Salam uan Pahadar 81 thun Katmang Bilan Dalipan saong Harei Negar 2/9 (1945 - 2026), Mbang Thuong vu Tinh uy Ca Mau peih ngak dom mbang jao alin Huy hieu Ndang brei ka 3.049 urang ndang praong thun dalam tinh. Ndom meyai di harei raya, Bi thu Tinh uy Ca Mau Nguyễn Hồ Hải, iek praong bruk taduan praong di dom rairah urang jakar, urang dang akaok tapa dom jaman tame bruk patagok haong gauk di bhum palei saong caong khin dom urang ndang maih gheih patui veik patagok bruk di drei, daong panuac ndom siam gheih, jum tangin ba Ca Mau jeng gah patagok hu makna di bhum saong negar.

5 thun tapa, bruk jak ba “ Bol lin daong gauk ngak mbang patrun kathaot, ngak mbang kinh te naih joi” di Ban Cần Thơ rik tame paglong raidiuk, jalan sahaneng di urang jakar, urang hoi. Rilo bol lin patagok jalan khin sahaneng, khin ngak, khang hatai buh jien tame ngak mbang, pablei salih, duah bruk ngak, paglong jien mek tame ka baoh sang saong bol lin. Dom pakat Kapol urang lin Ban Can Tho ngak brei patruh kathaot ka 756 baoh sang urang kathaot, 509 baoh sang urang jaik kathaot; urak ini daok 21 baoh sang kathaot…

UB Bhap bini tinh Dak Lak peih ngak rilo bruk pala phun hijao di dom Sang bac Pho thong Gam daok gam bac pambuak pakat Ia Lốp, Ia R’vê, Ea Rốc saong Buôn Đôn. Dom janih phun hu palih ruah rilo meng lac dom phun kayau, yau phun kagier juk, phượng vĩ, tagilao… Dom janih phun ini hu ramik di dom labik lagaih, piah brei halui, brei lagaih ka labik bac megru, me-in, padang labik pato megru hijao hacih sa-at.

Gah Jalan pasei pathau khan bruk pablei harak ve radaih apui Tet Đinh Mùi -Pabeiy Jim luac 2027 jalan pasei Hà Nội - Ban raya Ho Chi Minh, hu parabha jeng dua vaktu piah trun takik gar tavak saong brei ngak dahlau ka dom kapol urang ngak. Camereip, brei pablei harak ve ka dom don vi, kapol nyaom yau bol lin bol pan phao karaong bhap  bini, sang dai hoc, cao dang, khu kong nghiep, khu che xuat, dom kapol xa hoi, doanh nghiep, kong ty, dom don vi dalam gah Radaih pasei…Hadei di nan, harak ve hu peih pablei ralo labik ka tuai damuai.

Piah khik kajap bruk pabak ndien duh ka rahra saong dom danak dak hu makna dalam Harei Negar thun ini, Taong kongti Dien luc Ban raya HCM hu pato tacei dom labik dalam kapul oh ngak dom bruk di majam, ngak lahik ndien tuai damuai dalam tukvak padeih padei raya meng 0 tuk harei 29/8 tal 24 tuk harei 2/9, langiu di dom bruk rah tabiak bruk kan kandah atau hu caong khin karei, khik kajap bruk pabak ndien brei ngak dahlau ka dom danak dak.

Lien Hop Quoc sang Uy ban Chu thap do dunya iew da-a dom taneh ia padang ngak hukum dunya piah pakauk saong takik pandar dom phao ndao tu dong, bhian hu iew lac “ robot pametai”, kakei dahlau bruk pandar kong nghe patagok samar jeng hukum karja. Tong Thu ky Lien Hop Quoc Antonio Guterres ka dunya daok yam tal “ jalan paga bhong ka jalan diukrai” tuk mac jamaraih  meda ngak tu dong ngak ta-eng saong ngak kan kandah manuac sia…

Yaom lac oh gaok kan kandah tapak tal mbang ia sua theik saong jaleih taneh meng blaoh rah tabiak di labik tapen negar di Nepal saong Trung Quoc, min kayua hu rahra lahik bruk pambuak hadei bala, Japon saong Han Quoc hu dom bruk ngak biak samaar chip. Dom jabat lambaok di Japon daok samaar drah ngak dom bruk pacang khik rahra njauk hu. Dalam tuk nan, Rajaei Han Quoc hu pandar sa kapul daong samaar chip nao tal Nepal, hadei mbang ia sua theik praong ngak kan kandah tal rilo urrang, dalam nan hu urrang Han Quoc.

Ribaong Panama tui kuhria brei cakak trun kapal gilai nao mai yaok harei di bilan 9 anak tal, dalam tui jalan ribaong karaong ini brei lagaih haong bilan thu mai aval saong hajan takik. Jalan kraong ribaong brei langyah labaih 5% bruk pablei salih tui jalan tathik dunya ini raok hu meng 36 tal 38 mbang gilai nao mai yaok harei. Yau nan, meng harei 3/9, kapal gilai takik trun daok 32 mbang dalam sa harei meng harei 15/9.