Page ini (11/6) di Sang Quoc hoi, Mentri Chinh tri, Ban Bi thu Trung uong Ndang peih bruk Nyaom biai dalam negar roh duah, bac megru, ngak patruh saong peih ngak Sarak ka 06-NQ/TW harei 19/5/2026 di Mentri Chinh tri ka bruk peih ngak jalan pambuak langiu negar di Nyaom roya XIV di Ndang. Tong Bi thu, Po Negar Tô Lâm hu mbaok tame saong ndom meyai ka bruk pato tacei di Nyaom biai, hu mbaok dalam Nyaom biai hu Thu tuong Rajaei Lê Minh Hưng, Akaok Quoc hoi Trần Thanh Mẫn, Thuong truc Ban Bi thu Trần Cẩm Tú, dom urang Pan akaok pakat glaong di Ndang, Karja, dom urang Uy vien Mentri Chinh tri, Uy vien Ban Bi thu, Uy vien Mbang Chap hanh Trung uong Ndang saong 800 urang lambaok vakil lac urang pan akaok dom mban, mentri, dom gah, Mat tran Negar Viet Nam, dom kapul Trung uong, lambaok rilo bhum palei, jabat, labik dalam majam chinh tri.

Page ini harei 11/6, di Ha Noi, Trung uong Hoi Chu thap do Viet Nam peih bruk Kuhria iek veik Bilan ngak pahala thun 2026 ngan haong kadha “ 80 thun - Bruk ngak anit ranam daong bhap bini”. Bilan Ngak pahala thun 2026 rah tabiak dalam bilan 5, di taong abih pakat Hoi jak ba hu 762 ti dong,  sumu 152%  bruk ba tabiak, daong ka jaik 579.000 urang hu raidiuk kan kathaot, mbuan gaok kan kandah dalam negar. Bruk praong di Bilan ngak Pahala thun ini lac mbang akaok meti  taong abih pakat Hoi peih ngak  sumu gauk  “ Harei anit ranam”. Langiu di bruk daong, dom pakat Hoi hu daong bruk ngak mbang ka labaih 5.700 baoh sang; padang birau, ramik pasiam 1.444 danak dak, bruk ngak pahala; iek ruak, tacei pato khik prein yawa ka jaik 110 ribau mbang urang. Dom danak dak halan hatian alin brei darah ka labaih 156.000 don vi darah, sumu jaik 200% bruk ba tabiak; jak ba hu 942 urang tut ngan brei mo tạng.

Page ini (11/6), dalam negar hu labaih 1,2 trieu anek saih hu mbaok pakacah Ngu van – mon pakacah akaok meti di Mbang nyaom biai tamat THPT thun 2026. Ini jeng lac mon pakacah tui jalan ngak tu luan. Di Ban raya Ho Chi Minh, rilo anek saih brei thau, kadha pakacah atah saong kan. Cei gru Võ Minh Nghĩa, gru pato Ngu van Sang bac THPT Nguyễn Du (Ban raya Ho Chi Minh) ndom lac, kadha pakacah thun ini tagok tanut kan di nyu hu mboh cambaih laih, njauk ndom lac dut saong thun 2025 – thun akaok meti peih ngak Danak dak pato megru pho thong 2018. Min ngan haong bruk Mentri Pato Megru oh padeih paglaong asar siam bruk pato, paglaong caong khin brei hu piah pabak hatai caong dak harei dak glaong ka ilamo menuac urang ye kadha pakacah yau nan lac njauk jalan ngak.

Page ini 11/6, Cuc Ilamo dom bangsa Viet Nam, Mentri Ilamo, The thao saong Yulit pambuak haong Sở Ilamo, The thao saong Yulit tinh Dak Lak peih tal pato pasram paglong saong pato ilamo oh mboh di meta di bangsa Êđê piah khik ramik, patagok ilamo  duh ka bruk cakrok patagok gah yulit. Hu mbaok tame tal pasram hu labaih 100 urang nghe nhan, urang bac. Dalam 3 harei, dom urang bac hu urang ilamo, urang roh duah ilamo saong urang gheih ngak  pato pakai ilamo, bruk ngak pambuak tal dom janih kaya ilamo oh mboh di meta di bangsa Eđê hu ba tame Sarak drap ar ilamo oh mboh di meta pakat negar yau hari sử thi, daoh pandip pandao, daoh dam dara saong bruk pandar alat ragam duh ka bruk parang iek bhap bini.

Harei 11/6, jabat Canh sat Jalan mbak, Kong an Ban raya Ho Chi Minh brei thau hu taong bhat rilo po radaih nao di angaok jalan nao tabak takai piah “plaih” gar jalan di tukvak tabung glaong. Canh sat ndom lac urak ini di dom jalan praong, kayua radaih rilo di tukvak tabung glaong, rilo radaih moto nduac tagok jalan nao tabak takai ngak lahik salamat ban medin, mbuan rah tabiak bala, ngan kan kandah tapak tal bruk salamat di urang nao tabak takai, urang metui mejua. Tukvak anak tal, Jabat Canh sat Jalan mbakpatui veik paglaong bruk pasang duah, pasang iek, padang ilamo jalan mbak salamat, siam mekre, gam haong nan bayar gilac jalan nao tabak takai lac labik salamat brei ka urang nao tabak takai.

Anak bruk kol matuy rah tabiak sraw kadau, Rajaei Thai Lan tacei pato dom jabat chuc nang  pakhang bruk pasang iek saong jhul pakhang bruk chap mek matuy tapa rilo negar. Thieu tuong Wuthipong Yenjit, Tư lệnh Cảnh sát  pasang iek labik tapen negar bhum 2 harei 10/6 khan lac, tui khaw tin pasang iek, gah chuc nang chap mek kol pajeng ba matuy di tinh Kalasin, Đông Bắc Thái Lan hu 10 bao kadung hu 500 kilo matuy patau. Tui panuac khan di kol nyu dahlau di nan pajeng tapa truh hu dua mbang yau ini.

Rajaei Hungary hu ba tagok Quoc hoi rilo jalan pacang cakak tham nhung saong ngak tantu cambaih laih bruk kham merat dalam bruk jhul tagok peih paha paok jien 16,4 ty euro njauk kareik gindang meng kadung jien Lien minh chau Au (EU). Paok jalan ngak ini brei kak kajap bruk pathau khan drap ar di Hungary, peih praong bruk di Jabat liem chinh, paglaong bruk tantu cambaih laih dalam bruk meraik gah thau ka bruk karja saong dom meyao meyit jien padai, gam haong nan tayah jaik abih dom kadung pasang iek drap ar di karja hu padang meng di rajaei dahlau.

Dalam dom mbang dut iek prein yawa dahlau diah Tong thong Mỹ Donald Trump hu labaih 12 bac si mai iek ruak,  min birau ini hu tal 22 bac si chuyen khoa mai dut iek ruak. Kuhria mboh glong dua mbang dut haong dom mbang dahlau di nan di Tong thong Trump, saong lac bac si chuyen khoa praong abih bhian hu mbaok  dut iek ruak ka tong thong. Tapa nan brei mboh bruk gaok kan kandah ka prein yawa di urang ngak po Nhà Trắng.