Mbang nyaom oh bhian mbang ka 1 di Quoc hoi mbang XVI peih ngak meng harei 3 tal harei 24/8/2026, pasang iek, langyah 31 asar kadha hu makna praong dalam, dalam nan hu 15 danak dak hukum saong 4 danak dak Sarak hukum karja. Ong Nguyễn Văn Hiển, Pho Akaok Jabat Quoc hoi khan lac, ini lac mbang nyaom oh bhian mbang akaok meti di Quoc hoi mbang XVI, hu peih ngak dalam tuk bruk ngak hukum biak praong saong caong khin brei cakrok patagok khang kajap dalam bruk ngak hu siam lagaih sarak dak harei dak samar.

Uy ban Mat tran Negar Viet Nam TPHCM pambuak haong Sang iek ruak Quan y 7A peih bruk pasang iek prein yawa bhap bini di 10 xã dahlau di bhum taneh cach mang xa an toan khu di Ban raya HCM. Ong Nguyễn Phước Lộc - Pho Bí thư Thành ủy, Akok Uy ban  MTTQ Viet Nam TP.HCM brei thau bruk ngak ini rik tame brei mboh bruk ngak, angan je saong hatai anit ranam di Bol lin bhap bini Viet Nam ngan haong Bhap bini di dom bhum taneh cach mang di ban raya HCM.

Ban raya Dong Nai kham merat tal abih thun ini hu 10,6 bac si kuhria dalam 10 ribau bhap bini. Dalam nan pamong tal bruk kham merat tal abih thun 2026, taong abih bhap bini hu iek glang prein yawa  atau iek ruak oh mek jien  takik abih sa mbang saong padang ho so Prein yawa dien tu  tui raidiuk. Gah Y te brei padang ngak bruk patagok y te vaktu 2026 - 2030; jhul pakhang bruk bhap bini rik daong tame y te,  pachreih bruk buh jien tame ngak mbang, paglong bruk taong ruak, pabak ginup jru tavao, kaya y te saong  pakhang bruk pasang iek gah jru tavao, kaya mbang hacih sa-at.

Meng akaok thun tal ini, palih sa harei dalam sa adit UBND xa Ham Tan, phuong Phú Thủy, tỉnh Lam Dong (tinh Binh Thuan klak) peih ngak kadha “ Pang saong dak dalikan haong bhap bini”  atau “ Caphe page haong urang ngak praong”, di jabat ngak bruk xã. Tapa dom bruk ngak ini, karja di Lam Dong langyah hu rilo bruk gal tavak harak gal, daok rik tame pabak hatai jia, padang ngak hanh chinh mek bruk bhap bini njauk hatai piah thau ka bruk ngak njauk di karja.

Ndem tal bruk suai bayar jien blei padai di rilo baoh sang, Jabat chuc nang tinh Ca Mau birau peih bruk ndem meyai nao mai di Kong ty THHH Tap ndoan nong nghiep hacih Dunya, HTX saong bhap bini piah duah jalan langyah. Tui mikva, bruk doanh  nghiep suai bayar jien blei padai tukvak tapa ba tal rilo baoh sang gaok rilo kan kandah. Lambaok kong ty taduan bruk daok tavak jien padai di bhap bini. Bruk ndem biai nao mai hu panuac sanya birau di doanh nghiep, yau nan min, ngan haong urang ngak nong, kan kandah nan hu lang talaih tuk bayar hu abih jien.

Tui kuhria di jabat chuc nang Singapore khan brei thau, kuman ndih tapui tabiak di taneh ia ini dalam thun 2025 trun biar abih dalam 60 thun tapa, mbang akok meti trun ala 30.000 uranaih. Urang ilamo kakei lac, bruk takik ndih tapui anek suai lavik di Singapore mai meng bruk dak harei dak hu rilo urang palih ruah oh khin tok diuk tok pasang, rilo diuk pasang lakhah umo praong thun, oh ndih tapui anek, atau takik anek.

Kuhria tal kreh bilan 7 chau Au saong di dom negar jaik taphia hu 33 mbang urang nyom virus gah Pei kraong Nile njom mbak di bhap bini di 5 taneh ia. Urak ini oh hu vaccine jeng yau oh hu jru taong ruak virus ini, bruk jru ruak pataom tame pasang iek ruak saong daong ka dom urang ruak trak. Yau nan ye, Gah Y te dunya iew dom taneh ia pakhang bruk pacang jamoh pambak ruak saong jhuk pakhang bruk pathau khan piah paglong jalan sahaneng di bhap bini.

Dua sang daoh hu meng kan mai di bhum Amazon di  Brazil  hu Gah Pato megru, Khoa hoc saong Ilamo Lien hop quoc taduan lac Drap ar Dunya. Dua sang daoh nan hu padang ngak di puac abap XIX, ndung bak bruk padang ngak tui kien truc chau Au saong brei mboh bruk cakrok patagok di bhum Amazon. Ini lac dom drap ar ilamo akok meti di bhum Barak Brazil hu UNESCO ba tame Sarak Drap ar Dunya, taong yaom bruk hu makna praong dalam kham merat khik ramik saong yaih khan dom ilamo sajarah dakrai, ilamo di bhum Amazon./.