Mentri Noi vu brei thau, dalam quy II, hu salah blaoh bruk pathau khan taong yaom bruk ngak rabha pakat, rabha bruk tuk ngak karja palei 2 pakat, payua likau panuac di dom Mentri, jabat sumu Mentri; hu ba tagok Thu tuong Rajaei hu ba tabiak Sarak ka bruk ramik dak palei pala, kapul dan pho saong ramik, pandar, che do, sarak ngan haong urang ngak bruk oh chuyen trach di pakat xa, di palei pala, kapul dan pho. Tal ini, taong abih dom tinh, ban hu salah blaoh jalan ngak taong abih ramik palei pala, kapul dan pho, pabak njauk tukvak ngak kayua Thu tuong ba tabiak. Peih sarak ngan haong akaok palei, kapul dan pho hadei pagam bo daok labaih.

          Pahadar 101 thun Harei Bao chi Cach mang Viet Nam (21/6/1925 - 21/6/2026), di Pasak Papar sap Pakat negar, labik 58  Quán Sứ, Hà Nội, Rayo sap ndem VN (VOV), taduan raok dom kapol urang lambaok vakil di Mentri Quoc phòng, Mentri Công an, Uy ban Trung uong MTTQ Viet Nam, Trung uong Doan Dam dara CSHCM, Mentri ngoai giao gam dom jabat karja negar  saong Trung uong jeng yau tinh, ban mai rivang saong ayuh. Lambaok dom kapol nyaom mai rivang saong ayuh gam taong yaom glong  bruk ngak di Rayo sap ndem VN ka dom bruk rik daong hu makna praong dalam  bruk  pathau khan, ba jalan  di Dang, sarak hukum di Karja  tal bhap bini,  rik tame tacei ba jalan sahaneng njauk manuac sia bhap bini.

Biar harei kabroi 18/6, Bo Tu lenh Ban raya Ho Chi Minh mbaoh tangin bruk pambuak pathau khan haong VOV saong 17 jabat mbao chi. Danak dak piah jhul khang khau tin quoc phong, pambak tabiak thaik thaot di Bol lin Wa Ho. Tui adat mbaoh tangin, dom labik bol lin saong bao chi hu brei tagok bruk pathau khan ka bruk bol lin, quoc phong bhum palei jeng yau bruk ngak hu di kapul lin pan phao karaong Ban raya Ho Chi Minh. Meng nan piah pambak tabiak dom danak dak pakacah, dom bruk naih gheih saong bruk di Bol lin Wa Ho dalam jaman bahrau. Dom gah jeng jhul khang bruk pambuak ka ilamo bruk ngak piah paglaong kapul pambuak bruk.

Dalam tu chreih chrai di bilan padeih hè, melam 18/6, di tapen kraong Ninh Kiều peih pakak Adit Ilamo - Yulit ban raya Can Tho thun 2026, ngan haong kadha “ Tay Do - Hadah hadai bilan hè”. Adit Ilamo - Yulit Can Tho hu rilo bruk ngak biak chreih mekre piah yaih khan, pacheih bruk yulit duh ka bhap bini saong tuai damuai; tui nan pambuak doanh nghiep ngak mbang gah yulit, po bein saong tuai damuai atah jaik. Jeng di melam kabroi, Roya Caraih Sen Dong Thap  mbang ka III hu peih pakak, di Mblang bein Văn Miếu, phường Cao Lãnh. Roya Caraih Sen thun ini ngan haong kadha “Mai panga Caraih dak dalikan”  hu dom labik parang iek seni nghe thuat,  nyaom biai pambuak bruk ngak mbang kinh te saong yaih khan  kaya Caraih  di tinh Dong Thap. Roya  peih ngak meng harei 21/6 anak tal.

Sa dalam dom bruk naih gheih di Harei ilamo bangsa Cam dalam negar thun ini kayua tinh Khanh Hoa dang ngak meng harei 26 tal 28/6 anak tal lac bruk pandar ilamo kong nghe so dalam bruk khik ramik saong yaih khan drap ar ilamo bangsa Cam. Tui nan, tinh Khanh Hoa daok padang bambang khau tin karei ka drap ar ilamo bangsa Cam, gam haong nan ngak taka so 3D dom drap ar, kaya banrik pambuak tal ilamo bangsa Cam. Amuk Thái Thị Lệ Hằng, Yam ndok So Ilamo, Pahat padhih saong Jirah rivang tinh Khanh Hoa brei thau:

Băng: “Bruk ngak taka so dom inem mek Cam jeng yau dom kaya ndap nda pambuak tak ilamo bangsa Cam ngak drap ar jeng kaya ndap nda jirah rivang hu angan, daong bruk khik ramik suai atah saong siam lagaih jang. Tapa bruk ngak taka so, tuai damuai hu thau rilo jang ka dom harei raya, dom danak dak ilamo siam gheih di bhap bini bangsa Cam”.

Jabat kaya mbang di LHQ birau khan brei thau, bruk iek lipa meda jhak jang di 13 labik pandiak di dunya dalam dom bilan anak tal, kayua bruk mesruh metak, kurang jien saong dom mbang langik salih karei oh lagaih. Kapol nyaom ini khan brei thau, bruk mesuh metak ba tal iek lapa di taong abih dom labik gaok kan kandah. Langiu di nan, dom bruk ngak mbang kinh te, cakak trun bruk daong ngak pahala saong meda gaok langik El Nino, meda ngak pandiak bhang saong ia sua di dom labik mbuan gaok kan kandah.

Indonesia hu pataom khik brah rilo abih lac 5,3 trieu tan saong daok peih ngak dom jalan pacang khik bruk ngak kaya mbang tuk negar ini srap gap ka tabung glaong di mbang pandiak bhang kuhria rah tabiak di bilan 8 anak tal. Bruk pataom khik piah ini hu ginup piah pabak ka hatai caong pablei dalam negar dalam labaih 2 bilan. Dom karja palei hu pato tacei patagok maong iek pandiak bhang, pasiam ribaong tui ia dalam bilan thu, brei mboh dom danao padang saong danak dak padang ia meda daong bruk ngak nong tuk hajan takik.

Kapal ahaok Qantas di Australia birau khan brei thau bruk peih jalan par  atah abih di dunya, pambuak London, Anh saong Sydney, Australia peih par tal 22 tuk jaik gauk, tui kuhria  meng akaok bilan 10 thun hadei. Piah par atah jang 17.000 km, Qantas yaih khan  akaok Airbus A350-1000 hu brei kuhria par tui hatai di drei. Karei jang bruk ba tabiak tuk camereip meda pajeng tal 480 tuai damuai, dalam nan hu 140 tuai daok gaiy bhian./.