Piah ngak bruk pablei tabiak kruac bung saong kruac aik that tapa Trung Quoc, Mentri Ngak nong saong Alam langik pandar dom bhum palei brei samar drah pabak ma so bhum pala, salah blaoh harak gal dahlau harei 30/5, oh luai kan kandah tal bruk pablei tabiak saong bruk ngak mbang di urang ngak nong. Dom bhum palei brei caik dahlau jao bruk ka dom gah hu ilamo, gam haong nan peih bruk pato pasram di pakat xa piah taoh talaih bruk gal tavak ka urang ngak di labik, oh luai ka bruk darak pasar bo oh hu ma so piah pablei tabiak.

Lien doan Lao dong TPHCM saong dom xa phuong pambuak bruk pathau khan jalan tacei ba di Ndang, sarak di Karja, njuak ndem tal dom kadha di sarak ndem ka urang ngak, kong ndoan, BHXH, khik labik ngak bruk salamat. Tui nan, pakhang bruk kuhria daong, khik kien laba saong hukum lagaih, njauk lagaih  ka urang ngak. Urak ini, TPHCM hu labaih 600.000 doanh nghiep gam haong jaik 8 trieu urang ngak.

Thun 2025, GRDP di Dong Nai tagok labaih 9,63%, dang di ka 7 dalam negar saong ba akaok labik Dong Nam Bo. Akaok UB Bhap bini ban raya Nguyễn Văn Út taong yaom: Meng akaok thun tal ini, Dong Nai daok dalam kapul cakrok patagok glaong abih dalam negar saong dang akaok labik gah Meraong negar. Bruk ngak hu brei mboh bruk pamedeih khang kadang di labik ngak tabiak, prein uak drei di bhap bini saong siam lagaih meng dom sarak dui ba ngak lagaih, kham merat salah blaoh jalan cakrok patagok 10% dalam thun ini.

Tỉnh Dak Lak urak ini hu abih labaih 22 trieu drei athur raong. Urak ini, jit aih caraoh pabui chau Phi saong mbuan virut njom ruak laka cambuai tapaok kakau di taphon athur raong. Piah khik caga taphon athur raong, gah ngak nong di tinh Dak Lak daok tacei patao bhap bini ngak tui dom jalan pacang caga samar. Tui nan pasang iek veik dom pajaih lagaih haong bhum palei piah ngak pajaih saong dom drei athur pajaih siam, patagok tui darak pasar, ba mai kein laba glong ka urang raong.

Rilo jalan ribaong di xa Nhơn Hòa Lập, tinh Tay Ninh daok njom nerak trak kayua halau ia tathuak juk, mbau bluk trak. Bruk ini dui atah ngak ka bruk daok dang srau kadau, kan kandah tal prein yava rilo meng lac urang taha saong uranaih. Dalam tuk Tay Ninh daok jhul patagok gah ngak nong hijao, bruk dom jalan ribaong tui ia njom nerak dui atah daok ba tabiak caong khin brei hu jalan ngak khang catang jang piah klaoh patruh bruk klak hareik harom suan hukum.

Rajaei An Do brei ramik pasiam dom asar kadha hukum blei meng negar langiu tame ngan haong dom urang pablei kaya ngui cuh meng ameh 100 kilo yaok sa harak adat saong pambuak dom harak anak tal haong bruk nga salah takik di nyu 50% bruk pablei tabiak negar langiu dahlau di nan. Bruk nan rah tabiak hu sa harei hadei rajaei An Do  tagok jien je blei ameh tame meng  6% tagok 15% piah takik ngak harak blei ameh tame.

 Sa lanyal pakat sang tui thaik kanduh abao tamo di bimong Eiffel, glaong 2,75 m, dalam nan hu 14 tal lanyal meng thep dinh tán, brei hu ba tabiak meraik payaom di harei 21/5 anak tal. Yaom lac yaom kaom akaok meti ba tabiak simu labaih 1,1 tal 4 ty dong Viet Nam, dom urang ilamo brei mboh lek taka di nyu meda tagok glaong rilo mbang.  Bruk ini sa mbang tra brei mboh prein dui pachreih khang kajap di dom ndap nda kaya ban medin pagam haong sajarah negar Prang.

Rajaei Yemen hu dunya taduan saong gah Houthi brei bayar bol lin labaih 1.600 urang guk, brei mboh bruk bayar praong abih kuhria meng dahlau mai tuk rah tabiak mesuh metak di taneh ia ini. Urang ngak praong di Hoi dong Chinh tri Pakat glong di Houthi ini lac “sa bruk ngak hu jak jeng siam mekre tui sajarah dakrai”,  tui nan brei mboh bruk urang guk tuk halei jeng brei ngak dahlau. Dahlau di nan, thun 2023, dua gah jeng hu ginum biai nao mai jaik 900 urang guk dalam chien dich praong kayua Hoi Chữ thập đỏ./.