Gah bol lin hu duah 49 atau talang liet si saong 1 kapol nyaom gam kaya kan di Bein bingu Le Thi Rieng, TPHCM. Ini lac mbang akaok meti gah bol lin ngak bruk duah hu atau talang kapol nyaom meng tuk peih bruk duah pataom. Tui nan bruk duah pataom, Bộ Tư lệnh Ban raya HCM daok pambuak haong Sang iek ruak Quan y 175 saong dom don vi chuc nang brei mek mau ADN dom talang liet si; tui nan brei mek mau AND meng gauk gar  liet si piah duh ka bruk pasang iek, duah thau angan je.

Hoi dong bhap bini tinh Dak Lak daong salih bruk ngak, langyah ngan haong gilai ikan oh daok ngak bruk taong chap ikan kaya ia. Dalam nan po gilai brei yah gilai hu dang sa mbang sumu 70% jien gilai. Langiu di nan, hu daong tani tanat raidiuk ka baoh sang urang hu gilai lac urang oh duah hu jien meng bruk karei. Jien daong sumu 30 kilo brah sa urang sa bilan,  kuhria tui jien 15.000 đồng sa kilo, dalam 12 bilan. Tui nan daong jien pato pakai, jien mbang huak saong jien nao mai ka dom urang caong hu bac salih bruk ngak.  

Meng akaok thun mbiah tal ini, tinh Cà Mau glut jaleih kuhria abih tih labaih 2.200 met. Dom mbang glut jaleih ngak khut 75 baoh sang, kuhria jien khat labaih 8 ti 700 trieu dong. Sa dalam dom labik glut jaleih trak atah di jalan Dương Thị Cẩm Vân tapen kraong Đầm Dơi, xã Đầm Dơi. Labik atal labaih 70m ba theik sa baoh sang, ngak khut dua labik padang kaya ndap nda gam rilo danak dak duh ka bhap bini. Kuhria khat lahik labaih 3 ti dong.  

Hadei tukvak khik yaom glong, baoh kruac aih di Dong Thap daok trun lap. Urak ini, kruac aih hu urang blei yaom meng 25.000 - 30.000 dong sa kilo, trun labaih 10.000 dong sa kilo dut saong bilan dahlau.  Yaom ini, urang pala labaih 3.000 dong sa kilo. Rilo baoh kayau bingi karei krih jeng daok laik yaom biar. Yaom lac tal puac bilan yau durian (Thái) yaom labaih 40.000 - 42.000 dong sa kilo. Baoh thanh long  hatai bhong meriak jeng labaih 10 ribau dong sa kilo, ngak khat lahik jien mek tame di urang pala.

Jabat Canh sat pasang iek Kong an tinh An Giang tabiak bruk langyah, chap khik Nguyễn Hồng Hải, ndih tapui thun 1969, daok palei Thuận Tiến, xã Sơn Kiên, tỉnh An Giang  pasang iek kayua ngak suan dom hukum ba tal tableik  ca no, ngak 15 urang tuai metai do Phu Quoc. Dahlau di nan, mon 13 tuk biar harei 11/7, ca no angka so AG 26751 di Kong ty TNHH yulit Minh Huy PQ kayua  Nguyễn Hồng Hải ngak po gilai pajeng 32 tuai damuai  negar An Do saong 4 urang ngak bruk di gilai peih meng Hòn Mây Rút Ngoài mai tapen tathik An Thới. Tuk nao hu 400 met ye cano tableik trun abih tame tathik.

Labaih 10.000 blah sarak akhar huroh di hala gal, daok khik hu jaik 1.000 thun di Medil Potala, Khu tu tri Tây Tạng, negar Trung Quốc,  daok ba tame ngak tui angka so di danak dak khik iek praong. Hala gal hu tavak kinh Phat, tui nan  khik hu biak rilo asar kadha y hoc, langik tathik, kịch nghe, ariya saong sakavi. Bruk roh duah dom hala gal oh lac rik tame khik ramik ilamo bo daok ngak brei cambaic laic bruk bac megru nao mai di dom bangsa dalam negar Trung Quoc.

Urak ini, langik pandiak catang di Hàn Quoc. Karja tinh Gyeongsang Bắc, Hàn Quốc, khan brei thau langik pandiak catang tal 39 do C. Taong abih dom bruk ngak di langiu langik brei padeih, taong abih bhap bini brei tame daok pandaok halui saong menyum ginup ia ka rup pabhap. Ini lac mbang akaok meti kakei ka pakat ini hu ba tabiak meng tuk Hàn Quốc ngak tui pakat pandiak birau. 

Mbang langik pandiak me-om tagok Prang ba tal ralo labik yulit saong ilamo siam gheih danei angan brei ramik pasiam tukvak ngak bruk piah khik brei salamat ka tuai damuai saong urang ngak bruk. Dalam dua harei puac adit, Thap Eiffel thaik binguk siam gheih abih di Prang  brei kareik pabah mbang samar jang yaok harei. Dua gilang khik piah danei angan lac lac Louvre saong  Orsay kareik pabah mbang mon 16 tuk. Jabat khi tuong Pháp  tui kuhria  di Paris meda tagol tal 36 do C, ralo labik karei di Pháp langik pandiak meng 39 tal 40 do C./.