UB Bhap bini Ban raya Ho Chi Minh tacei pato samar padang ngak sarak Hukum Ban medin karei crih piah pok tagok dom pakat hu tham quyen langyah mong iek, salah blaoh danak dak Hukum dalam bilan 7 anak tal. Dalam nan, dahlau harei 20 bilan 6 brei ngak salah bruk taduan panuac di dom jabat hu thẩm quyền; suai abih lac harei 1 bilan 7 salah piah pok tame  pakat hu tham quyen suai abih lac akaok adit di balan 7 pabak ginup ho so. Yau nan ye, Akok UBND TPHCM jao ka Jabat UBND TP saong jabat gah nan brei pasang duah, brei pabak tame ginup.

Peih ngak tui jalan karja dua pakat, Quan khu 9 ramik peih nagk, paglong ilamo bol lin, bruk hu makna dalam thun 2026 pasram di labik pacang caga ka 130 don vi pakat xa. Gam haong nan, dom don vi brei jhul pakhang bruk ly luan chinh tri, paglong ilamo; pakhang bruk khik iek taneh quoc phong, kaya kan, khik brei cambaic laic jien padai. Ngan haong dom tinh taphia negar yau An Giang, Đồng Tháp, Quân khu iew dom gah pambuak kajap haong bol lin Bien  phong piah khik iek, bruk ngak po, khik kajap an ninh chinh tri di bhum taphia negar.

Bilan hajan daok jaik tal min rilo jalan mbak di tinh Lâm Đồng oh ka ngak pasiam glut jaleih, khut tayak meng bilan hajan thun dahlau. Yau ye jalan Raya 20, di jalan ceik D'ran nao tal Đà Lạt haong Phan Rang, hadei mbang glut jaleih taneh 60.000 met khoi patau daok ngak oh ka blaoh. Daok di jalan tapen ceik Prenn, yaom lac khan blaoh min  daok rilo labik di taluy mbon talah ngak gal jalan. Sở Padang ngak tinh Lam Dong khan lac, bruk ngak piah pasiam dom jalan mbak glut jaleih taneh saong khut tayak daok suai damuai.

Rahra bhhap bini daok diuk rai di kabik akaok kraong ribaong ba ia tame binek ia  Phước Hòa, tapa xã Nha Bích, ban raya Đồng Nai khan brei thau bruk ikan metai ndon angaok ia dui atah jaik sa adit ini, ba tal rilo bhap bini biak haduh hatai. Hadei tuk brei mboh bhap bini, UBND xã Nha Bích  padang kapol nyaom pasang iek, pambuak haong  dom jabat chuyen mon mek mau ia piah langyah, duah thau kayua meng halei. Karja  bhum palei jeng kakei bhap bini juai mbang ikan metai atau ngak kaya mbang ka athur raong, manuk ada piah khik caga siam ka prein yawa.

Jabat khi tuong mboh lac meng puac bilan 5, langik catang di bhum Meraong negar meda trun, hajan rah tabiak di rilo labik. Ia hajan meng ini tal harei 10 bilan 6 hu meng 170 -270 mm. Di balai Nhà Bè, TPHCM langik panjiak labaih 30 do C. Dalam tuk salih bilan, langik jhak meda rah tabiak hangin khang, hajan jakala klak, hajan patau di ralo labik dalam negar, pataom tame rilo jang di Barak negar, bhum ceik Kreh negar saong Meraong negar.

Meng akaok bilan 5 tal ini, Campuchia rilo mbang patrauk abih hu jaik 3.700 urang negar langiu ngak suan hukum negar ini. Njauk ndem tal, hu jaik 2.000 bhap bini rahra Trung Quoc  pambuak tal kol dius kong nghe. Mentri Noi vu Campuchia mboh lac, bruk tabiak ngak catang bruk sanya di Rajaei Patao negar ini ka bruk ngak tui hukum, kham merat ngak brei abih cih kol duis kong nghe glong saong chap mek dom kol pachot pagat.

Lien minh chau Au (EU) daok kuhria caga ngak tui dom hukum birau piah ngak catang kaya kan yaom lap meng negar Trung Quoc. Tui taka so di EU, thun dahlau hu tal 5,8 ti kaya kan hu pajeng tame dom taneh ia EU, glong 4 mbang dut saong thun 2022, dalam nan hu labaih 91% mai meng Trung Quoc. Tui jabat khik iek urang blei pandar di Prang Pháp, labaih 75% kaya hu pasang iek angaok blah website dien tu oh njauk tui hukum ba tabiak di chau Au.

Kadung Jien Uranaih LHQ khan lac, kuhria meng akaok thun 2025 mbiah tal ini, 70 uranaih Palestine kayua bollin Israel pemetai di Bờ Tây saong Đông Jerusalem. Urang brei panuac di Kadung Uranaih LHQ, ong James Elder kakei dahlau dom mbang taong tame uranaih Palestine di dom bhum taneh kol nyu padang bol lin, brei mboh oh lac tha atau dua klau mbang, bo rilo mbang dui atah sa dalam dom bala jhak abih taong paoh uranaih.