Harei ini, peih pakak Nyaom roya Urang kumei pakat negar mbang XIV, vaktu 2026 – 2031 hu mbaok di 793 urang lac dom urang kumei naih gheih, lambaok ka dom urang kumei, dom bangsa, agama, dom bruk ngak karei saong bhap bini dalam negar. Dom urang lambaok vakil caong khin, vak tu ngak bruk birau brei salih birau catang dom jalan ngak di dom pakat Kapol urang kumei. Sa-ai H Thời KMăn, Pho Akok Ủy ban MTTQ, Akok Kapol urang kumei  xã Liên Sơn Lắk, tỉnh Đắk Lắk caong khin vaktu birau  hu rilo sarak  daong urang kumei ngak mbang cakrok patagok, abih di nyu nan lac urang bangsa takik, meng nan urang kumei meda brei mboh labik dang di baoh sang saong bruk ngak brei sumu gauk.

UBND TPHCM daok duah thau hatai sahaneng ka bruk padang dom don vi hanh chinh do thi di dom xa hu meng dahlau mai. Bruk duah thau hatai sahaneng hu peih ngak meng bruk buh phieu di yaok baoh sang. Tui hukum ba tabiak, meyah hu meng 50% baoh sang njauk hatai tagok, bhum palei brei ngak salah danak dak HĐND xã pasang iek. Bruk oh ka ngak hu, ye brei buh phieu mbang kadua; meyah oh ka njauk hatai, UBND xã brei khan ka UBND TPHCM langyah, ba tabiak bruk ngak njauk.

Thanh ndoan Can Tho birau meyaom 95 urang “ Dam dara naih joi ngak tui panuac Wa Ho tacei pato”. Ini lac dom urang naih joi  di rilo gah ngak siam rilo bruk, thau ba tabiak jalan ngak hadah krah, danak dak bruk ngak hu makna, rik tame bruk cak rok patagok bhum palei saong bhap bini. Sa-ai Nguyễn Quốc Khang, Bi thu Chi đoàn, di Sang bac Đại học Nam Cần Thơ khan lac, bruk hadah mbaok meta saong haniem siam tuk hu prein khang di dam dara drei rik tame  bruk  dak padang saong patagok di taneh ia. Ini lac prein khang piah dam dara  abih hatai  dalam bruk ngak di Doan.

UBND phuong Long Xuyen, tinh An Giang birau padang tabiak He sinh thai salih pandar taka so saong Blah website pablei salih dien tu phuong Long Xuyên. Blah website padang ngak tui jalan pagam, brei ngak sumu, pambuak khaw tin di karja, bhap bini saong doanh nghiep; tui nan daong pabak jitvu online yaih khan  dom kein lagaih ralo saong alam moi truong buh jien tame ngak mbang di bhum palei. Bruk ba He sinh thai salih pandar taka so rik tame paglong bruk ngak duh ka bhap bini, doanh nghiep di phuong.

UBND tinh Dong Thap birau mbaoh harak Danak dak ramik pasiam bruk gliut jaleih kraong Tiền di Ar pacang glut jaleih ar kraong di xã Thường Phước, piah khik siam prein yawa, drap ar di bhap bini saong doanh nghiep. Danak dak  hu peih ngak atah labaih 1.100 met, kuhria abih tih jien buh tame ngak 246 ti dong. Dom thun jiak ini, bruk glut jaleih ar kraong di tinh Dong Thap rah tabiak dak harei dak kan thau dahau saong dak harei dak praong. Dalam nan, di labik tapen kraong Tien di xã Thuong Phuoc lac labik pandiak ka bruk glut jaleih taneh, meda nagk kan kandah tal raidiuk bhap bini.

Brah blei tame khik piah di An Do dalam dom giang di rajaei hu tagok 15% dut saong tukvak ini thun dahlau, mek hu glong abih di bilan 6, dalam tuk padai lúa mi daok khik piah ralo abih  dalam 5 thun tapa. Brak khik piah ralo brei daong urang pablei tabiak negar langiu hu ralo abih di dunya tagok oh huac gaok kan kandah ka langik EI Nino. Dalam tuk nan, bruk khik piah padai lua mi hu daong ka rajaei An Do pablei khik yaom di puac thun ini tapa bruk pablei pandap di darak pasar.

Rajaei Thái Lan birau khan tapa bruk klak rabha khaw tin ka jien je  dunya. Bruk praong di jalan ngak ni lac pacang cakak dom doanh nghiep plaik njiak kak jien je di Thai  Lan. Bruk ini ngak ka Thai Lan  salih bruk kuhria  pachreih urang buh jien tame ngak mbang. Dahlau diah, Thai Lan bhian pandar  ngak tui sarak oh mek jien je piah pachreih  dom kapol nyaom negar langiu buh jien tame ngak mbang. Yau nan min, ala dom kadha hukum birau, dom jalan kak jien je oh daok lagaih.

Gah Trang luoi liem do di Ai Cap daong sa mbang pajeng kaya pandap daong  ngak pahala birau mai tal dải Gaza. Pajeng tal Gaza hu 2.132 tấn kaya mbang, tabung bei, jru tavao, kaya y te, menyek saong dom kaya karei karei. Kuhria meng akok bilan 10 thun 2023, Ai Cập hu payua tal Gaza labaih 1 trieu tấn kaya daong ngak pahala, rik tame hu makna biak praong klak rabha dom kan kandah di Gaza rah tabiak kayua mesruh metak suai lavik./.