Page ini harei 10/6, di Ha Noi, Tong Bi thu, Po negar ong To Lam hu mai taom mbaok dom urang naih gheih  dalam Danak dak “ Bruk siam gheih” di Rayo papar binguk Viet Nam( VTV). Tong Bi thu, Po negar ong To Lam  brei mboh bruk bui sambai, druat druai tuk taom mbaok dom urang naih gheih, ong lac dalam raidiuk, hu rilo bruk oh thei thau, oh praong, min ngak ka urang druat druai dalam hatai. Brei panuac di var taom mbaok, Tong Bi thu, Po negar ong To Lam ndem cambaic laic, khol ita juai iek lap bruk nhak ilamo, jalan diukrai, anek manuac saong hatai jia xa hoi. Patagok oh lac ngak tabiak rilo drap ar kaya kan jang, padang ngak rilo danak dak jang, mek hu rilo bruk ba tabiak. Patagok siam saong khang kajap lac ngak ka anek manuac diukrai dalam salamat jang, anit ranam gauk jang, sumu gauk veik, ngak njauk tui hukum, hatai jia, kham merat yam tagaok saong daong gauk ngak bruk.

2/ Harei ini ( 11/6), dalam negar hu labaih 1,2 trieu anek saih hu mbaok tame pakacah tamat THPT thun 2026. Ini lac mbang pakacah mbang akaok meti hadei tuk pagam tinh ban. TPHCM hu 142.899 anek saih tame pakacah. Ban raya hu 246 labik pakacah ngan haong 6.000 duk bilik pakacah, parabha  di klau labik Ban raya HCM klak, Binh Duong saong Ba Ria - Vung Tau dahlau diah. Bruk pakacah praong yau nan ye ban raya brei ba kadha pakacah mai tal dom lanbik dahlau sa harei, salih ka bruk ba tame page harei pakacah yau dahlau diah. Di Côn Đảo, kadha pakacah saong kadha lang tabiak di anek saih  hu pajeng meng kapal ahaok, khik brei salamat, siam mekre. Tinh Lam Dong, dalam nan hu Binh Thuan klak, hu labaih 41.000 anek saih tame pakacah mbang ini.

3/ Akok UBND TPHCM birau hu harak tacei pato  dom sở, dom gah saong dom don vi pambuak tal bruk pakacah brei harak chung nhan (so bhong) ka urang blei sang daok di dom danak dak di TPHCM. Sở Ngak nong saong Alam moi truong ban raya  patui pasang iek, lang talaih kan kandah, tavak tavaiy; brei ngak pasamar harak so bhong ka uarng blei sang di dom danak dak daok kandong. Tui nan, kuhria taong abih, vak angan dom danak dak sang daok hu ba tame pandar min oh ka hu harak gal; parabha, brei thau bruk daok gal tavak di yaok danak dak; ba tabiak jalan ngak, tukvak peih ngak saong tukvak peih ngak. Sở ini brei khan cambaic laic khaw tin di dom danak dak paedang sang daok di Blah web thong tin dien tu di so.

4/ Peih ngak meng puac thun 2025, mbiah tal ini, danak dak Pambuak ilamo drap ar oh mboh di meta “ Bruk ngak lan am di urang Cam” pambuak haong bruk yulit Bình Đức - Bình Tiến di xã Bắc Bình, tỉnh Lâm Đồng (di tỉnh Bình Thuận dahlau diah) gam bruk ngak lan saong ngak yulit bhap bini, rik tame khik ramik drap ar hu UNESCO pok meyaom saong ba bruk ngak mbang tani tanat ka bhap bini pak ini. Tapa  dom tal pasram di danak dak, urang gheih tangin saong bhap bini hu ilamo yaih khan, dak dalikan ka drap ar, dak padang veik bruk ngak meng kan jeng yau khik ramik saong patagok bruk ngak yulit. Hadei pasram, dom bruk ngak, parang iek saong yaih khan  kaya kan, dak dalikan ka kan piah  tuai damuai hu thau di ralo urang mbeik lan am./. 

# Piah baoh pa-aok pablei tabiak langiu negar, tinh Dong Thap hu patagok labaih 10.030 ha pa-aok tut angan ma so bhum pala (hu 353 ma so) saong ba kaya nong tagok dom labik pablei salih ndien tu praong. Urak ini baoh pa-aok Dong Thap hu pablei tabiak tapa dom darak pasar yau ye Hoa Kỳ, EU, Hàn Quốc, Úc, New Zealand... Karja palei chreih chrai tacei ba urang ngak nong pandar ilamo ky thuat piah ngak tabiak kaya salamat, gam haong nan jhul khang bruk pambuak, ngak talei pambuak dom HTX saong gah ngak mbang pablei salih ngak tabiak kaya. Bruk khik tani tanat ka jalan ngak paglaong asar siam saong ngak rilo bruk blei tame meng jirah rivang sinh thai lac anek kiar ameh daong urang ngak nong Dong Thap ngak meda karo kajap.

Xin chuyển sang phần tin thế giới: 

# Trung Quoc bahrau salah blaoh Danak dak pataom nang luong ia harei -hydro-pataom khik di tinh Giang Tô. Ini lac danak dak ngak iek ka ndien ia harei di langiu tasik pataom nang luong ia harei, hydro saong pataom khik nang luong praong abih di Trung Quoc. Danak dak hu padang di langiu tasik, hu kong suat ndien ia harei 400.000 kilowatt, pataom peih ndien, ngak tabiak hydro saong pataom khik nang luong, gam haong nan pambuak pagam pandar nang luong taong abih saong pasang khik sinh thai tapen tasik.

# Harei 10/6, Tong thong Lien bang Nga Vla-đi-mia Pu-tin hu tut angan ba tabiak hukum bahrau brei adat ka Gilang pariak Trung uong Nga saong Gilang pariak Xơ-be-rơ-banh hu srap gap ngak padam dom kaya par oh hu urang peih nduac piah khik kajap dom bruk hu makna, bo oh brei cang bruk ndom meyai meng dom kapul urang pan bruk. Tui nan, dom urang ngak bruk di dua Gilang pariak ini hu bruk pandar dom bruk pacang caga ka ahaok par oh hu urang peih par, kaya nduac di jalan mbak saong angaok ia oh hu urang peih nduac tuk dom kaya nan rah tabiak jaik dom labik hu pacang khik…

          # Mentri Y te CHDC Congo brei thau, harei 10/6 jit ruak Ebola hu patui veik pambak tapa sa labik y te bahrau di tinh I-tu-ri di negar ini, brei mboh virus jeng daok pambak khang hadei klau adit kuhria meng tuk jit ruak hu khan brei thau. Kuhria meng tuk jit ruak tamuh tabiak tal ini, CHDC Congo hu taduan 635 urang njauk ruak Ebola hu brei mboh saong 127 urang metai di klau tinh bhum Pur dalam nan hu tinh I-tu-ri, Barak Kivu saong Meraong Kivu./.