Thu tuong Rajaei pandar UB Bhap bini dom tinh, ban samar chip padang jalan ngak taong abih ramik dak, paeih ngak di dom palei pala, to dan pho, pathau khan pakat uy sumu pakat dahlau tuk ba tabiak; salah blaoh harei 10-6. Gam haong nan dom tinh, jeng bruk salah blaoh danak dak ngan haong bruk oh chuyên trách di pakat xa dahlau harei 31-5. Pasiam taong abih, ramik caga kapul hu mbaok tame pacang khik an ninh, siam mekre di labik njauk lagaih ngan haong bruk ramik dak palei pala, to dan pho dahlau harei 25-5.

TPHCM daok ngak samar salah blaoh harak gal ho so piah pok tagok HĐND Ban raya  pasang iek brei buh jien tame ngak jalan  tapa tathik Cần Giờ - Vũng Tàu dalam bilan 6. Danak dak kuhria abih tih labaih 93.000 ti dong, kuhria padang ngak dahlau harei 2/7. Tui UBND TPHCM, ini lac danak dak hu makna praong, caong khin ky thuat glong, bruk buh jien tame ngak biak ralo. Yau nan ye, dom sở, dom gah saong don vi pambuak tal iew brei pataom tame abih gah, brei kuhria caga dahlau pambuak bruk tani tanat jhul pakhang bruk ngak “gam ngak, gam bac megru, gam ngak salah harak gal ho so”.

Piah pandar rilo abih kein lagaih patagok jirah rivang pagam haong mblang kapal ahaok par Long Thành, ong Vũ Thế Bình, Akaok Kapul Jirah rivang Viet Nam brei thau, Mblang Kapal ahaok par Long Thành jeng bruk hu makna, daong prein praong ka bruk patagok jirah rivang saong jitvu Dong Nai dalam harei hadei. Kayua nan, ban raya Dong Nai brei hu jalan buh jien tame khang catang, jhul samar ngak jeng bruk sinh thai jitvu vil mblang kapal ahaok par hu ginup kein lagaih, pabak hatai caong dak harei dak hu rilo di tuai damuai di negar saong dunya.

UBND tinh Vĩnh Long birau kuhria eik veik tha thun dak ramik don vi hanh chinh dom pakat saong bruk ngak di karja palei dua pakat. Tui taong yaom, dom bhum palei daok cuang kandah dalam bruk ngak. Ilamo ngak bruk di dom urang jakar di dom labik  oh ka sumu gauk; harak ho so online di dom gah ngak oh ka hu ralo…Yau nan ye, tukvak anak tal, tỉnh Vĩnh Long brei pasang iek, dak ramik, ba urang jakar tame ngak bruk piah sumu siam lagaih haong bruk ngak di karja palei tui dua pakat; jhul pakhang bruk pato pakai, pabak ilamo ka urang jakar.

Bruk prein yava di anek saih likei angan Đ.M.H, bac tal 8 di Lam Dong ta-eng pametai medil kayua bruk taong paoh dalam sang bac jeng daok dalam bruk kan kandah. Urak ini dom bac si Sang iek ruak Uranaih Ban raya Ho Chi Minh daok kham merat taong ruak pacang barah glo saong daong thuak yava meng jamraik. Tui amuk Trần Thị Kim Vân, amaik di adei Đ.M.H, dahlau tuk bruk nan rah tabiak, adei H. njauk sa kapul anek saih dalam sang bac taong paoh; pandar brei 10.000 tal 50.000 dong yaok harei. Meyah oh ba ginup jien ye kol nyu kuhria pabak tame dalam harei hadei, njauk taong paoh, puac pa-ua. Harak padaong di amaik ame adei H. likau ngak cambaih laih bruk taong paoh dalam sang bac, bruk gham, kateik geik brei jien yau bruk di dom menuac urang, kapul hu pambuak.

Gah barah negar Ấn Độ daok yam tapa mbang langik pandiak catang, di rilo labik panjiak tagok tal 45 do C. Jabat Khi tuong An Do brei khan tabiak tanut sambo kanjik  dalam 3 harei anak tal saong meda daok tagok pakat sambo bhong meriak di puac adit kayua panyiak catang, gam melam blau uh ang dui atah rilo harei. Langik salih karei ba tal dom mbang pandiak bhang di An Do mai samar jang, dui atah rilo harei jang saong dak harei catang, ngak kan kandah tal gah y te, nang luong…

Bol linh Katmang Islam Iran pathau khan lac dalam mon 24 tuk tapa hu 26 gilai, dalam nan hu gilai pajeng menyek, gilai container saong dom gilai pablei salih karei, hu nao tapa eo tasik Homuz tui bruk pambuak haong Iran. Jeng tui Bol lin Katmang Islam Iran, bruk gilai nao tapa jlan tasik ini jeng daok rah tabiak, hu dom harak brei adat hu mbaoh tangin haong kapul ini./.

Tong Yam doc Gah Y te Dunya (WHO) kakei ka jit ruak Ebola di CHDC Congo daok tagok rilo samar, takik abih 500 mbang urang njom ruak saong 130 urang metai kayua Ebola. Gah Y te Dunya kuhria pataom uy ban ginum biai chip piah tacei pato ba tabiak panuac  pasang iek jit ruak. Tui Gah Y te Dunya dom urang ruak  di ban do thi biak huac kandah, kayua virus  bhian njom mbak samar dalam bhap bini. Dom urang jakar y te jeng khan lac mbuan njom mbak di jabat iek ruak saong sang iek ruak./.