Page 12/6, Ban uy, HĐ Bhap bini, UB Bhap bini, Uy mban MT Negar Viet Nam Ban raya Dong Nai peih Harei peih ngak Danak dak Sang daok rahra brei pah Long Bình (tukvak ka 1) di phuong Long Bình, Ban raya Dong Nai. Ini lac danak dak sang daok rahra brei pah akaok meti di Ban raya Dong Nai saong jeng lac danak dak akaok meti di dalam negar hu peih ngak. Danak dak kayua gah Pasang iek danak dak buh jien tame saong hu padang di labik taneh praong labaih 1,52ha, kuhria hu padang labaih 10.000 baoh sang daok rahra brei pah gam haong ha tang samu gauk duh ka rahra. Tukvak ka 1 di danak dak hu 2 block sang glaong 20 tal hu labaih 1.000 baoh sang brei pah. Nao gam haong danak dak lac dom sang bac pambuak pakat 1-2-3, sang bac mam non, bein bangu phun hijao…Labik peih ngak danak dak pataom tame rilo labik ngak kong praong yau ye: Amata, Bien Hoa II, Ho Nai, Loteco saong Agtex Long Bình, lac labik hu hatai caong khin biak praong ka sang daok brei pah tani tanat, salamat saong njauk lagaih haong prein bayar di urang ngak bruk.

Hadei ngak salah dua mon pakacah lac Ngu van saong Toan, page harei 12/6, dom anek saih pakacah harei puac di mbang pakacah tamat THPT 2026 ngan haong dua mon palih ruah. Var pakacah hu peih ngak karei tuk anek saih tut angan pakacah sa mon, dalam tuk anek saih karei brei pakacah duah mon patui gauk. Mbang pakacah tamat THPT 2026 tamat blaoh hadei dua harei peih tabiak hu rilo sahaneng  karei di gauk. Hadei dom bilan kham merat pasram bac megru, kan kandah, caong khin saong oh padeih, urak ini kadha bo rilo anek saih  caong mong abih lac padeih padei saong cang brei thau tanut kadha pakacah di drei. Tui bruk ba tabiak di Mentri Pato megru,  tanut pakacah tamat THPT 2026 hu khan brei thau di bilan 7. Hadei  thau ndiem, anek saih brei tut angan palih ruah sang bac dai hoc tui hukum ba tabiak.

Ban raya Ho Chi Minh bahrau ba tabiak jalan ngak ka 243 ka bruk patui veik taoh talaih, tavak tavaiy ka dom danak dak kandaong dui suai atah dalam ban raya. Tui kuhria, thun 2026, Ban raya Ho Chi Minh kham merat ngak bruk glaong abih piah salah blaoh jalan ngak langyah 100% danak dak, danak dak kandaong, kan kandah dalam ban raya, samar drah peih ngak, salah blaoh saong pandar. Ban raya Ho Chi Minh urak ini hu 838 danak dak, labik taneh daok kandaong, tavak. Dalam nan hu 54 danak dak daok dalam bruk langyah di Trung uong 784 danak dak daok dalam tham quyen langyah di ban raya. Tui Phaok akaok UB Bhap bini Ban raya Ho Chi Minh Trần Văn Bảy, kuhria tal ini, Ban raya Ho Chi Minh hu salah blaoh bruk taoh talaih atau hu jalan tacei pato langyah ngan haong taong abih danak dak nan, peih paha 17.000ha mbaok taneh saong jak ba labaih 206.000 ti dong phun jien buh tame rahra.

