Page ini 30/6, Ban raya Ho Chi Minh peih bruk mong iek veik Harei Pahadar 50 thun Ban raya Sai Gon – Gia Dinh hu hadah mbaok meta mek angan Chu tich Ho Chi Minh (2/7/1976-2/7/2026). Harei Pahadar 50 thun Harei Ban raya Sai Gon – Gia Dinh hu hadah mbaok meta mek angan Chu tich Ho Chi Minh hu peih ngak biak praong prang di page harei 2/7. Tukvak nan, Ban raya Ho Chi Minh brei peih ngak rilo danak dak yau ye: adat cuh gilau nyang, paling bangu, peih ngak dom danak dak salam uan, danak dak seni nghe thuat hu papar binguk gheih karei pambuak Ban raya Ho Chi Minh - Bình Dương -  Ba Ria – Vung Tau (klak), parang iek tanrak hadah seni nghe thuat 3D Mapping saong cuh phao bangu di 16 labik dalam bhum.

Bo Tu lenh Bhum Canh sat tasik 4 bahrau peih bruk pathau khan Hukum Canh sat tasik Viet Nam saong dom adat di hukum ka bruk pacang taong mek ikan hadang suan hukum, oh pathau khan saong oh ngak tui adat (IUU) ka 1.000 urang di dom xa, kaoh pulao di An Giang. Tapa nan daong paglaong ilamo ngak tui hukum ka rahra. Tukvak ini, Bo Tu lenh Bhum Canh sat Tasik 4 hu jao alin brei 70 paok pandap) yaok paok hu yaom sa trieu dong) ka dom baoh sang mbang tui sarak saong baoh sang urang nao tasik hu rai diuk kan kandah.

Tinh Dong Thap mbaoh tangin ka jalan buh jien tame Danak dak Labik ngak kong Jit vu menyek Soài Rạp, prong labaih 285 ha, ngan haong phun jien buh tame labaih 2.750 ty dong. Ini lac labik ngak kong daok di pabah kraong, tapen tasik bien Dong biak hu pren khang piah cak rok patagok, dui pachreih buh jien tame. Dong Thap ba tabiak jalan ngak tal thun 2030 jeng tinh hu gah ngak kong patagok samar, tui jalan bahrau, karo kajap, hu jeng prein khang cak rok patagok kinh te. Ini lac bruk palih ruah njauk lagaih tuk tinh hu kein lagaih lac bhum pandap tamo kaya nong praong.

129 phuong xa saong majam Jabat Tut angan taneh riya; Pasak Duh bruk karja di Ban raya Ho Chi Minh brei ngak bruk di page harei Sanecar piah langyah harak gal karja ka rahra. UB Bhap bini Ban raya jeng pandar dom jabat, labik ramik caga urang jakar ngak bruk di page harei Sanecar hu padeih pabak di dom harei karei tui njauk adat. Bruk oh meda ramik caga padeih padei pabak brei ginup tukvak, jabat labik nak  brei bayar jien bilan ngak bruk tagok tukvak tui adat hukum di karja.

UB Bhap bini tinh Vinh Long bahrau ba tabiak Jalan ngak tui dom danak dak jalan ngak pakat negar ka bruk padang palei pala bahrau, patrun kathaot karo kajap saong patagok kinh te – xa hoi bhum mikva urang bangsa takik saong bhum ceik tukvak thun 2026 – 2030. Dalam nan jalan ngak tal thun 2030 kham merat oh daok xa, puk palei biak kan kandah dalam bhum mikva urang bangsa takik; labaih 95% dom xa bhum mikva bangsa takik hu buh jien tame ginup ka ha tang njauk hu piah duh bruk patagok kinh te – xa hoi. Hu meng 40% ba tagok lac urang ngak bruk bangsa takik hu pato pakai bruk ngak.

Mentri Noi vu Thai Lan daok peih praong bruk pasang iek duah mek dom majam gah ngak mbang pablei salih langiu negar “ndih dalam halui” urang di bhum palei piah ngak bruk suan hukum. Pasak di nyu lac tinh Phuket, labik bo gah urang jarka daok peih bruk pasang iek labaih 10.000 jabat ngak mbang pablei salih. Mentri Noi vu Thai Lan khang panuac lac dom bruk ini hu langyah tui njauk danak saong adat hukum, yaom lac dom urang jakar hu pambuak pagam tal, meyah hu bruk palao bal bruk pasang iek atau daong bruk ka dom bruk suan hukum.

Mentri Kaong ribaong Trung Quoc hu peih dom jalan pacang caga anak dom bruk mbuan ba tal hajan praong saong ia sua di rilo tinh ban di bhum Meraong negar ini. Tui kuhria, meng harei ini tal harei 3/7, hajan praong meda rah tabiak di rilo tinh ban di Trung Quoc. Mentri Kraong ribaong pandar dom bhum palei patagok bruk tui iek langik tasik, jhul khang bruk kuhria dahlau, kakei caga aval saong caong khin khik kajap bruk ngak salamat, siam lagaih dom danak dak kraong ribaong.

Labaih 145 trieu rahra My daok mbuan gaok pandiak bhang catang dalam adit padeih padei Harei Negar 4/7, tuk sa mbang pandiak bhang rah tabiak me-om taong abih binah bhum taneh gah Pur saong Kreh Pei  negar ini. Nhiet ndo dalam dom harei anak tal hu kuhria meng 32 tal 38 ndo C, tanut nhiet hu mboh meda tagok tal 40 tal 46 ndo C. Dom urang ilamu gah langik tasik kuhria brei thau dahlau jaik 100 ky luc nhiet ndo glaong abih dalam harei meda njauk tayah di grauk negar My.