Dalam thun ini, bhap bini dut iek prein yawa tui bilan oh mek jien kayua gilang karja bayar. Dalam nan bhap bini hu dut iek ruak nội khoa, tangi idung, tarakong, dut iek darah, ia me-ik saong thaok binguk X-quang tim phoi, piah thau dahlau ka dom janih ruak yau baoh hatai, me-ik saradang, baoh gan ratak. Paok ini brei dut iek dahlau ka 5 trieu urang oh la blei BHYT saong baoh sang sarak karja, urang ngak kong, pamong tal bruk bhap bini dut iek ruak dalam thun, hu thau aval dahlau ka ruak kik saong khik iek prein yawa gam gam.

Di Nyaom biai taom gaok cu tri di Kapol Quoc hoi ka 4 di dom phuong, xã gah bhum timur TPHCM (Bà Rịa - Vũng Tàu klak), rilo cử tri pok panuac tagok Quoc hoi sangka, samar langyah blaoh dom bruk daok kandong ngak haduh hatai saong ngak kan kandah tal raidiuk bhap bini. Brei panuac di nyaom biai, urang Quoc hoi Lê Khánh Hải sahaneng lac, dom bruk pambuak tal gah taneh riya hu makna biak praong. Yau nan ye, caong khin dom bhum palei saong kein kaba lagaih di bhap bini, bayar njauk tui hukum, daong sumu, brei hu labik daok birau hu lagaih haong raidiuk…

UBND tinh Dong Thap birau ba tabiak Bruk peih ngak brei patru kathaot khang kajap. Tui nan ngak brei patrun kathaot tal thun 2030, tinh Dong Thap kham merat trun kathaot  labaih 0,18% sa thun, khik brei salah bruk oh daok kathaot di thun 2029. Piah ngak hu bruk ba tabiak nan, tinh daong padang ngak saong peih ngak dom bruk, danak dak patrun kathaot pambuak haong bruk ngak mbang pala drak, pablei salih, jitvu, padang mbang ngui, piah ngak bruk, duah jien tame khang kajap ka baoh sang kathaot.

TPHCM mbang akaok meti ngak iek bruk khik radaih “oh taveik tal”, oh hu urang ngak bruk di phuong An Đông (di Quận 5 klak). Ngak bruk tapa mac 90%, daong ngak brei cambaic laic bruk khik iek tapen jalan, trun takik urang ngak bruk saong jhul pakhang bruk khik iek medik do thi birau. Urang pandar Can cuoc bhap bini hu pagam chip atau Harak ba-ar peih radaih pasang tapa piah payua radaih saong mek radaih tabiak. Mac tu dong kuhria tukvak, kuhria jien saong tabiak harak online oh pandar jien mbaok. 

Yaom lac oh ka tame ngak bruk, yaok pluh got ndien  di danak dak Sang mac thuy dien  Đức Thành, xã Bù Đăng, TP. Đồng Nai (huyện Bù Đăng, tỉnh Bình Phước klak) trun jhak khut tayak. Birau ini, sa got ndien 110kV glong labaih 15 met jaoh jaleih ngak bhap bini huac  gaok bala. Mboh rilo gang got ndien padang ngak oh kajap, oh njauk ilamo. Urak ini, UBND xã Bù Đăng  iew dom po buh jien tame ngak, brei ngak kajap, gam padang talaoh kakei dahlau piah bhap bini thau juai mai jaik.

Tong thong Mỹ Donald Trump hu mai tal Bac Kinh, rivang Trung Quoc  akaok meti hadei sa pluh thun. Sa dalam dom bruk rahra dunya caok hatai lac dua taneh ia hu jalan langyah tani tanat atau oh, njauk ndem tal lac  bruk merak gauk gah kong nghe di negar dak harei dak catang. Dom halau meng  Nhà Trắng khan lac danak ginum biai di nyaom biai pakat glong mbang ini pataom tame bruk pablei salih, AI, dom bruk ngak kong nghe glong, pambuak nang luong saong dom labik cuang kandah gah chinh tri.

Bruk nao sirah yulit negar langiu di dom urang daok diukrai di Australia daok chiat jang tuk taneh ia birau ini brei tagok jien bac meng 70AUD tal 80 AUD ka sa urang tabiak  truh Australia. Jien ini lac Jien nao mai di tuai. Mentri Noi vu Australia khan lac, jien ini meda bayar veik ka sa mbang nao tabiak negar langiu oh jeng.

Jabat chuc nang di Hàn Quốc kakei dahlau ka hajan praong. Tuk hajan meng 100mm/h tagok, kakei dahlau samar chip hu ba tabiak saong khaw tin samar tal bhap bini tapa loa, còi kakei bhap bini di dom labik bhap bini, payua harak thu online dalam 12 minit./.