Biar harei 26/8, di TPHCM, Quan khu 7 peih nyaom biai mbaoh harak danak dak pambuak bruk pathau khan haong dom jabat bao chi vaktu meng thun 2026 -2031. Brei panuac di nyaom biai, ong Nguyễn Ngọc Năm, Yam ndoc Jabat Rayo sap ndem Viet Nam di TPHCM khan lac “ Bruk ngak 500 harei melam jhul pakhang bruk duah, pataom saong brei thau angan atau talang liet si” lac asar kadha pambak praong, tuk halei  jeng hu bhap bini caik hatai sangka, njauk ndem tal mang xa hoi. Tui ong, bruk pathau khan  tukvak anak tal brei khik sumu dom khaw tin patagok kinh te - xa hoi bruk khik iek quoc phong, salamat…

Piah kuhria lagaih bruk duh ka thun bac birau, UBND tinh Dong Thap mbaoh harak kuhria abih tih labaih 116 ti dong ramik pasiam ndap nda, sang bac. Dom don vi daok jhul pasamar, kham merat ngak salah dom danak dak, kuhria caga ka anek saih tame thun bac birau. Ta-eng 6 sang bac pho thong gam bac gam daok di bhum taphia negar di tinh Dong Thap daok samar ngak, khik brei njauk tukvak ba tame pandar ka thun bac birau.

Jaik tame thun bac birau, dom gah, dom pakat, doanh nghiep saong kapol nyaom tinh Vinh Long peih ngak rilo bruk sangka kuhria, daong ka anek saih raidiuk kan kandah, daong ka dom adei hu lagaih mai sang. Di xã Tân Hào hu alin brei 3.000 blah tapuk siphau gam ralo kaya bac da-a saong alin ka anek saih raidiuk kan kandah. Xã Trà Cú alin labaih 1.180 paok jien bac yaom labaih 1 ti dong ka anek saih, sinh vien lac urang jakar, urang ngak bac megru naih joi…

Tinh Dak Lak peih bruk ngak tabung glong “ 30 harei melam” pasang iek, pandar so, gam pambuak du lieu ma taka so labik pala, labik papaok durian. Muk Đặng Thị Thủy, Phaok Yam ndoc So Ngak nong saong Alam moi truong Đắk Lắk khan brei thau, bruk kham merat di danak dak lac salih jalan ngak mbang, khik iek saong pambuak darak pasar, ba mbuan lagaih baoh durian patagok, khik khang kajap, paglong prein yawa di dunya.

UBND xã Bàu Hàm, Ban Dong Nai ( dahlau diah lac huyen Trảng Bom, tỉnh Đồng Nai) daok peih brei labaih 1 ti dong daong ka 98 baoh sang bhap bini pala yaok pluh ha patei hangin ngak jaleih. Hadei di bala rah tabiak, UBND xã Bàu Hàm gam haong Ban Chi huy Phòng thủ dan su xã  jak ba dom bol lin daong ramik phun kayau jaleih saong tauk veik tabung sang ka mikva. UBND xã jao ka Jabat Kinh te pambuak haong dom jabat  chuyen mon, dom palei pasang iek saong ngak harak daong tui hukum karja.

Chreih chrai pahadar Mawlid al-Nabawi – harei menek Po Nabi Mohammad  hu peih ngak di ban ine Cairo saong rilo bhum palei di Ai Cập, hu dom kapol nyaom taduan raok di urang Islam Sufi  dan haong rilo bruk ngak ilimo meng kan. Dalam khan ao ngui cuh ralo sambo hadah mekre, dom urang ba tui hala dok saong huroh akhar di Sufi, gam taong hagal, bac koran, daoh dom kadha pok meyaom Po Nabi Mohammad  saong sampayang.

Sa mbang duah thau birau ini di Mỹ bu mboh dang Dan chu  daok hu lagaih jang đảng Cộng hòa ka jien padai ngak bruk, tapa nan mboh rilo kan ndah ka karja  Tong thong Donald Trump anak bruk palih ruah di bilan 11 anak tal. Tapa duah thau mbang akaok meti dahlau di ini  labaih 10 thun, cu tri taong yaom dang Dan chu glong jang Dang hoa ka bruk khik iek kinh te. 

Bol lin daong Nepal daok ngak bruk tapa melam piah duah yaok rituh urang lahik dalam mbang ribuk ia sua. Kuhria tal tukvak ini, canh sat Nepal khan lac, takik 157 urang metai saong 403 urang daok lahik, dalam nan hu 341 urang negar langiu. Tong thu ky LHQ Antonio Guterres khan lac dom jabat saong dom gah pambuak bruk kuhria bruk praong daong ka Nepal./.