Ban raya Ho Chi Minh bahrau pok meyaom 329 urang “Dam dara naih gheih Ban raya Ho Chi Minh ngak tui panuac Wa Ho” mbang ka I. Dom urang hu pok meyaom di taong abih gah,…dalam nan hu ca si Phương Mỹ Chi, Nguyễn Duyên Quỳnh,… Tapa bruk pok meyaom, Ban Ndoan Ban raya Ho Chi Minh taduan hu bruk kham merat bac pasram, daong prein ka urang ndoan, dam dara patui veik patagok hatai saneng ka bruk di drei, caong takre buh prein drei tame ngak.

Tinh An Giang mbaoh tangin daong gru pato sap ndom saong akhar huroh Khmer, Cam, Lo 30.000 dong/ sa tiet bac. Yaok tal bac brei hu takik abih 15 urang hu mbaok tame bac. Urang pato brei hu thau puac, vak saong pandar sap ndom, akhar vak di bangsa hu pato; Hu mbaok tame pato meng hatai halan tian, thau ka bruk di drei saong hu bhap bini, labik peih tal bac jao brei bruk pato.

UB Bhap bini ban raya Dong Nai peih bruk pasang iek prein yava yaok tukvak atau pasang iek halang palih oh mek jien takik abih yaok thun/sa mbang ka rahra dalam ban. Tui nan, ban raya Dong Nai kham merat tal abih thun 2026, 100% rahra, anek saih, urang ngak bruk hu pasang iek prein yava yaok tukvak atau pasang iek halang palih oh mek jien takik abih 1 mbang dalam 1 thun. Bruk pasang iek ruak hu ba tagok harak prein yava online saong pataom di angaok ung dung VneID. Taong abih jien buh tabiak kuhria lac labaih 1,3 ribau ty dong.

Labaih 1.000 urang ngak kong, urang ngak bruk di ban raya Can Tho hu mbaok tame Danak dak “Harei nyaom jao brei prein yava ka urang ngak kong – Brei ka sa Viet Nam khang kajap thun 2026”, ngan haong rilo bruk pasang iek ruak, pathau khan ka prein yava, alin hadaih ndap nda saong pathau khan paglaong ilamo ka bruk sangka prein yava. Taphia di bruk pasang iek prein yava, urang ngak bruk daok hu mbaok tame rilo labik ba drei tame tui yaok asal kadha prein yava, daong taom gaok haong ilamo gah y khoa meng bruk hu mboh di anak meta, mbuan thau saong jaik taphia.

Di tinh Dong Thap patui veik rah tabiak 2 labik glut jaleih taneh tapen kraong trak di xa Hội Cư saong Thanh Hưng. Dom labik glut jaleih taneh ini ngak pacang cakak jalan mbak, ngak kan kandah tal sang danaok, drap ar jien padai di rahra. Urak ini jabat karja hu mai pasang iek dom labik glut jaleih saong pandar karja palei 2 xa daong rahra njauk kan kandah kayua glut jaleih taneh panduan ba ndap nda kaya pandar dalam sang, danak dak ha tang ky thuat nao tal labik siam mekre salamat. Piah ka suai atah, jabat karja hu ba tabiak dom jalan ngak pasiam tui njauk adat hukum.

Mentri Ngak nong Mỹ kuhria brei thau Philippines meda blei tame labaih 5,7 trieu tan brah dalam thun ini piah pabak brei ka halaw brah dalam negar daok kurang kayua padai brah ngak tabiak hu takik, jien buh tabiak ngak glaong saong mbuan kurang aia duh ka bruk ngak mbang pala drak. Negar ini jeng patrun bruk pathau khan brah chai dalam thun ini di Philippines trun daok labaih 12,3 trieu tan. Makna di nyu njauk ndom lac jien buh tabiak ngak tagok, abih di nyu nan lac khak drak tagok glaong ngak ka urang nong patrun bruk peih praong taneh pala drak.

Bruk kuhria dut iek jaik di ini hu brei mboh rilo urang My jeng maong ilamo negar lac sa banah hu makna dalam rai diuk, yaom lac tanut mboh hadah mbaok meta ngan haong dom yaom kaom ilamo di negar hu patrun dut saong dom thun dahlau. Urang praong thun umo saong urang cu tri Ndang Cong hoa maong ilamo negar hu makna jang dut saong dom kapul cu tri karei. Bruk ini rah tabiak dalam vaktu negar My rah tapa rilo bruk srau dhau, meng tukvak akaok bahrau ngak bruk di Tong thong Donald Trump, jit ruak COVID-19, palai pajua tagok tal dom sarak khang catang ka bruk urang negar langiu panduan tame mai daok saong bruk pambuak haong gah langiu negar.

Apple brei ba rilo bruk pabak bruk sir kandauk tal urang pandar aval drah jang dut saong bruk bhian randap dahlau diah, salih ka bruk cang ba tabiak haong phien ban bahrau di he dieu hanh iOS. Bruk mbaoh tangin ini piah patakik tukvak meng tuk dom baoh ban pasiam hu ba tabiak tal tuk hu ba tame dalam kaya ndap nda di urang pandar. Bruk patagok di tri tue nhan tao daok daong jul samar luac jalan ngak tabiak dom bruk taong tame di angaok mang, ngak ka tukvak piah ka kol klaik khau tin pandar dom bruk hueng di bruk sir kandauk hu duah mboh dak harei dak dui katut.