Page ini, di Ban raya Ho Chi Minh, Tong Bi thu, Akaok Negar Tô Lâm mai hu mbaok saong ndom meyai di harei pahadar 50 thun ban raya Sai Gon – Gia Dinh hu mek angan Chu tich Ho Chi Minh (2/7/1976 – 2/7/2026). Ini lac danak dak chinh tri hu makna di mbang pahadar, brei mboh makna sajarah mbaoh tangin di Quoc hoi ka bruk brei angan ka Ban raya Sai Gon – Gia Dinh lac Ban raya Ho Chi Minh. Khan  veik ka hatai anit ranam praong dalam di Wa haong bhap bini bhum Meraong sa tian, Tong Bi thu, Akaok Negar pandar saong caong khin Ban raya Ho Chi Minh brei oh padeih uak drei tagok, patagok khang catang jang, siam mekre jang, anit ranam jang, piah njauk laaih haong hatai je anit ranam, bruk caong takre saong hatai mboh hadah mbaok meta di dalam negar.

Page ini, di Mblang kabo Liet si ban Can Tho, Mban Tacei pato 515 ban Can Tho peih ngak adat pok gilau saong ba 670 klaih kalang liet si oh ka duah thu hu thong tin dut iek ADN di Vien Phap y Bol lin (Ha Noi). Kadha mek hu dalam bruk dut iek nan lac co so du lieu prong piah pagam hu njauk halei haong gilang gen di guak gar manauc urang dalam sang; tapa nan, brei thau ka angan je ka urang liet si, pabak hatai caong khin di dom baoh sang hadei di rilo thun cang mong. (VOV) 

Mentri Jien padai ba tabiak bruk patagok tanut brei mesraiy rilo abih ngan haong anek saih, sinh vien baoh sang kan kandah meng 4 trieu dong taok 8 trieu dong/ bilan. Tanut mesraiy jien bahrau piah njauk haong bruk tagok trun di jien pandar dalam raidiuk, jien bac megru saong khik kajap daong labaih 60% taong abih jien bac megru di urang bac. Mentri Jien padai brei thau, dalam 19 thun peih ngak, danak hu tapa 7 mbang pasiam tanut brei mesraiy rilo abih.

Anak bruk glut jaleih tapain ar kraong, ribaong daok rah tabiak catang, UBND tinh Đong Thap mboh tangin tame dom danak dak pasiam veik samar drah dom labik glut jaleih ngan haong taong abih phun jien buh tame jaik 14 ty ndong. Nan lac dom danak dak hu peih ngak di dom xa Kim Sơn, Bình Hàng Trung saong Bình Trưng, pataom tame pasiam veik dom labik glut jaleih mbuan ngak pambak tal sang danaok, jalan mbak nao mai saong rai diuk bhap bani dalam labik njauk pambak di bruk glut jaleih.  

Akaok UB Bhap bini tinh Vinh Long pandar patagok bruk pasang iek, langyah catang dom bruk raong, pajeng ba saong pablei tabiak nduong li-u suan hukum. Nduong li-u lac janih ngak kanjah jhak ngan haong phun li-u saong rilo janih phun paneing, phun li-u. Vinh Long hu laaih 122.000 ha li-u, meblah labaih 61% taong abih taneh li-u dalam negar. Kayua nan, bruk pacang cakak pablei nduong li-u hu makna dalam bruk pacang khik kaya tamo saong patagok karo kajap gah li-u.

Tong thong Lee Jae Myung hu mboh tangin pok amuk Han Seong-sook ngak Thu tuong Han Quoc. Dalam sa kadha pathau khan akaok mereip, amuk Han brei thau meda kham merat abih drei piah ba Han Quoc jeng sa taneh aia oh meda panduan salih hu, brei mboh Raja-ei meda buh jien tame ngak ka nyu prong jang dalam gah tri tue nhan tao (AI) saong dom gah ngak kong patagok. Amuk Han nan lac urang kamei ngak Thu tuong ka dua dalam dak rai sajarah di negar ini.  

Hajan praong dui atah dalam dom harei tapa di dom labik gah Pai Meraong Japon, ngak jaleih taneh saong ia sua trak. Rilo bhum palei hu brei panduan yaok ribau rahra kayua bruk mbuan jaleih taneh meda rah tabiak.Dalam harei ini, hajan praong patui veik rah tabiak di jaik abih dom bhum palei…Jabat Dut iek kuhria langik tasik kraong ribaong Japon daok ieu rahra bhap bini caga bruk meda rah tabiak jaleih taneh, ia sua di kraong, ia ndik tagok glaong.

Mbaok aia tasik ndik glaong daok ngak ka bruk njaom mbak di dom bhum taneh tapain tasik Bangladesh dak harei dak triak, ngak kanjah jhak tal an ninh halau aia, pren yava di bhap bani saong bruk mbang angui di yaok pluh trieu urang di taneh aia Nam Á. Roh duah kuhria dahlau mbaok aia tasik Bangladesh meda ndik glaong jaik 32 cm dalam thun 2050, ngak brei patagok bruk mbuan njaom mbak, aia ndik aia sua saong glut jaleih di dom labik tapain tasik.