Mbang Pato tacei Ban raya Ho Chi Minh ka bruk roh duah, pataom saong brei thau angan je atau talang bol lin ba tabiak jalan ngak salah blaoh bruk mek mau di dom kubo bol lin dalam bhum dalam bilan 9 anak tal. Gam haong nan ban raya kuhria peih bruk truy dieu, lam dan dom atau talang bol lin hu pataom di Bein bangu Lê Thị Riêng, ban raya khik tani tanat 5 kapul roh duah, pataom atau talang bol lin. Langiu di nan, daok hu kapul hu ilamo di sang bac dai hoc negar Ban raya Ho Chi Minh, dom urang mong mboh di jaman dahlau saong labik hu pambuak.

Kapol K72 - Bộ Chỉ huy bol lin Ban Đồng Nai duah hu veik mbaik mbut kalam  sarak angan “ Văn Chín” gam rilo kaya kan gireih di lubang 3 liet si di bein cao su 97, xã Minh Đức, TP. Đồng Nai (huyện Hớn Quản, tỉnh Bình Phước klak - jamar mesruh metak bhum taneh ini lac tinh Bình Long. Kuhria tal tukvak ini, Kapol K72 kuac duah saong pataom hu taong abih tih 26 atau talang liet si di bein cao su 97, mek hu rilo kaya kan yaom glong hu sarak angan “ Tiến Quy”, kadung thaik binguk di urang, thaik binguk di kapol nyaom…

UB Bhap bini xa Bắc Bình, tinh Lam Dong (huyen bac Binh, tinh binh Thuan klak) peih danak dak ngak betong jalan mbak dalam mblang hamu Chà Vầu, pambuak palei meng palei Phan Hiệp tal palei Phan Hòa. Jalan atah labaih 6.500m, hu taong abih jien buh tame jaik 20 ty dong. Bruk paglaong jalan pabak hatai caong ka jalan mbak, nao mai di mikva bangsa Cam, khik kajap salamat jalan mbak, pajeng ba kaya nong, daong jhul patagok kinh te, paglaong co so ha tang di xa Bac Binh, tinh Lam Dong.

Rilo bhum palei di gah Pei tinh Gia Lai tabiak ngak bruk “ Danak dak Quang Trung”, padang ngak sang  daok ka bhap bini bhum gaok bala, kham merat ngak salah bruk panduan ba dom bhap bini tabiak truh labik mbuan rah tabiak bala dahlau bilan hajan ribuk thun ini. Ngan haong dom baoh sang oh ngak hu sang ta-eng, dom bhum palei brei jak ba urang daong ngak, kaya kan, jien padai ngak tui  jalan “ anek cin alin tal tangin”, daong bhap bini meda samar hu tame daok. 

Danak dak jalan vanh dai gah Pei ban raya Can Tho (jalan Quoc lo 91 tal Quoc lo 80) hu taong abih jien buh tame labaih 10.600 ty dong bahrau hu HĐ Bhap bini ban raya Can Tho brei tapa. Jalan brei daong pambuak samu haong mblang kapal ahaok par, lamnge tasik, dom labik ngak kong; jhul tagok bruk pajeng ba kaya tui rilo jalan di bhum taneran kraong Cuu Long haong Ban raya Ho Chi Minh saong dom bhum kinh te karei, daong prein patagok kinh te, xa hoi, gam haong nan khik kajap quoc phong, an ninh ka ban raya Can Tho saong bhum taneran kraong Cuu Long.

Gah urang jakar negar Trung Quoc ngak salah bruk duah pataom di angaok taneh dalam mbang glut jaleih ceik pak huyen Bành Thủy, ban Trùng Khánh, hu 51 urang metai saong urak ini daok hu 10 urang lahik. Bruk ba tal labaih 1.100 urang brei panduan nao labik karei samar. Karaj bhum palei daok jhul pasamar ngak dom jalan daong ka baoh sang urang, daong brei labik daok saong langyah hadei bala rah tabiak.

Thu tuong Thai Lan bahrau pato tacei peih praong bruk pasang iek bleik saleik di mbang pakacah palih ruah urang jakat di karja palei thun 2025, gam haong nan brei mboh dom urang ngak suan njauk taong bhat tui hukum. Mbang pasang duah hu peih ngak meng puac bilan 6 meng blaoh, hadei tuk canh sat duah mboh sa jalan talei pacang cakak saong pasiam kadha pakacah. Luac jalan pasang duah hadei nan brei mboh labaih 5.800 kadha pakacah medil hu salih tanut pakacah. Dalam nan, labaih 3.600 anek saih meng bruk laik pakacah hu pasiam tanut jeng njauk pakacah.

Dalam bilan 7 ini, Indonesia duah hu labaih 5 ribau labik apui khuah glai. Labik mbuan apui khuah glai tagok biak samar kuhria meng akaok thun saong rah tabiak dom mbang apui khuah glai ngak khat lahik metai manuac. Tui kuhria mboh dahlau, apui khuah glai  tagok tabung glong meng bilan 8 tal bilan 9 tuk langik pandiak bhang. Kuhria tal harei 25/7, dom mbang apui khuah glai abih jaik 29 ribau ha di gah Pei negar ini./.