Enam bilan akaok thun ini, Ban raya HCM pataom hu 150 atau talang liet si, gam haong nan mek mau ADN labaih 7.600 kubo liet si oh ka thau tanat khau tin, duh bruk ngak tantu angan je saong ba dom AHLS mai sang. Bruk naih gheih lac mbang roh duah praong di Bein bangu Lê Thị Riêng. Ngan haong bruk hu mbaok di labaih 210 urang jakar, bol lin saong kapul hu ilamo. Meng ini tal puac thun, Ban raya HCM ba tabiak jalan ngak salah blaoh bruk mek mau ngan haong labaih 9.800 kubo liet si oh ka ngak tantu angan je.

Tinh uỷ An Giang biruw ar khar tabiak Harak di  Po negar alin kaya angan Muk amaik Viet Nam bijak gireik brei ka 5 amaik hu ralo bruk daong, var klak rup drei daong ka taneh ia peih paha bangsa, padang ngak saong khik caga Taneh ia; 2 baoh sang liet si hu alin brei  Huan chuong Babat dhi dua saong dhi klau.

Mbang Pato tacei roh duah, pataom saong ngak tantu angan je atau talang bol lin (Mbang Pato tacei 515) tinh Ca Mau ieu da-a payua dom jabat, labik, bol lin meng kal, urang gauk gar bol lin kham merat pabak khau tin, duh bruk roh duah, pataom atau talang liet si dalam bhum. Mbang Pato tacei sanya, grauk khau tin, yaom lac sit abih, jeng hu taduan, khik kandauk tui adat saong lac bruk hu makna daong dui katut tukvak ngak tantu cambaih laih, roh duah, pataom atau talang bol lin; daong dom AHLS aval drah gilac mai haong bhum palei, baoh sang.

HĐND ban Can Tho khan tapa Sarak Nghi kuet daong gru pato saong rajakar di dom sang bac pato pakai uranaih mam non di karja dalam ban. Tui nan, yaok gru pato saong rajakar ngak bruk di dom sang bac pato pakai uranaih mam non yaok bilan hu daong  960.000 dong. Bruk ba tabiak sarak nan brei daong paglong bruk ngak di rajakar pato uranaih mam non sang dom bruk dalam tukvak birau. 

Di Labik jirah rivang sinh thai Pabah Bambang jang Đông Giang, ban raya Da Nang bahrau rah tabiak harei raya Đông Giang 2026, bruk naih gheih lac danak dak pambuak me-in seni nghe thuat mbang akaok meti di ilamo Champa saong ilamo Katu. Ini lac mbang akaok meti seni nghe thuat bhap bini Champa saong Katu gam rah tabiak dalam sa danak dak parang iek duh ka tuai damuai. Bruk ini brei mboh dom ilamo siam gheih salah blaoh meda hu yaih khan di rilo labik karei gauk bo jeng khik hu prein dui pachreih di dom bruk hu dahlau.

Quoc hoi Cuba khan tapa yaok rilo salih jalan ngak mbang kinh te saong hanh chinh hu makna prang dalam piah jhul pakhang bruk ngak mbang kinh te, yam tapa tukvak kan kandah yau urak ini. Tui nan, brei ka doanh nghiep urang ngak mbang hu tame dom gah kayua Karja khik iek yau bruk khik iek labik pablei jru, blei tame, pablei salih saong njuk mek menyek. Quoc hoi Cuba jeng brei trun takik veik dom mentri meng 27 trun daok 20, gam hukum sang daok birau brei adat ka bhap bini hu dua baoh sang di ban medil.

Bol lin Israel hu patayah majam jalan labang di Hezbollah di ala talei ceik Beaufort di gah Meraong Liban. Tui bruk ndom meyai, bol lin Israel hu pandar labaih 700 tan jru patuh piah ngak jaleih taong abih danak dak ngak dauk ini. Ndom meyai brei thau majam jalan labang ini lac sa banah pasak dalam jalan kuhria di kapul Hezbollah piah taong tame dom bhap bini di bhum Galilee.

Takik abih 8 urang ngak bruk di lubang dang saong 28 urang karei lahik hadei mbang patuh athak me-tan rah tabiak di sa lubang dang di Tay Nam Pakistan harei 30/7. Tuk rah tabiak patuh hu abih tih 36 urang daok ngak bruk di labik nan. Dom kapol urang daong samar duah dalam trun 1.220 met. Yau nan min, duah urang daok diuk nan kan hu yau hatai caong khin./.