 do C.