Pathau khan samar di dom gah ngak mbang pablei salih jirah rivang di Ban raya HCM brei mboh, tuai damuai tut angan tour di bingun padei Harei Negar 2/9 thun ini hu tagok labaih 50% dut saong tukvak ini thun dahlau. Mbang padeih padei dui atah 5 harei brei tuai damuai lagaih ka luac jalan, meda hu nao atah jang saong srap gap kakei blei tour aval jang. Bingun padei harei 2/9 thun ini, salih ka bruk pataom tame sa labik mai tal ye bruk roh duah brei mboh bruk neh rabha biak cambaih laih tui hatai caong khin jaik taphia langik tasik.

“Lam Dong - Ragam daoh la-ar Hijao” lac kadha di Nyaom biai tacei pato dom jalan patagok yulit vaktu 2026 -2030, pamong tal thun 2040 kayua UBND tinh Lam Dong peih ngak birau ini. Hadei pagam tame, tinh Lam Dong birau hu labik ngak yulit praong jang, ralo jang  hu rilo lagaih ka drap ar, labik ngak mbang duah jien tame saong pambuak dom bhum, dak harei dak hu kein laba pambuak “ Bhum ceik glong - Tathik – Taneh riya” tame patagok dom kaya yulit karei barik, asar siam.

Trai he Dam dara Viet daok negar langiu saong Dam dara Ban raya HCM mbang ka 19 lac talei pambuak rai rah sit umo Viet daok di negar langiu haong halau agha bangsa negar. Danak dak pataom 50 lambaok vakil lac dam dara urang Viet Nam daok di negar langiu mai meng 17 negar saong bhum taneh. Ini jeng lac danak dak ngak bruk lagaih akaok meti di Ban raya HCM piah ngak cambaih laih Sarak di Mentri Chinh tri ka bruk ngak ngan haong urang Viet Nam daok di negar langiu dalam jaman bahrau.

Dalam harei kabroi saong harei paguh 30/8, UBND xã Liên Sơn Lắk, tỉnh Dak Lak peih harei  Roya Alak tapai di urang M’nông tapen danao ia Lak mbang ka sa. Peih ngak 10 bruk ngan haong kadha “Men mebuh di ceik glai - Suan thrap M’nông taphia danao Lak”. Ndem ka bruk pakacah Patao Tapai; ngak lan am di urang M’nông; ngak men saong ngak tapai; dom kadha ma-in; ndik lamen, ngak gilai kayau, yaih khan kaya, ilamo saong patagok bruk yulit di bhum palei. 

Tui So Y te Dong Thap, meng akaok thun tal ini, dalam tinh taduan jaik 5.500 urang pandiak tabiak darah, tagok 83% dut saong tukvak ini thun dahlau. Dom urang njauk ruak tagok glaong dalam tuk bilan hajan daok rah tabiak ngak ka bruk mbuan njauk ruak patui veik tagok. Tien si, bac si Đỗ Quang Thành, Phaok Yam ndok Sang iek ruak Da khoa Tien Giang, brei thau tukvak meng harei ka klau tal harei ka tijuh di ruak meda lac tukvak kan kandah. Tuk uranaih daok ruak pandiak rup glaong blaoh katuak patrun pandiak rup, amaik ame brei patui veik tui iek tani tanat, kayua uranaih meda yam tame tukvak shock kayua ruak pandiak tabiak darah Dengue.

Gah ngak tabiak alat ragam tui kong nghiep di Australia brei atah klak dom kadha daoh ngak meng AI tabiak truh angan dalam sarak. Sarak piah khik hu bruk hadah krah di anek manuac anak bruk patagok samar di kong nghe AI ngak tabiak. Tui nan, kadha daoh hu ginup piah dak angan meyah hu urang cih vak, daoh saong ma-in dom alat ragam. Dom kadha daok kayua AI ngak meda oh brei pacacah.

Ban sit Bunol di Tay Ban Nha bahrau jeng bruk njauk caik hatai sangka di dunya kayua raya glam parah traong ndaiy praong abih dalam dunya. Raya La Tomatina – labik sambo bhong sir jalan ban medin, sap klao gam haong dom baoh traong ndaiy tathak, hu glam parah dalam bruk bui sambai saong chreih chrai. Gah peih padang ngak hu srap gap 150 tan baoh traong ndaiy, srap gap ka harei raya. Kuhria raya adat thun ini brei dui pachreih labaih 22.000 tuai damuai meng grauk labik dalam dunya.

Jabat khik iek dữ liệu di Brazil taong phat ByteDance, kong ty amaik di TikTok hu labaih 153 trieu  real, sumu jaik 30 trieu dola, ngan haong bruk ngak suan hukum khik du lieu urang di uranaih saong dam dara. Tui panuac khan, TikTok tavak pataom saong langyah khaw tin di uranaih pandar, tuk tame tai khoan gam dalam dom blah web oh tame, min oh hu hagait cambaic laic atau dom jalan ngak piah khik caga ginup./.