Ban raya HCM kham ngak ba hu tal thun 2027, hu taong abih dom radaih buyt dalam tinh ban peih meng ndien atau xang hacih; dahlau thun 2030, taong abih radaih buyt, taxi salih tapa peih meng ndien atau xang hacih saong hu meng 15 tal 20% pabak bruk nao mai meng radaih buyt, piah plaik njiak bruk gar tavak jalan. Piah ngak hu bruk an, TPHCM peih ngak sumu dom bruk, dom jalan ngak brei parilo radaih  pajeng tuai; salih bruk pandar radaih hacih gam takik radaih patuh; patagok ndo thi, ha tang daong jalan mbak nao mai di bhap bini.

UBND xã Long Phú, ban raya Can Tho peih bruk tabiak ung dung tri tue nhan tao (AI) saong dom nen tang duh ka bruk salih pandar kong nghe so dalam dom jabat, don vi dalam xa. Bruk ba dom nen tang taka so tame ngak bruk piah salih jalan khik iek, ngak bruk, palagaih jalan salih birau bruk ngak di karja, tui nan dak padang karja so, pamong tal bruk duh ka bhap bini saong doanh nghiep dak harei dak siam.

Piah pachreih urang jakar naih joi mai ngak bruk, tinh Vĩnh Long  daong 300 trieu dong ka yaok urang jakar, vien chuc hu ba nao bac tien si, thac si 100 trieu dong. Urang hu bang tien si  bac dalam negar hu daong 300 trieu dong, thac si 200 trieu dong. Sarak ini caong khin rik tame pachreih kapol urang ngak bruk hu ilamo naih joi, abih di nyu lac dom gah khoa hoc, kong nghe saong salih taka so.

Bol lin duah, pataom atau talang liet si di Bộ Tư lệnh TP.HCM duah mboh, kuac mek saong pataom hu 8 atau talang liet si di labik Bein bingu Lê Thị Riêng. Kuhria tal abih harei 27/7, bol lin duah mboh saong pataom hu 125 atau talang liet si. Tukvak anak tal, Bộ Tư lệnh TP.HCM tacei ba bol lin peih praong labik duah di Bein bingu Lê Thị Riêng, tui nan pambuak kajap haong dom jabat chuyen mon, urang saong dom don vi pambuak bruk jhul pakhang bruk duah, pataom atau talang liet si.

Kapol duah, pataom atau talang liet si di Bộ Chỉ huy Quân sự ban Đồng Nai (K72) pataom hu 4 atau talang liet si di sa lubang di bein ca su 97 di Nong truong Cao su Bình Long, xã Minh Đức (lac huyện Hớn Quản, tỉnh Bình Phước dahlau diah). Di kubo ka 2 dalam lubang nan, langiu dom kaya kan  bhian pandar bol lin daok duah hu sa kalam mbut mbi hu srak huroh akhar “Tiến Quy”,  gam dong ho tangin, camin meta, vi kadung buh harak ba-ar akhar par peih saong blah thaot binguk dua drei cim katrau.

Rajaei Hàn Quốc kham merat ngak tui dom sarak khik yaom xang menyek tani tanat. Hàn Quốc jeng brei cakak trun jien je xang menyek saong ngak dom jalan daong meyah yaom xang menyek daok tagok veik. Dom sarak nan piah daong brei trun takik jien cai pandar di bhap bini, abih di nyu lac dom urang ngak bruk gaok kan kandah kayua yaom xang menyek. Tui nan, pakhang bruk langyah dom bruk blei piah pablei saong ngak tagok yaom xang menyek dreih yau dom janih kaya kan, rik tame khik brei tani tanat.

Puac adit tapa, Iran khan brei thau padeih dom bruk mesruh meyah Mỹ padeih dom bruk ngak bol lin, piah ba mbuan lagaih ka dom bruk ginum biai. Bruk nan dui atah yaom xang menyek Brent saong yaom menyek di Mỹ trun hu labaih 5%, trun daok labaih 92 saong 85 USD sa thùng. Yaom xang menyek trun ngak khat jien padai dui dunya, tapa nan khik brei kajap dom caong khin di gilang negar  oh kuhria jien laba.

Cảnh sát Bồ Đào Nha pacang caga sa gilai peih drah samar pajeng  labaih 2,6 tấn cocaine di langiu tathik Lisbon saong chap khik hu 4 urang, dalam nan hu 2 urang Tay Ban Nha, sa urang Albania saong 1 urang mai meng Gibraltar. Dom cocaine kuhria yaom darak pasar labaih 500 trieu euro ( sumu 570 trieu  USD). Urak ini, dom kapol nyaom  bhian pandar gilai peih drah samar  meng 10 - 16 met saong meda peih hu labaih 130 km sa mon piah pajeng dom janih kaya pakauk./.