Page harei 29.7, di Ha Noi, Mban Bi thu peih Nyaom biai pakat negar duah thau, bac megru, tacei pato saong ngak tui Sarak Nyaom biai mbang ka 3 BCH Trung uong Dang mbang XIV. Ndem meyai di nyaom pataom, Tong Bi thu, Po negar Tô Lâm ndem cambaic laic, bruk karja bhum palei dua pakat, Trung uong oh ndem ka bruk dak ramik, pasiam veik karja pakat xa, kayua bruk ngak hu tani tanat, ngak siam blaoh. Tinh, ban halei khin brei ramik pasiam veik, brei ngak tui jalan tacei ba di Dang, Hukum di Karja, quy hoach, bruk khik iek saong caong khin di Bhap bini rahra ye pok tagok karja pakat angaok pasang iek. Kham merat atah klak jalan sahaneng “ lagaih ka urang jakar, glaih glar Bhap bini”.

Gah pato megru Dak Lak daok pambuak haong UBND dom xã tapen negar, padang ngak jalan palih ruah, ngak salah bruk gam bac gam daok saong bac daok veik huak jala pandiak di 3 dalam 4 sang bac pho thong gam bac gam daok di bhum taphia negar. Tui yaok kuhria hu labaih 40% anek saih di 3 sang bac hu tut angan daok veik bac, ralo meng tal bac 4 tagok. Anek saih tal bac 1 tal 3, ralo meng lac amaik ame lac anek daok sit oh ka brei daok bac daok veik dalam sang bac.

UBND TPHCM caong khin urang jakar, kong chuc brei ngak dahlau salih nao mai meng radaih ndien. Ini lac bruk ngak ka dahlau piah urang karei pasang tame ngak tui pambak praong tabiak tal dom doanh nghiep saong bhap bini Ban raya. Tui nan, ban raya tacei pato samar ngak brei salah bruk salih nao mai meng radaih ndien, xang hacih ngan haong dom radaih buyt peih nao dom tinh saong dom radaih pajeng ba tuai damuai.

Tukvak tapa hu rilo bruk, jalan ngak ja ba tal khat lahik tuk bayar jien meng thẻ. Dalam nan, dom kapol nyaom negar langiu pabak jit vu bayar jien tapa the, jitvu bayar jien ka urang oh daok dalam negar saong negar langiu di Viet Nam piah bayar jien kaya, jitvu dalam negar, tapa the Visa, MasterCard haong vi dien tu. Piah pacang caga  bruk khat lahik Gilang pariak Karja kakei dom gilang brei khan ka tuai damuai ka bruk paok, salih chip the saong pakhang bruk pasang iek the hu siam lagaih.

Mbang palih ruah tal bac 10 thun bac 2026 -2027 di TPHCM hu jaik 3.500 anek saih. Yau nan min, hu rilo sang bac oh ka ginup anek saih pabak tame. Tui bruk kuhria dalau, abih tih hu jaik 3.500 anek saih di 79 sang bac di karja. Yaok anek saih  hu tut angan sa sang bac palih ruah pabak. Angan anek saih hu palih ruah pabak tame meng harei 3/8 suai abih 16 mon  harei 7/8, dom sang bac taduan harak ho so di anek saih dalam tukvak nan.

Tong thong Indonesia samar ngak brei salah danak dak ndien palei pala ka 1 ribau 400 palei dahlau di harei 14/8 thun ini. Indonesia urak ini daok labaih 11.000 palei oh ka hu ndien. Kayua ini lac bruk kham merat di rajaei piah ngak hu siam taong abih hu pandar ndien pakat negar dalam thun 2029.

Mentri Pablei salih Trung Quoc ndem tagok oh njauk hatai ka bruk Metri Quoc phong Mỹ ba dom jabat roh duah di taneh ia ini tame sarak taong phat. Trung Quoc iew Mỹ brei cakak padeih bruk “ ngak jak oh njauk bruk” ngan haong dom jabat roh duah di taneh ia ini, tui nan samar pasiam veik dom jalan bo Bac Kinh lac suan, piah khik hu sumu gauk, oh lac negar ini negar diah.

Langik pandiak me-om tagok rilo labik di gah Kreh negar saong gah meraong negar Mỹ meng 38 tal 49 do C. Anak dom bruk sraw kadau di langik, jabat chuc nang My kakei bhap bini, abih di nyu lac uranaih, urang taha umo saong dom urang hu ruak dalam rup, takik tabiak gah langiu tuk langik pandiak, menyum ginup ia, tui nan duah mai dom labik hu mac ngak la-ar atau dom pasak plaik njiak pandiak piah trun pandiak dalam rup saong gah langiu  oh sumu gauk./.