Meng harei 1/7/2026, Thong tu ka 31/2026 di Mentri Kong thuong ba tabiak  brei thau kaya meng halei mai tui bruk khik iek di Mentri Kong thuong ba tame ngak tui. Tui Cuc Khik iek saong Patagok darak pasar  dalam negar, bruk duah thau hu meng halei ka yaok janih kaya, ndap nda mbon gaok kan kandah tui bruk khik iek di Mentri Kong thuong. Dom kaya kan ndap nda nan brei thau halau gha di nyu tapa Mac jamraih VeriGoods atau mac karei hu pambuak haong VeriGoods. Tapa mac, urang blei meda tame duah oh abih jien ka khaw tin kaya kan yau angan je,  thaik  binguk, labik ngak tabiak atau  pablei salih, angan je, taka so, harei pandar…

Mentri Y te hu mbaoh tangin danak dak Sang iek ruak ve tinh tukvak 2026 - 2030, ngan haong jalan ngak ba dom jitvu y te ky thuat glaong nao tal jaik rahra jang; tal 2030, patakik abih 20% bruk salih nao sang iek ruak karei ngan haong dom kapul ruak hu jao salih ilamo ky thuat. Tui danak dak, snag iek ruak ve tinh hu brei caik dahlau bruk palih ruah lac dom labik y te, pasak y te di dom labik kan kandah, bhum atah bayah; 54 sang iek ruak “hu makna” lac dom sang iek ruak akaok gah yau ye: Bạch Mai, K, Chợ Rẫy, Việt Đức, Nhi Trung ương, Phụ sản Trung ương... brei tapak pato pakai saong jao salih ilamo ky thuat ka dom sang iek ruak ve tinh.

Harei 12/6, gah bol lin daong bala di gah meraong Philippines gaok kan kandah kayau hajan praong saong dom mbang megei taneh rah tabiak gam gam piah duah urang lahik dalam mbang megei baoh taneh khang 7,8 do richter  rah tabiak di harei 8/6. Anak bruk nan, Tong thong Ferdinand Marcos Junior hu mai iek tapak labik General Santos; brei buh tabiak 100 triệu peso (labaih 1,6 triệu USD) piah ramik pasiam dom danak dak duh ka bhap bini, daong 50.000 peso ka yaok baoh sang hu urang metai. Urak ini, hu labaih 45.000 bhap bini brei panduan ba nao labik karei, parabha meteh daok di dom padai tuan. Labik bala rah tabiak, bol lin daong hu labaih 3.400 urang lin,  bhap bini saong yaok rituh radaih  ba mai caga luac harei melam piah ngak bruk.

Viet Nam daok dak harei dak jeng labik jirah rivang hu rilo tuai damuai Australia palih ruak tuk daok dalam 5 harak angan dom labik chreih takre di tuai damuai Australia saong dang ka 2 dalam harak angan dom labik jirah rivang di Dong Nam A. bruk kuhria hu di Jabat Kuhria Australia brei thau di harei 12/6 hu mboh lac, dalam bilan 4/2026, labaih 1 trieu rahra negar ini hu nao jirah rivang negar langiu, tagok 4,6% dut saong tukvak ini thun dahlau. Dalam nan, labik jirah chreih takre abih di rahra Australia lac Indonesia, patui veik lac New Zealand, Nhật Bản saong Trung Quốc. Njauk caik hatai lac, Viet Nam dang di ka 5 dalam harak angan dom labik mai tal chreih takre di rahra Australia dalam bilan 4/2026 ngan haong labaih 68 ribau tuai damuai jirah rivang. Oh lac yau nan, dalam dom labik mai hu chreih takre di tuai damuai Australia di Đông Nam Á, Viet Nam tok dang hadei Indonesia saong truh tapa Thai Lan saong Singapore.

Thai Lan tame bilan hajan meng bilan 5 thun 2026 saong meda hu hajan praong di ralo labik. Di merang nagar ini, hajan praong dom harei tapa  ngak ia dauk di 3 tinh Krạ-bi, Phang-nga saong Trang. Cuc Pacang caga saong Patrun takik Bala di Thai Lan tacei pato  dom jabat pakat tinh saong pasak khan brei thau samar, tui iek catang hajan ribuk, tui  nan peih ngak dom jalan pacang caga saong daong urang gaok kan kandah. Harei 11/6, Cuc  Khi tuong Thai Lan kakei veik meda hu hajan praong  saong ia sua di 63 tinh. Tui urang jakar Thai Lan, kayua dom mbang hajan praong samar ba tal suai tathuak ia saong ngak ia dauk./.