Pahadar 50 thun ban raya angan angan Chu tich Ho Chi Minh brei peih ngak jaik 100 danak dak  yaih khan mblang adaoh tamia bhap bini, phling ragam bhap bini saong bahrau di dom bein bangu, jalan nao tabak takai, inem mek sajarah. Dom danak dak rilo meng lac pamaong tal duh bruk rahra di dom labik bhap bini rahra saong dom labik me-in ilamo dalam Ban raya Ho Chi Minh. Gam haong nan di dom mblang adaoh tamia parang iek dom janih kịch ndom, adaoh cai luong, xiec, tamia rối… Dom labik peih flim brei hu bruk hu mbaok tame di rilo labik, gah ngak mbang pablei salih, dom urang nghe si ban raya.

Tukvak tapa, Mentri Ilamo, The thao saong Yulit gam haong karja bhum palei pambuak haong bruk peih rilo tal bac pasram menyim, jhik pet saong ngak rilo janih thaik thaok ka adei sa-ai kumei bangsa takik. Dom bruk ngak yau Harei roya ilamo, lien hoan parang iek khan ao bangsa, nyaom darak pasar bhum glong saong dom mbang pakacah menyim khan bai jeng yau  bruk yaih khan peih praong darak pasar. Bhap bini dom bangsa takik oh daok cang daong bo sahaneng ka ilamo siam gheih karei lac kein laba glong abih piah patagok bruk ngak kinh te, ngak kaya meda di bhum palei di drei.    

Gah jirah rivang Ban raya Can Tho patui veik brei mboh bruk lac sa dalam dom prein daong patagok hu makna di gah kinh te bhum palei. 5 bilan akaok thun 2026, Ban raya Can Tho kuhria raok labaih 6,2 trieu mbang tuai damuai, dalam nan tuai damuai dunya hu labaih 329.000 mbang. Gah jirah rivang Can Tho daok oh padeih salih bahrau kaya ndap nda, paglaong asar siam jitvu saong patagok bruk pambuak bhum piah pabak hatai caong dak harei dak ngak parilo di tuai damuai mai rivang me-in, ba drei tame.

Meng harei 24 tal harei 26/6 anak tal, Harei Ilamo padhih the thao yulit 4 bangsa tinh An Giang mbang I meda rah tabiak di phuong Rạch Giá haong dom bruk pok meyaom, khik ramik saong patagok dom ilamo meng kan di bhap bini dom bangsa Kinh, Hoa, Khmer saong Cam. Pakacah daoh tamia bhap bini saong parang iek khan ao ngui cuh di 4 bangsa tinh An Giang hu mbaok di dom xa, phuong saong dac khu. Ini lac piah dom urang pakacah merak gauk, bac megru klak rabha haong gauk, rik tame ngak brei pambak praong jum pataom saong pasram patia prein yawa dalam bhap bini.

Kapul Chu thap do Lam Dong pambuak haong UB Bhap bini xa Hàm Thuận Bắc bahrau peih danak dak pabak brei daong ka dom baoh sang rahra ciuk kanjah kayua bala. Di ini, 97 baoh sang rahra dalam bhum xa Hàm Thuận Bắc hu taduan haong taong abih paok jien 458 trieu dong. Tukvak tapa, bala hu ngak kanjah oh sit tal raidiuk saong bruk ngak tabiak di rilo baoh sang rahra dalam xa. Ngan haong bruk kham merat di pakat uy, karja saong rahra, raidiuk rahra hu dak harei dak tani tanat

Harei Raya Đoan Ngọ peih ngak di harei 5/5 Ia bulan yaok thun, lac sa dalam dom rija roya  meng kan di Trung Quoc. Dom bruk ngak meng kan di harei Raya Đoan Ngọ di Trung Quốc dalam nan hu pakacah gilai ine girai, mbang ahar bánh chưng brah ndiuk, tual hala ngải cứu saong daruai anak pabha mbang piah patrauk bhut bhong, prein yawa saong likau patuah jamo. Ini jeng lac “ harei puh ramik brei hacih” tui sahaneng di bhap bini, tuk bhap bini brei ramik sang danaok, pandar dom janih phun jru saong kaya meng kan piah pacang caga jit ruak akaok bilan Hè.

Kong nghe birau daok patui veik ngak brei salih patagok khang kadang dalam bruk anek menuac thau ka ilamo, aguma saong raidiuk rahra. Sa bruk brei mboh bahrau ini mai meng Dom negar sit (UAE) nan lac sa robot thaik menuac urang cuak gilac bruk nyu nao tame sang Magik Islam saong ngak bruk sampahyang. Banah film samar drah pambak tabiak saong ngak tagok bruk meraik ndom meyai ka bruk ilamo kong nghe saong ilamo siam gheih meng kal mai.

Ban raya Paris, Pháp birau tabiak bruk ngak “ sang bac tapuk angaok kraong” biak gheih. Nan lac sruh gilai theik angaok kraong Seine, labik tuai damuai meda bac 5.000 baoh tapuk. Tal melam, sruh giai ngak labik ma-in di bhap bini daoh tamia, bac tapuk haong gauk saong  kuan bar. Bruk ngak ini caong khin  pachreih bruk bac tapuk  di “ ban ine ilamo hadah krah” Paris haong dom kadha  meng kan di Prang, ilamo dunya, kadha ariya saong kich./.